Matayo 14

Chifo cha Yohana Mubatitsi

Maliko 6:14-29; Lukasi 9:7-9

1Chipindi icho muntsajila Helode va ku Galilaya, avaga kuhulika ndongwa tsa Yesu, 2akavalonjelaje vatantsi vake kuta, “Munu yuno yo Yohana mubatitsi atsilipuche, ihyo wuvetso wa Yohana wo wun'dita ndajilo mugati mwake” 3Helode yo avaga amubite Yohana na kumuvika munyumba ya vawopwa kwasawuli ya Helodiya yo avaga mudala va Fwilipo mung'olotse. 4Kwasawuli chila chipindi Yohana avaga angumulonjela Helode kuta, “Siyo finofu heve kumutola mudala va mung'olotso.” 5Helode akaganaga kumukopola Yohana, lechelelo awogopaga vanu, kwasawuli vanu vamutumbaga Yohana kuta avaga Muloli va Mulungu.

6Hoyavaga kufika siku ya liwungo lya kuleleka kwa Helode, muhintsa va Helodiya akawungaje finofu halutalo ha vajentsi. Helode akahechelelaje ndalahela, 7mbaka akilahaje kuta akumupela muhintsa uyo chochive cho akugana. 8Muhintsa uyo avaga adahitswe na yuve hila fyo akumulonjela Helode ihyo akalongaje, “Umele sambi mu luhelo luno mutwi gwa Yohana Mubatitsi.” 9Muntsajila Helodi akakalalaje ndalahela lechelelo kwasawuli ya kwilaha koali ilahite na vajentsi vake wovavaga hala ha liwungo, akalajitsaje kuta apelwe cho an'gana. 10Ihyo Helode akamutumaje mwimilitsi abite munyumba ya vawopwa akamudumule mutwi Yohana. 11Mutwi gwa Yohana gukaletwaje mu luhelo, akapelwaje yula muhintsa, nayo akamusindichilaje yuve. 12Vadahitswa va Yohana vakatsaje kutegula mayiti ga Yohana na kugatsika. Kahi vakabitaje kumulonjela Yesu.

Yesu anguvapela chilyo vanu kulutila elufu tsihanu

Maliko 6:30-44; Lukasi 9:10-17; Yohana 6:1-14

13Yesu hoavaga kuhulika ndongwa tso tsamupasile Yohana akakwinaje mutumbwi na kuwuka, akabitaje hono ho haduhu munu yoyuve. Lechelelo vanu hovavaga kutsela vakahumaje ku miji jawo kwa magulu vakakolaje mulubali lwa lulenga kubita hono hoavaga Yesu. 14Yesu hoavaga kwika mu mutumbwi akavawonaje vanu wolofu, akawawonelaje lusungu, ihyo akavaponetsaje namwa tsawo. 15Hoyavaga kufika mumihe vadahitswa vake vakamufwataje na kumulonjela Yesu, “Hono hano hali mbuga ng'ani na litsuva lihele, lelo uvalaje vanu iva vabite vakigulile chilyo ili valye.” 16Yesu akavalonjelaje, “Sivan'ganika kuwuka, lechelelo mun'ganika henye muvapele filyo.” 17Vene vakamulonjelaje, “Hano hogali mabumunda gahanu na somba tsivili hela.” 18Yesu akavalonjelaje, “Mundetele hano.” 19Akavalonjelaje vanu vikale hasi mu misoli, Yesu akategulaje gala mabumunda gahanu na tsila somba tsivili, akagalamaje Kilanga na kumulumba Mulungu. Kaha akamegasaje gala mabumunda na somba tsila na kuvapela vadahitswa vake, nawo vakavapelaje vanu. 20Vanu veka vakalyaje na kwiguta. Hambele vadahitswa vakaholaje filyo fyo fisije na fikamemaje fitangula kumi na fivili. 21Vanu veka wovalyeye vavaga vafisile valume elufu tsihanu bila kuvavala vadala na vana.

Yesu an'jnda mwilanga mwa malenga

Maliko 6:45-52; Yohana 6:16-21

22Luvalalulo Yesu akavalajitsaje vadahitswa vake vakwine mu mutumbwi kulongola kubita kumwambu gwa lilamba hala mwene hoavaga anguvalaga vanu. 23Yesu hoavaga kusinda kuvalaga vanu akakwinaje kuchidunda kumusuka Mulungu. Akavaje kuko aliyeka mbaka chilo chikafikaje. 24Chipindi icho mutumbwi gwavaga habehi na hagati na gati ha lilamba kuno gun'yugayuga kwasawuli ya mavimbi na ng'ala ngomi.

25Hokwavaga kufika hachilo cha kuvika ntsogolo, Yesu akabitaje kwa vadahitswa vake kuno an'jnda mwilanga mwa malenga. 26Vadahitswa vake ho vavaga kumuwona Yesu an'jenda mwilanga mwa malenga, vakavaje na muhwehwe vakatijilaje kuta, “Ilino Lilayika, vakantsaje kukola kwa muloto.” 27Lechelelo Yesu akavalonjelaje, “Mwikangatse muleche kuva na muloto, yo heni.” 28Petulo akamulonjelaje, “Mutwa, manyi yo heve undajitse ntsitse kwa heve kuno ntsin'jenda mwilanga mwa malenga.” 29Yesu akamulonjelaje, “Ale! Utse.” Ihyo Petulo akikaje mu mutumbwi na kujenda mwilanga mwa malenga na kubita kwa Yesu. 30Lechelelo Petulo hoavaga kuyiwona yila ng'ala ngomi akavaje na muloto, akantsaje kudidimila mu malenga. Akakolaje kuta, “Mutwa ung'uluse!” 31Luvalalulo Yesu akagololaje liwoko lyake akamubataje na kumulonjela, “Heve munya litumbilo lidodo kwasawuli ya chichi wawene muhwehwe?” 32Kahi Yesu na Petulo vakakwinasaje mu mtumbwi na ng'ala yila yikakatukaje. 33Vadahitswa veka wo vavaga mu mutumbwi vakafugamaje na kumuhonamila Yesu na kumulonjela kuta, “Wukweli heve uli mwana va Mulungu.”

Yesu anguvaponetsa vatamwa kuinyi ya Genetsaleti

Maliko 6:53-56

34Hovavaga kulowoka lilamba, vakafikaje ku inyi ya Genetsaleti. 35Vanu va hono hala hovavaga kumuwona, vakamutselaje kuta yo Yesu, vakatagalitsaje ndongwa ku miji jo jilihabehi na hono hala. Nawo vanu vakamuletelaje vatamwa vawo veka, 36nawo vakamugongolaje Yesu avalechele vatamwa vamudometse nambe lupembo lwa mwenda gwake, na veka wo vamudomitse vakaponaje.

Currently Selected:

Matayo 14: SBV

Highlight

Compare

Copy