Matie 27

Abiri Yeso ola Pilate

(Mak 15.1; Luk 23.1-2; Dzã 18.28-32)

1M'epal-epal kwɔɔl, amfam b'angaa-a-Nziã bueel y'akuul-kuul ayɛn Yeso mfoo. 2Bɔ akuru ndɛ ebwal, abiri ndɛ, bu awi ndɛ me mviɔɔl ɛ̃ Pilate wu mfam a Lom ke nsie yi Ayuda.

Yuda olɔ bwel swɛ

(Ɛ̃sa 1.18-19)

3Ŋ'emwɛn Yuda wu átiɔ ndɛ kwɛn awi ndɛ etumbu, ndɛ oswɛɛl ãtsam, bu ayebveel nzi y'ãbvieel ãku-ãtyel (30) oyɔ ol'amfam b'angaa-a-Nziã y'akuul-kuul. 4Ndɛ olieel bɔ ndiri: «Mɛ̃ nsi obi, ŋe ntiɔ mɛ̃ ɔ̃nkinkyam kwɛn abam ndɛ.» Kɛn a bɔ abveel ndɛ bubu: «Obɔ k'otal bee wɛ, otal yam!» 5Yuda otyel nzi onse Nzɔ a Nziã, bu ambal oŋɔ̃. Ke mbee oŋɔ̃, ndɛ oyelɔ bwel swɛ. 6Amfam b'angaa-a-Nziã atwel nzi oyɔ, bu ayɛɛn bubu: «Ãngel k'ãwa bia-byɛ nkuul wɛ yi alɔ nzi yi onse nkab yi abelɔ ãkab. Ke ngwel wɛ, yɔ eli nzi y'ãkel!» 7Ke mbee a k'ekuru bɔ mfoo, me nzi oyɔ, bɔ asuun nguun a mbuul wu abebuo eluɔ m'ɔ̃bwɛɛ, kwɛn mboo oyɔ ekal yi abedziool anzii. 8Obɔ otsɛn bɛn, tiil nonɔ̃ ŋã, abeta nguun oyɔ me «Nguun a ãkel#Ɛ̃sa 1.19.» 9Obobɔ, asi ndɔɔ yi élieel ɔ̃liaal-ɛ̃kiɛɛn a Nziã Yelemi ndiri: «Bɔ awel nzi y'ãbvieel ãku-ãtyel. Ondɛ ɔ̃bvɛn wu ékuru baal b'Isalayel k'afuru me ndɔɔ a ndɛ. 10Bɔ awi yɔ me ndɔɔ yi asuun nguun a mbuul wu abebuo eluɔ m'ɔ̃bwɛɛ, onge b'étam Mfam mɛ̃ osa#Dze 18.1-3; 19.1-2.»

Pilate ofuul Yeso ɛ̃pfuul

(Mak 15.2-5; Luk 23.3-5; Dzã 18.33-38)

11Abiri Yeso ola Pilate wu mfam. Ndɛ ofuul Yeso ndiri: «Yɛ ndyam ɔ̃kwɛn Ayuda li?» Ndɛ obveel ndɛ ndiri: «Yam mbuul wu olieel yɔ.» 12Ke mbee oŋɔ̃, amfam b'angaa-a-Nziã y'akuul-kuul abvi Yeso ofɛn, ndɛ yi abveel pyɛ. 13Obobɔ, Pilate ofuul ndɛ ndiri: «Yɛ k'ayoo ãndɔɔ mbueel m'efɛn bɔ yɛ wɛ?» 14Kɛn a ndɛ k'abveel ndɔɔ si ngamɔ̃ wɛ. Bu esi mfam ɛ̃kam myam bibi.

