Matayo 25
25
Muhwano gwa vahintsa kumi
1Yesu akalongaje, “Luvala ulo Wuntsajila wa Mulungu wukihwana na vahintsa kumi wo vategwe tala tsawo na kubita kumutang'anitsa mukosano. 2Vahanu vavaga vapufi na vahanu vanji vavaga na nyala. 3Vala vapufi vakategulaje koloboyi tsawo, lechelelo vakalekaje kutegula na mafuta ga hachiba. 4Lechelelo vala vanya nyala vakategulaje koloboyi tsawo hamwe na mafuta ga hachiba mu supa tsawo. 5Yula mukosano hoavaga kuchelewa kutsa, vala vahintsa veka vakasintsilaje na kuvasa tulo. 6Hachilo na gati kukavaje na chiyove, Alee henyee! Mukosano ankutsa, mubite mukamutang'anitse. 7Iho vala vahintsa veka vakalamukaje, vakatsiwuyapaje koloboyi tsawo ili tsache finofu. 8Ihyo vala vahintsa wo vagaya nyala vakavalonjelaje vala vanya nyala kuta, mutupele chidogo mafuta genyu kwasawuli koloboyi tsetu tsin'tsima. 9Lechelelo vala vanya nyala vakavalonjelaje, ndaya sigakutukwila hetwe na henye! Chiba mubite kwa wo van'gutsa mukagule mafuta genyu. 10Ino lelo vala vahintsa wo vagaya nyala hovavaga kubita kugula mafuta, mukasano akafikaje, na vala vahintsa wo valichang'ani vakinjilaje mu nyumba yila ya litsenjele hamwe na mukasano na lwitsi lukadindwaje. 11Hambele vala vahintsa vanji vapufi vakatsaje na kwantsa kuchema fikami, Muvina! Muvina! Utudindulile! 12Lechelelo yula mukosano akavajibulaje tsinguvalonjela wukweli kuta, sintsivatsele henye.” 13Kaha Yesu akasindaje kwa kulonga, “Mwiyangalilaje, kwasawuli simuyitsele siku wala sala.”
Muhwano gwa vatantsi vadatu
Lukasi 19:11-27
14“Kaha Wuntsajila wa Mulungu wukihwana na munu yumwe yo an'gana kubita kulujendo, akavachemaje vatantsi vake na kuvisa kwawo mali tsake tseka. 15Yumwe akagavilwaje fifuko fihanu fya tsahabu, na yunji fifuko fivili na yunji kafuko kamwe, chila yumwe akagavilwaje kota wuvetso wake fyo wuli. Hambele mwene akawukaje. 16Yula yo agavilwe fifuko fihanu fya tsahabu akabitaje na kuditila biyasala, akapataje fifuko finji fihanu. 17Hihila na vakavili akagavilwaje fifuko fivili fya tsahabu, akapataje fifuko finji fivili. 18Lechelelo yula yo agavilwe chifuko chimwe cha tsahabu, akabitaje kuyava lyowo na kuchitila, akachifihaje chifuko chila cha muvina vake.”
19“Hotsavaga kulutila siku ntsolofu yula muvina va vatantsi vala akawuyaje, ili atsele mali tsake fyotsili. 20Yule mutantsi yo agavilwe fifuko fihanu fya tsahabu, akatsaje na fifuko finji fihanu. Akalongaje kuta, Muvina, wavaga umelye fifuko fihanu fya tsahabu, ihano tsinafyo fifuko finji fihanu. 21Muvina vake akamulonjelaje, Heve mutantsi muwuya na vakihuvilwa! Udisile finofu kwa lulongwa ludodo, lelo ngukuvika mu ndongwa ngomi. Utse usangale hamwe na heni muvina vako.”
22“Yula yo agavilwe fifuko fivili fya tsahabu, akaletaje fifuko finji fivili. Akalongaje kuta, Muvina, heni ukamelye fifuko fivili fya tsahabu, lave masile fifuko finji fivili. 23Muvina vake akamulonjelaje, Heve mutantsi muwuya na vakihuvila. Udisile finofu kwa lulongwa ludodo, ngukuvika mu ndongwa ngomi. Utse wusangale hamwe na muvina vako.”
24“Lechelelo yula yo apelitwe kafuko kamwe ka tsahabu nayo akatsaje na kulonga kuta, Muvina, heni ntselije kuta heve uli munu mukangafu, na ubetaga hala ho siuyalite, na ulundaga hala ho siulatagalitsa. 25Lelo ngavaje na muloto, ngakatilaje hasi kafuko kako. Ino lelo utegule kafuko kako.”
