ACT 2
2
Deusu Itsekegü Etsühügü
1Pentekosi#2.1 50i sigotisü nügü hunguha egei Pentekosi, 50i leha Pasikua igotisüpenginhe egea inhügükilü. Ege igotiha judeuko heke trigo inügü igotisü ailinügükilü cevada ingagüpe gehale. igotisü etimbegoteha, tatute leha Jesuisi nginguhelüko etuhutelü uãke aetsingoi gele ngüne atati. 2Ngikodupinhela leha kahü alüpenginhe ihutsu enhügü unatsüma hite heke kugijüa kotsi hekugu, ihutsu heke leha ngüne hutsukijü tüakandi atamini. 3Ülepei leha ito ahetsu ganingo apakilü inhani tenuhitinhüa, itsaengani leha aetsini ahetsu üntelü tuhugu. 4Tatute leha Jesuisi ikenitinhikope itakuĩjü Deusu Itsekegü heke, etinenünkgo leha telo itaginhui itaginhuko heke, Deusu Itsekegüha sagage tüinikoi egea itsohokoi.
5Jegusalẽiteha uãke judeuko itu itsagü, Deusu ikenitatinhikopeha tatanakilükoi, tetinhükope tuhuguha telo tongopenginhe. 6Tuhutsinhü tagote leha ihekeni, etelüko leha Jesuisi ikenitinhiko geponga, etuhutelüko leha isepongani, kakungakila leha inhünkgo, aetsini leha Jesuisi ikenitinhiko itaginhu talü ateheha ihekeni titaginhuko agage leha. 7Aitsükü leha kuge kuẽko akungakita iheke ĩhugukita gehale, ülepeiha nügü ihekeni tepeheni: "Galileia tongoko benikaha agoi utotokoi egea titaginhundatinhukoi?", nügü leha ihekeni tepeheni. 8"Ungua ekugu nile aetsini kukitaginhuko taholü geleha kupeheni?", ta leha ihekeni. 9"Tetsualü naha kukitagükoi, anginikoha Pahita ngongogu tongo, Meja tongo, Elãu tongo, telokoha Mesopotamia tongo, Judeia tongo, Kapadosia tongo, Pontu tongo, Asia tongo, 10Figija tongoha, Pãfija tongoha, Ejitu tongoha, Libia ngongogu tongo muke gehale tatinhü ete Sigeni gepo. Anginikoha hülotoko tetinhükope Homa tongopenginhe. 11Anginikoha judeuko, teloko gehale judeuko ügühütu ikenitinhi tetimokinhükopeha. Anginikoha Kegeta tongoko, teloko Agabia tongoko tuhugu gehale. Ungua ekunile Deusu ngüipügüha aitsüküngo kae leha itaginhuko tatagü kupeheni, kukitaginhuko hekugu talüa geleha kupeheni?". 12Tatute leha akungakitako iheke, inhalü mukeha ege kĩhugukini ahinhategohotsei, elegindako leha tepeheni: "Ungua nile igei nügü hungu ige hungu itsatohoi?", ta leha ihekeni.
13Teloko heke leha ikijuhitsako: "Etimbatako bekuale egei", ta leha ihekeni.
Petugu Akisü
14Ülepeiha Petugu etikaĩjü aetsingoha hügape Jesuisi Bumipügüko ake, ülepeiha nügü iheke kuge kuẽko heke ige helüi: "Uhisũüdão judeu itagüko, tatute gehale amago indongoko Jegusalẽi tongoko, ukitomi unkgu hõhõ ehekeni kutagüe atsange hekite: 15Ago utotoko etimbatahüngü tsale igei egea ekigatohokoi. Inhalüha kuge indongoko etimbanalüi mitote, 9 hora bena geleha igei gití", Petugu kilü leha ihekeni. 16Deusu akisü ihatinhipeha Joeu ngihatühügüpe tsaha hüle igei titsatinhüi:
17" 'Igeha ungüilüingoi upügüi leha kigotisü telü hataha, Deusu kilüha:
UItsekegü hunkgingenümingoha uheke tatute kugeko kaenga.
Emuguko hekeha uakisü ihanümingo tuhuguha eindisüko heke gehale,
küngako heke leha konitügü ganingo ingilüingo,
haindeneko onituingo leha.