Awi Yeso etumbu ki epfu

(Mak 15.6-15; Luk 23.13-25; Dzã 18.39–19.16)

15Me pfuun bwɛn a bwɛn li Onduru, mfam ákepaal mbuul a bwal ngɔmɔ̃ wu ékesuaal baal. 16Ŋ'esa oŋɔ̃, me lio olɔ éli ye mbuul a bwal ngɔmɔ̃ wu áli ye nsia, wɛn nkuũ Yeso-Balabas. 17Ŋ'emwɛn Pilate embuul ebvɔɔn, ndɛ ofuul bɔ ndiri: «Wu edzii byɛ kwɛn mɛ̃ mpaal onse bwal nã? Mpaal byɛ Yeso-Balabas wuo mpal byɛ Yeso wu ata me Mãsia?» 18Ke ngwel wɛ, ndɛ áyɛɛ ngesɛ kwɛn bɔ áwi Yeso me mviɔɔl ɛ̃ ndɛ m'ɔ̃kwal nsɔɔ. 19Me lio li ebvi Pilate nsɛn ke mbal, ke mboo yi ebetsiil ndɛ ãndɔɔ, ɔ̃kal a ndɛ oyuɔɔl ndɛ ɔ̃kiɛɛn ndiri: «Oyɛɛ ke sam onse ndɔɔ a mbuul wa dzu wu wɛ. Ke ngwel wɛ, nonɔ̃ ŋã, mɛ̃ mwɛn fool bibi onse ɔ̃tswɛ a twal me ndɔɔ a ndɛ.»

20Kɛn amfam b'angaa-a-Nziã y'akuul-kuul atsɛɛn baal k'asɔɔ kwɛn apaal Balabas, abam Yeso. 21Pilate ofuul bɔ ndiri: «Onse bɔ ange-buaal, wu edzii byɛ kwɛn mɛ̃ mpaal byɛ ndɛ nã?» Bɔ abveel ndiri: «Balabas!» 22Pilate ofuul bɔ bubu: «Ke Yeso wu ata me Mãsia, mɛ̃ ndɛ emã èsa?» Bɔ bueel abveel ndɛ ndiri: «Bɛɛl ndɛ m'enkulusu!» 23Ndɛ bvool ofuul ndiri: «K'obi omã b'esi ndɛ?» Kɛn a bɔ awɛɛl mpɛn m'obiool ndiri: «Bɛɛl ndɛ m'enkulusu!» 24Pilate omwɛn kwɛn ndɛ bvool yi akoo k'abesa pyɛ, kwɛn ŋɛn tsuunga wu abebva kɛn obva, ndɛ owel ãdza, osuɔɔl mviɔɔl ke nkwel embuul, bu alieel bubu: «Epfu e mbuul wu k'etal mɛ̃ wɛ, oyɔ ndɔɔ a byam!» 25Baal bueel abveel ndiri: «Yɔɔl kwɛn ãkel ã ndɛ ãkal nkal ɛ̃tswɛ ɛ̃ bee ye baan a bee!» 26Pilate bu ayɔɔl bɔ Balabas. Ndɛ otam k'abɛɛl Yeso asukɔrɔ#27.26 Asukɔrɔ obɔ, ási bɔ m'ebaan bvi anyam, bvi átsɔɔn ãndaa y'angabwal. , bu awi bɔ ndɛ kwɛn abɛɛl ndɛ m'enkulusu.

Ambwel-mbwel asɔɔl Yeso

(Mak 15.16-20; Dzã 19.2-3)

27Ambwel-mbwel a Pilate abiri Yeso k'ekɔɔ e ndɛ wu mfam, bu alɔ ndɛ kal-a-kal a nkel yi nɛn yi ambwel-mbwel. 28Bɔ ambaal ndɛ ekɔ, bu alaal ndɛ ki bɛ ki abendɔɔl ke ywel. 29Bɔ atuu ekɔrɔ ki okwɛn m'ɛmbɛɛl mi ãnsiɛɛn, bu andɔɔl ndɛ kyɛ nkal a ɔ̃tswɛ. Bɔ hɛ̃ alɔ ndɛ ɔ̃mpaã onse kuɔɔl ki elam. Ke mbee oŋɔ̃, bɔ abvi ãbuo ke nkwel a ndɛ, bu abvi ndɛ osɔɔl ndiri: «Ɔ̃kwɛn a Ayuda, bee ebio yɛ.» 30Bɔ afaan ndɛ ãntɛɛ, awel ɔ̃mbɛɛl, abɛɛl ndɛ ndɛ m'ɔ̃tswɛ. 31Ke mbee a ŋ'esɔɔl-esɔɔl bɔ ndɛ, bɔ ambaal ndɛ ekɔ ki abendɔɔl ke ywel, abveel ndɛ ekɔ e ndɛ, bu abiri ndɛ me ndɔɔ yi ayebɛɛl ndɛ m'enkulusu.