26“Muvina vake akamulonjelaje kuta, Heve uli mutantsi mubi na mugata, un'tsela kuta heni mbetaga hala ho sintsayalite, na ndundaga hala ho sintsatagalitse. 27Waganikaga kukavika kafuko kangu ku benji, na heni kota hino fyo mbutsile ntsikakutegula kafuko kangu na fwayida yangu. 28Lelo, mumusukule kafuko iko mukamupele yula munya fila fifuko kumi. 29Kwasawuli munu yoyuve yo anguchikolela katsi chila cho ntsimugavye uyo ngumuwila na chinji, nayo akuva nafyo fyolofu. Lechelelo munu yula yo sinambe achikolele katsi chinu chila chidodo cho ntsimugavye, ngumusukula na chila cho anacho. 30Nanye mumutotse uyo mutantsi mubi, kono kokuna jitsa na chivembo na kugwegwetsula mino kwasawuli ya ng'odeko.”
Wuhigo wa wudugo
31Yesu akalongaje kuta, “Luvala lo akutsa Mwana va Munu kota Muntsajila hamwe na vatantsi veka va kilanga va Mulungu, iho ho akikala mwilanga mu chigoda chake cha Wuntsajila kuno mwene yo Muntsajila. 32Vanu va inyi tseka vakukong'ana halutalo hake, nayo akuvabagula kota hila mudimi fyo atsibagulaga ng'olo na mene. 33Akutsivika ng'olo kulubali lwake lwa kwililo na mene akutsivika kulubali lwake lwa kwichiji. 34Iho ho Mutwa akuvalonjela vala yovali lubali lwake lwa kwililo kuta, Mutse henye yo mutambichilwe na Dada vangu, muwuhale wuntsajila wo wavisilwe kwasawuli yenyu kuhuma hala inyi hoyavaga ying'acha kuwumbwa. 35Kwasawuli hontsavaga na ntsala henye mwamelye chilyo, hontsavaga na ng'alu mwamelye malenga ntsang'weye, na hontsavaga ntsi mujentsi mwandibulitse. 36Hala hontsavaga ntsilihela myenda mwafwisile myenda, na hontsavaga ntsimutamwa mwanamise, na hontsavaga mu nyumba ya wuwopwa mwatsitse kunjendela. 37Ihyo vala wo van'dita kota fyo an'gana Mulungu ho vakumujibula muntsajila kuta, Mutwa, hanili twakuwene una ntsala na kukupela chilyo, na hanili howavaga na ng'alu twakupelye malenga? 38Hanili hotukakuwene uli mujentsi na twakulibulitse, awu hanili howavaga ulihela mwenda tukakufwikaje? 39Hanili hotukakuwene uli mutamwa tukakutamisaje, awu hanili howavaga muwopwa tukatsaje kukujendela? 40Yula Mutwa akuvajibula, Ntsinguvalonjelani wukweli kuta, chila chinu cho mwamuditye yumwe va vang'olotsangu wo vam'bedalwa, mwanditye heni.”
41“Kaha akuvalonjela vala vanu wovali lubali lwake lwa kwichiji, Muheje halutalo hangu henye yo mukotwiche! Mubite ku moto gwa siku tseka go sigutsimikaga, go gwavisilwe kwasawuli ya Lihoka hamwe na vatantsi vake. 42Kwasawuli ntsali na ntsala henye simwamelye chilyo, kaha ntsali na ng'alu henye simwamelye malenga, 43hala hontsali mujentsi simwandibulitse, kaha hotsavaga mutamwa henye simwanamise, na ntsali mu muwopwa henye simwatsitse kunjendela.”
44“Ihyo nawo vakumujibula, Mutwa, hanili ho tukakuwene una ntsala, awu una ng'alu awu wuli mujentsi, awu ulihela myenda, awu mutamwa, awu uli mu wuwopwa, hetwe situkatsitse kukutanga?” 45“Nayo akuvalonjela, Ntsinguvalonjela wukweli kuta, hila fyo mwalemile kumuditila ndongwa itso yumwe va vala yo vabedalwaga, mwalemile kunditila heni. 46Ihyo iwo vakudibulwa ku ng'odeko ya siku tseka tso tsigaya wudugo, lechelelo vala wo vadisile kota fyo an'gana Mulungu vakubita mu wumi wo wugaya wudugo.”
Currently Selected:
Matayo 25: SBV
Highlight
Share
Compare
Copy
Want to have your highlights saved across all your devices? Sign up or sign in
The New Testament in Sagala Language @The Word for The World International and Sagala Language translation. All rights reserved.