18Ege igotiha UItsekegü hunkginenümingoha uheke ungingokuguko utotoko inha,
ungingokuguko itaõko inha gehale,
uakisü ihanümingo leha ihekeni kugeko inha.
19Kumagihokini hakilüingoha uheke kae kahüa,
kukĩhugukini hakilüingoha uheke ngongoho:
unguha, itoha, gititseha kimüpete gehale aitsükü.
20Gitipe inhümingo leha nhambüai,
tükahisi leha ngunepe inhümingo ungu agage.
Ege hungu inhümingo leha aitsükü Kukanetügü Igotisü#2.20 Kukanetügü hekeha tatute ukugeko ingugikümingo, üle hekeha egei 'Kukanetügü igotisü' tatohoi iheke, ege igotiha Deusu heke kugeko inguginümingo, anginipe telüingoha kahü ati ike, telopeha ito tetsimbükimbüngü hujati leha hüle imbumilüingoi, ege igotiha sagage inhümingo, üle hekeha egei ta iheke. enhügüingo igakaho.
21Akagoha tinhankgilüko ikatinhi hekugu Kukanetügü inha,
inhankgilükoingo leha', egea leha uãke Joeu heke ahehipügü", Petugu kita leha ihekeni.
22Ülepeiha Petugu kita gele ihekeni: Utotoko Isigaeu otomo, kutagüeha ukilü ehekeni. Deusu hekeha uãke tüngaküngipügüi hekuguha Jesuisi Nasage tongo anügü hakilü einhani, itsaeha Deusu heke kĩhugukini tüilü tuhugu, kumagihokini tuhuguha, kakungakini tuhugu gehale uãke eimbataniha inde, tuhuti tsünaha ehekeni. 23Egeaha Jesuisi atühügü Deusu heke leha ingugitühügü leha uãke, uhutühügü gehale. Einhakugulatini leha tunügüingo ingugitühügü leha iheke uãke. Amago hekugu geleha tueni, utoto hesinhüko unügükiha ehekeni ahehikitomiha i tahehingo kaenga. 24Deusu heke leha hüle inguhelü anhapenginhe. Apüngene inhakugulalüpenginheha inhankgilüi, inhalü naha apüngene heke ihetohotsei. 25Davi hekeha uãke Jesuisi kaeha ahehijü igia:
" 'Tipakiha Kukanetügü ingingalü uheke uimünhige,
inhalüha utakungakilüingoi,
uakeha anügü atehe oto inheha.
26Üle ateheha tügekuili uge utehua,
tündakuilinhüha egei uakisü,
uapüngoteha, upenkgegilüingo leha Deusu uẽnügü heke geleha.
27Inhalü naha ungondilüingoi eheke
anhako huja,
tipaki geleha ugitaminalü akaeha
üle ateheha inhalü uikihügü tunümingoi eheke inhetitomi.
28Ege geleha uinguheni tipaki gele tingugi hekugu kutsoho imagü engagüki,
atsaga leha uinhügü heke aitsükü ugekuitügijüingo', egeaha uãke Davi heke Jesuisi kaengo ahehijü", Petugu kita leha ihekeni.
29Petugu kita geleha aitsükü: "Uhisũüdão", nügüha iheke. "Hekite hekuguha kungaumpügü kuẽgüko Davi heke ihanügüti uitsagü. Üngeleha anetüpe apüngu leha uãke onginügü leha ülepene, ongindühügü imütü geleha ãde kigüani. 30Deusu Akisü ihatinhipeha ekisei, Deusu kipügüha tititü kae hekuguha ihigü kuẽgü hujalüpe aetsingope akanümingo leha, uhutagü leha uãke iheke. 31Davi heke leha uãke Deusu ngüilüingo uhutagü, üle ateheha nügüha uãke iheke Deusu Ngaküngipügü#2.31 Jesuisi hekeha egei ta iheke Deusu Ngaküngipügü tatohoi iheke. etinguhelüingo kae. Igiaha nügü iheke:
"Inhalüha inhondilüi anhahütüte,
inhalü mukeha ihüpe ẽtilüi kongidohote", nügüha uãke iheke. 32Deusu hekeha Jesuisi inguhepügü anhapenginhe, egeaha inhügü inginimbüngüha tsihugei. 33Tinapatsaiha tinginhüpeha ekisei Jesuisi, Deusu hekeha tüilü tügeponga aitsüküngona oto inhe kahü ati, Isũüha, ekiseha TüItsekegü tundinhimbüngüha inha, ihatatühügüa tsũhügüi uãke. Jesuisi heke leha Deusu Itsekegü hunkgigenügü kukaengani igei tsüha engingitakoi ãde andatakoi gehale aki. 34Inhalü naha hüle uãke Davi itükanhenügüi kahüati Jesuisi atühügüa, igiaha Davi kilü Deusu Ngaküngipügü kae:
" 'Kukanetügü Deusu kilüha Uanetügü#2.34 Jesuisi hekeha egei "Uanetügü heke" tatohoi iheke. heke:
Akankgeha ina ugeponga uoto inhe,
35aetsingoiha eimütongo tüilü hata uheke atapügü ohinhati', egeaha uãke Davi heke ahehijü", Petugu kita ihekeni.
