Matayo 9

Yesu angumuponetsa munu yo apotsile muvili

Maliko 2:1-12; Lukasi 5:17-26

1Yesu akakwinaje mu mutumbwi na kulowoka lilamba akafikaje ku muji gwawo. 2Kahi vanu vanji vakamuletelaje munu yo apotsile muvili yoavaga avasise mu mulusaga, Yesu hoavaga kuliwona litumbilo lyawo, akamulonjelaje munu yula yo apotsile, “Mwanangu, wikangatse numbula yako! Uhulumilwe ndongwa tsako ntsibi.” 3Vadahitsi vamwe va malajitso ga Musa vakahulikaje cho alontsile Yesu, vakalonganaje kuta, “Munu yuno angumuliga Mulungu!” 4Yesu hoavaga kutsela chovanhotsa akalongaje, “Kwasawuli yachi munhotsa fibi mu numbula tsenyu? 5Chinu chachi cho chipefu, kulonga kuta, uhulumilwe ndongwa tsako ntsibi? Awu kulonga kuta winuche ubite? 6Lechelelo ili mutsele kuta Mwana va Munu anawo wuvetso wa kuvahulumila vanu ndongwa tsawo ntsibi.” Kaha Yesu akamulonjelaje munu yula yo apotsile, “Winuche utegule lusaga lwako na ubite kukaye kwako.” 7Munu yula yo apotsile, akinukaje na kubita kukaye kwake. 8Vanu veka wo vavaga vakong'ine vavaga kutsiwona ndongwa itso, vakavaje na muloto, kahi vakamutsumitsaje Mulungu kwa kuvapela vanu wuvetso uwo.

Yesu angumuchema Matayo

Maliko 2:13-17; Lukasi 5:27-32

9Yesu hoavaga anlutila kuhuma uko akamuwonaje munu yumwe yo anchemwa Matayo, yo avaga ichite hono ha kukongotsa kodi, Yesu akamulonjelaje, “Ufwate heni.”

Nayo Matayo akinukaje akamufwataje Yesu.

10Yesu hoavaga ichite mu nyumba ya Matayo alye chilyo hamwe na vadahitswa vake, vakatsaje vakongotsa kodi hamwe na vanu vanya ndongwa ntsibi vakikalaje na kulya na Yesu hamwe na vadahitswa vake. 11Vafwalisayo hovavaga kuwona ihyo, vakavawutsaje vadahitswa vake kuta, “Mbona mudahitsi venyu ankulya hamwe na vakongotsa kodi na vanu vanya ndongwa tsibi?”

12Yesu hoavaga kuhulika ihyo akavalonjelaje, “Vanu wosinambe vatamiche sivamusakaga muganga, lechelelo vatamwa wo vamusakaga muganga. 13Lecheleo mubite mukidahitse mana ya ndongwa tsino, ntsin'gana lusungu, ndema nambiko, kwasawuli singatsitse kuvachema vanu vawuya, ila ngatsitse kwasawuli ya vanu vanya ndongwa ntsibi.”

Madahitso ga kufunga

Maliko 2:18-22; Lukasi 5:33-39

14Kaha vadahitswa va Yohana mubatitsi vakatsaje kwa Yesu na kumuputsa, “Mbe, kwasawuli ya chichi hetwe na Vafwalisayo tunfunga na vadahitswa vako sinambe vafunje kumusuka Mulungu?” 15Yesu akavajibulaje, “Mbe, munu hoakuva antola mudala, vanu yo valibulitswe mulitsenjele vafuluche vave na ng'ung'uto na kuleka kulya na kung'wa! Ndaya. Lechelelo chikufika chipindi munya kukwela hoakuva awusile hagati hawo, iho ho vakuganika kufunga kulya.”

16“Kuduhu munu yo afuluche ahoneletse chilaka chipya mu mwenda mulovela. Lechelelo manyi adite ihyo, chila chilaka chipya chikumamuka kuhuma mu mwenda gula mulovela, na hala ho hatubwiche hakuva hakomi. 17Kaha kuduhu munu yo avikaga difwayi ntsipya mu mifuko misakafu jo jiwuyipwe kwa nyingo ya ng'olo. Manyi adite ihyo mifuko jila misakafu jikutwadika na difwayi yila yikubohoka. Ihyo difwayi ntsipya yivikwaga mu mifuko mipya.”