Abɛɛl Yeso m'enkulusu

(Mak 15.21-32; Luk 23.26-43; Dzã 19.17-27)

32Ŋ'epal ambwel-mbwel, bɔ amwɛɛn ye mbuul ngɔmɔ̃ wu ɔ̃fi-Silɛn wɛn nkuũ Simɔ̃. Bɔ bu aywɛɛn ndɛ k'abiri enkulusu e Yeso. 33Ŋ'etɔ bɔ ke mboo ngamɔ̃ yi ata me Ngolongota, ŋ'ayɛɛn ndiri «mboo yi ebiɔ ki ɔ̃tswɛ», 34bɔ awi Yeso mbal a bvine m'alɔ ãsɔɔ ã nkaa#Ãnz 69.22. Kɛn a ŋ'embio ndɛ mɔ̃, ndɛ obee mɔ̃ onywã. 35Ke mbee oŋɔ̃, bɔ abɛɛl ndɛ m'enkulusu, bu akab ekɔ e ndɛ ke mbee a k'eti bɔ bvɛ ebie#Ãnz 22.19. 36Bɔ bu abvi nsɛn oŋɔ̃ me ndɔɔ yi akiaal ndɛ. 37Ke ywel ɔ̃tswɛ a ndɛ, ásuul muaan-ebɛɛ wu ákel ãmpiri m'ã́kewa otsɛn b'áwi ndɛ etumbu. Áswɛn bubu: «Wu-bu Yeso wu ɔ̃kwɛn a Ayuda.» 38Bɔ abɛɛl edzuul bviaal m'enkulusu tsotsoo a ndɛ, kyɛn me kuɔɔl e ndɛ ki elam, kyɛn me kuɔɔl e ndɛ ki ekal#Edz 53.12. 39Baal b'ákebwel áketoo ndɛ, asiɔ ɛ̃tswɛ. 40Bɔ ákeyɛɛn ndiri: «Yɛ akedzii k'atsal nzɔ a Nziã bvool atuu yɔ m'ãtsoo ãtyel. Okɛɛn yɛ li Muaan a Nziã, bvuul nzuru a yɛ yam bvool sool m'enkulusu!» 41Emfa kiki, amfam b'angaa-a-Nziã, y'ayiool b'ãngel, y'akuul-kuul ákesɔɔl ndɛ ndiri: 42«Ndɛ wu akebvuul bakyɛ, k'amekoo k'abvuul nzuru a ndyam wɛ! Ndɛ ndiri ɔ̃kwɛn a Isalayel, k'amesool m'enkulusu kwɛn bia-byɛ ekiool ndɛ ti! 43Ndɛ ati kaã e ndɛ me Nziã. Yɔɔl kwɛn Nziã abvuul ndɛ meba ŋã, okɛɛn ndɛ odzii ndɛ#Ãnz 22.9. Ke ngwel wɛ, ndɛ al'ayɛɛn ndiri: “Mɛ̃ ndi Muaan a Nziã.”» 44Edzuul bvi ábɛɛl m'enkulusu tsotsoo a ndɛ ebvi ndɛ otoo, m'emfa kiki.

Epfu e Yeso

(Mak 15.33-41; Luk 23.44-49; Dzã 19.28-30)

45Bɛɛn tal dzu tiil lio li ãtyel ŋ'emeebwɔɔn lɔ, empeel ebvi m'ɔ̃kiri wueel. 46Ŋ'eyii nku-a-nku a lio li ãtyel, Yeso obiool bam me nkii yi kokɔ ndiri: «Eli, Eli, lama sabakatani?» Ŋ'ayɛɛn ndiri: «Nziã a mɛ̃, Nziã a mɛ̃, otsɛn omã b'eyiri yɛ mɛ̃?» 47Baal bakyɛ b'áli oŋɔ̃, ŋ'eyoo bɔ obobɔ, alieel ndiri: «Ndɛ oŋɔ̃ Eli mbel ata!» 48Ngɔmɔ̃ onse bɔ otsuu ntiin, oyewal epɔ̃dze, oluul kyɛ me mbal a ãŋɛɛ̃, okuru kyɛ me nswɛɛ a ɔ̃mbɛɛl, bu awi Yeso mɔ̃ me ndɔɔ yi anywã. 49Kɛn a bakyɛ alieel ndiri: «Yɔɔl, emetal okɛɛn Eli àyebvuul ndɛ!»