36Üle ateheha, tatute amago ukugeko Isigaeu otomo, ingitüeha, ekiseha embepügüko i tahehingo kaenga, Deusu heke leha tüilü Kukanetügüi Tüngaküngipügüi gehale".
37Kugeko heke leha Petugu akisü talütseingugi, ületseingugi eku leha kigitaila inhünkgo, sulegükoiha anügü atehe etuhunünkgo leha. Ülepei leha ijeginügü ihekeni Petugu inha teloko Jesuisi Bumipügüko inha gehale: "Uhisũüdão", nügüha ihekeni. "Unguama hüle tsihinhügü?", ta leha ihekeni.
38Ülepeiha Petugu heke itüjüko: "Otõtüeha aetsini amago hesinhü tüigatühügüpe kae ehekeni, batisaiha eüitamini Jesuisi Cristo ititü inhahetungu kaeha, hesinhüiha engüigatühügükope titsomiha Deusu heke, egea leha Deusu Itsekegü enhümingo einhani. 39Tihatinhüpe naha igei einhani, elimoko inhaha, tatute gehale teloko hakingoko inha tuhugu gehale, engüha, akago inhaha Kukanetügü KuDeususüko itsoho ingenünkgoti ikenitinhi itsokomi".
40Petugu kilü gehale aitsükü telo akiki, isakihagokomiha iheke. Igiaha nügükilü iheke ihekeni: "Deusu inhaha ahetinhombalüko engikatüe, eitamitüinginiha iheke agoha kuge hesinhügüko Jesuisi õgatinhimbüngüko agage!" 41Ülepei leha kaküngi kugeko heke Petugu akisü ikeninügü, batisai tuhugu leha tüitako tuãki. Üle igotiha uãke latsi hekuguha 3.000i isaküngindu ukugeko epünenügü leha Jesuisi ikenitinhi.
Jesuisi Ikenitinhiko Ügühütu
42Jesuisi Bumipügüko heke inguhegatühügüko ikenitagü geleha ihekeni. Tipaki geleha etuhutengalüko tikongoko Jesuisi ikenitinhiko ake, pão ikumenügü tüilü inhaha, tipakiha itaginhunalüko Deusu ake. 43Jesuisi Bumipügüko hekeha uãke kaküngi ngiko tüitagü kĩhugukini kumagihokini gehale, üle ateheha tatute kugeko heke itsangi Deusu ingitagü. 44Tatuteha uãke Jesuisi ikenitinhiko tatakitini, tipaki geleha inhalüko gipugukaki, tetinhani leha tüengikogukope akenügükilü ihekeni. 45Anginiko heke leha tüngongogukope igatelükilü tüengikogukope muke gehale, tinheguha inhigatepügüko ihipügüpe ikumenalü leha ihekeni tahetinhombalü tatoko inha. 46Tipaki geleha igotindenea inhügükokilü gipugukaki Ngüne Aitsüküngo Deusu Aitügitsoho üngataho. Pão ikumenügü tüilükilüha ihekeni tüngahini, etinhambalükokilü leha aetsingoi tügekuili tatakitini leha itsako. 47Hekite leha ta ihekeni Deusu heke ailikügüi, aitsükü gehale kugeko akiti leha itsako. Tipaki leha igotindenea Jesuisi Kukanetügü heke tinhankgilüko hokongo hunetagü.
© Associação Linguistica Evangélica Missionária