Muhintsa va Yayilo na mudala amponetswa

Maliko 5:21-43; Lukasi 8:40-56

18Yesu hoavaga anlonga ndongwa itso, akatsaje muvina yumwe va Chiyawudi, akamufugamilaje na kulonga, “Muhintsa vangu afweye sambi, lelo ntsinsuka utse umuvichile mawoko nayo akuva mumi”

19Ihyo Yesu hamwe na vadahitswa vake vakabitasaje na munu yula. 20Hovavaga vam'bita mudala yumwe yo avaga na wutamwa wa kuhuma danda miyaka kumi na jivili, akamufwataje Yesu kwa kumbele na akibataje lupembo lwa mwenda gwa Yesu.

21Adisile ihyo kwasawuli ilonje mu numbula yake kuta, “Manyi ndometse hela lupembo lwa mwenda gwake, ngupona.” 22Ihyo Yesu akapitukaje, nayo hoavaga kumuwona mudala yula akamulonjelaje, “Muhintsa vangu, wikangatsaje! Litumbilo lyako likuponitse.” Duve mudala yula akaponaje kuhuma luvalalulo.

23Kaha Yesu akinjilaje mu nyumba ya yula chilongotsi, akavawonaje vanu vampemba fwilimbi na lilugu lya vanu vanlomboketsa, na kuvemba ndalahela, 24Yesu akavalonjelaje, “Muwuche hono hano kwasawuli muhintsa yuno si afweye ndaya, ila avasise hela.” Lechelelo vanu iwo vakamuhekaje ndalahela kwa mbedatsi.

25Lechelelo vanu hovavaga kuhumitswa kivala, Yesu akinjilaje mu nyumba akamubataje liwoko muhintsa yula, nayo akalamukaje.

26Ndongwa itso tsikatagalilaje mu inyi yila yeka.

Yesu anguvaponetsa vanu vavili wo vabofwe

27Yesu hoavaga an'wuka hono hala, vanu vavili wo vabofwe vakamufwataje kuno vankola kuva, “Mwana va Dawudi utuhulumile.”

28Hala Yesu hoavaga kwinjila mu nyumba, fibofu vala vakatsaje kwake, Yesu akavaputsaje, “Mbe, muna litumbilo kuta heni ntsinvetsa kuvaponetsa?” Nawo vakalongaje, “Ena, Mutwa tungitumba.”

29Ihyo Yesu akavabataje miho gawo na kuvalonjela, “Yive hihyo kota fyo mungitumba.” 30Bahobaho miho gawo gakantsaje kulola. Yesu akavalemetsaje kwa kuhahanitsa kuta, “Muleche kumulonjela munu yoyuve lulongwa luno.”

31Lechelelo vene vakawukaje na kwantsa kutagalitsa ndongwa tsa Yesu mu inyi yila yeka.

Yesu angumuponetsa chibubwi

32Vanu hovavaga van'wuka kubita kwawo, vanu vanji vakamusindichilaje Yesu munu yo avaga chibubwi kwasawuli avaga na lisoka. 33Bahobaho Yesu ho avaga kulihetsa lisoka lila, munu yula akavetsaje kulonga. Vanu vakapomokaje na kulonga, “Lulongwa kota luno silwali luhumye hohave mu inyi ya Isilaheli!” 34Lechelelo Vafwalisayo vakalongaje, “Angujivinga misoka kwa wuvetso wa muvina va misoka.”

Yesu anguvawonela lusungu vanu.

35Nayo Yesu akajijendelaje miji jeka na fijiji fyeka kuno an'dahitsa, na kuvikula Ndongwa Nofu tsa Wuntsajila wa Mulungu, mu nyumba tsa kitang'anila Vayahudi na kuponetsa namwa tseka.

36Yesu hoavaga kugawona malugu kwa malugu ga vanu akawawonelaje lusungu, kwasawuli vavaga vankodeka kota ng'olo tsotsilihela mudimi.

37Ihyo akavalonjelaje vadahitswa vake kuta, “Finu fya kubeta fyolofu, lechelelo vabetaji vadodo. 38Lelo mumusuche Mutwa va fibetwa ili avasindiche vanu ku mugunda gwake gwa fibetwa vakabete.”

Currently Selected:

Matayo 9: SBV

Highlight

Compare

Copy