50Yeso bvool obiool me nkii yam yi kokɔ, bu abveel ɔ̃fiaal ola Nziã. 51Me lio olɔ, ekɔ ki enɛn ki onse Nzɔ a Nziã ebɔɔl ebaal bviaal fa ywel tiil nsie. Nsie enziool nzuru, ãnkɔɔn ãbɔɔl. 52Ãmpiɛɛn ãdzweel nzuru, akiool bibi b'ámaakwa asiool. 53Bɔ apal onse ãmpiɛɛn, ke mbee osiool o Yeso, bɔ asam onse Yelusalem, bviil li ngel. Baal bibi amwɛn bɔ. 54Mbiri ambwel-mbwel ɔ̃nkam wa lom y'ambwel-mbwel b'áli oŋɔ̃ me ndɔɔ yi akiaal Yeso, ŋ'emwɛn bɔ k'enziool nsie ye mbueel m'ãbwel, bɔ ayoo buɔ bibi, bvool alieel ndiri: «Taa-taa bam, mbuul wu ali Muaan a Nziã.» 55Akaal bibi áli oŋɔ̃, bɔ áketal ndɛ lala: Bɔ áyi ndɛ osuul fa Ngalile, me ndɔɔ yi asal me ndɔɔ a ndɛ. 56Onse akaal obɔ, éli ye Mali wu ola bo Magadala, ye Mali wu ngoo a Dzak ye Dzedzef, ye ngoo a baan a Dzebede.

Adziool ebiĩ e Yeso

(Mak 15.42-47; Luk 23.50-56; Dzã 19.38-42)

57Ŋ'etɔ ãnkunkwal, mbuul ngɔmɔ̃ wu ɔ̃pfel wɛn nkuũ Dzedzef, ɔ̃fi-bviil li Ayuda li Alimate oyi. Ndɛ hɛ̃ áli ngɔmɔ̃ onse ayio a Yeso. 58Ndɛ oyɛn ola Pilate, osɔɔ ebiĩ e Yeso. Pilate bu atam k'awa ndɛ kyɛ. 59Ndɛ owel ebiĩ, odzii kyɛ onse ekɔ ki enyiɔɔn. 60Ndɛ odziool kyɛ onse mpiɛɛn yi alili yi étsam ndɛ onse ãnkɔɔn me ndɔɔ a ndyam. Ndɛ okeel nkɔɔn yi nɛn k'ɔ̃nywã a mpiɛɛn, bu ayɛn. 61Mali wu ola bo Magadala, ye Mali wumɔ̃ áli me nsɛn oŋɔ̃ nsɔ̃-a-nsɔ̃ a mpiɛɛn.

Ambwel-mbwel akieel mpiɛɛn a Yeso

62Ela esiool, éli tsoo li enɔɔn li awal ɔ̃yɛɛl a saba. Amfam b'angaa-a-Nziã y'Afalisaye abvɔɔn ola Pilate. 63Bɔ alieel ndɛ ndiri: «Mfam, bee eyeel wɛn ŋ'éli mbuul a mfya wu mwiĩ, ndɛ álieel ndiri: “Ke mbee a ãtsoo ãtyel, m'èsiool m'epfu.” 64Oŋɔ̃ yɔɔl kwɛn yɛ yuɔɔl baal ayekiaal mpiɛɛn oyɔ tiil tsoo li ãtyel. Okɛɛn k'obobɔ wɛ, ayio a ndɛ ol'ayeturu ebiĩ e ndɛ, bvool ayɛɛn baal ndiri: “Ndɛ osiool onse b'ákwi.” Mfya yi ãmbee oyɔ ol'enduru yi ɛ̃kwel.» 65Pilate olieel bɔ ndiri: «Byɛ eli y'ambwel-mbwel! Esuul bɔ ayekiaal mpiɛɛn m'emfa ki edzii byɛ!» 66Obobɔ, bɔ ayekyab mpiɛɛn, asi eliĩ me nkɔɔn, bu asuul baal b'akiaal yɔ.

Currently Selected:

Matie 27: ngz

Highlight

Copy

Compare