Luka 14
14
Yesu ku gbiã Afalusi yò
1Lago sabatu#14:1 sabatu Gu ulu Mbäli akpálá ha tɨpa ko kifʉ he ni ulu ongoda fu Ayuda. sã, Yesu andʉ ku gbiã Afalusi yò kali liahẽ. Agu Afalusi nadʉ hõ ǎkpalia ko. 2I ngele, kʉmba sã adʉ yò kpotoko adʉ bamutubamutu be kaza ime. 3Yesu kituka ngbako kinyã fu abäyugu andikä na Afalusi: «Nyã mo si nalengba kahusa bolo be kaza lago sabatu watadu te?» 4Ono ka i akalaga nga pai ya. Wele, Yesu kizädi gu bolo kaza le, kihusi ko, kifʉ gene fu ko kʉ ga. 5Fuä hä kʉ kinyã fu yo: «Gini bolo dagba loni ka wilini watadu gäni bagala ni bala ti ku due yò ka ni akʉsa lu nibasã ya lago sabatu?» 6Ono ka i alengba nga kakalaga pai kuti ni ya.
Pa sia básungä ba pumbä yò
7Yesu kiyǎbi ägu abolo i ayämbu yo i nisia aba ilisä, kʉ kipe gii fula yò sã fu yo kinyã: 8«Ka bolo yämbu lo ku logo pumbä logatise, ka mʉ ndʉ nga sungä lii gu bá dʉ mbatayò ya. Mʉ ainä wäli ya i ima yamba kula bolo kiĩ päni susi lo. 9Gu bolo náyämbu loni ti bala loni uwe ayee kanyã folo: ‹Mʉ́ guali lii gi ba le fu gi bolo le.› Wele, mʉ adʉ na zeẽ kandʉ kasungä lii yangada bá! 10Ono gu legbo yämbu yo lo, mʉ ndʉ kasungä lii yangada bá. Hõ gu bolo náyämbu lo kada ni, ní anyã folo: ‹Bakʉle, mʉ ndʉ kasungä lii gu bá dʉ mbatayò.› Wele, si adʉ ni ilisä folo bängili ägu abolo dundukä nikadʉ bá li liahẽ yò wasã na mo. 11Bämbikä gu bolo nakiĩsä pa tini, i aumbäsi päni, gu ni naumbäsi pa tini, i atʉmba päni.»
12Fuä hä, kʉ kinyã fu gu bolo náyämbu ko: «Ka mʉ yämbu abolo sa liahẽ bebele ulu si ngia nyämu, ka mʉ yämbu ngä kina abakʉleamʉ, kina awilinamʉ, kina agumelo watadu ägu amulakpolo nga abolo kumukä ya. Bämbikä i â tigäyo, i ayamba lo kigäsi gu pai folo mʉ amängi he. 13Ono tie, hõ mʉ amanga pumbä ni, mʉ yämbu abolo lungä, abolo ngbälämäni, käfukäfu ndʉ abolo gbiã kuti abolo vuläli. 14Mʉ adʉ na ngbalago bämbikä i na hẽ kagasa ha folo te. Si ayägä folo hõ lulu abolo kazinga ni be kpio.»
Gii fula yò lii pa bakele pumbä
(Matayo 22:1-10)
15Fuä giã agi afula le, bolo sã dagba ägu yo nadʉ ba ligo yò kinyã fu Yesu: «Ngbalago fu gu bolo nikali pumbä logo ga Mbäli kindä!» 16Yesu kigalaga ha fu ko kinyã: «Kʉmba sã amängi bakele pumbä kiyämbu badʉngu abolo sani. 17Ti legbo liahẽ, kʉ kikedi gako bolosʉnge tɨpa nyã fu ägu abolo kʉ ayämbu yo: ‹Óni yée bämbikä apai dundukä ima lengba.› 18Ono ägu abolo le ni basã sã kitona salawa tiyo. Bambata ni kinyã fu ko: ‹Mi ngbe binä. Si naida mi ndʉ käbi he. Mi nazungädi lo, mʉ hi pai fele.› 19Gu kula ni kinyã: ‹Mi ngbe abagala bawe (10) tɨpa sopa binä. Mi nandʉ kaásada la. Mi nazungädi lo, mʉ hi pai fele.› 20Gu kula ni belewe kinyã: ‹Mi di dee kina awele. Sidu ka mi yée ngä te.› 21Bolosʉnge kiyǎyägä, kʉ kitangalã ägi apai le dundukä fu baɨlako. Wele, baɨla kpolo kizingi, kinyã fu gako bolosʉnge: ‹Mʉ́ ndʉ ni ipä logo abádʉngulã tise na ngba agene vulu gbata kiyee ku elẽ na abolo lungä, ägu abolo dʉ na käfukäfu ndʉyo, abolo vuläli na gbälĩgbälĩ abolo.› 22Fuä bete legbo, bolosʉnge kiyee kanyã: ‹Baɨla, mi ima manga gu pai mʉ nipe he. Ono bá gu dʉ nga adʉ belewe.› 23Baɨla kinyã tie fu bolosʉnge: ‹Mʉ ndʉ ngba agene na pangba aäti, mʉ mängi ʉme áboló limi tɨpa gimi bämbu hĩ ahĩ. 24Bämbikä mi nápe he fu loni, bolo sã te dagba ägu yo i ayämbu yo ngbatʉnga gimi liahẽ nikada ngbäni yò.›»
Pa dʉ ni ga Yesu bawiliki
(Matayo 10:37-38)
25Bakele alimbasa abolo ǎndʉ wasã na Yesu. Kʉ kisa tiko kinyã fu yo: 26«Ka bolo yée kapeka fuä le ono ka ni aida nga na mi susi bäni, susi näni, susi diäni, susi awilini, susi awilinäni, susi adäwilini, susi zavula gäni ndikili bata ya, ni alengba kadʉ ni gimi bawiliki te. 27Gu bolo aáká nga gäni wägiwägingwa ngwa kipeke fuäle ya, ka ni dʉ nga ni gimi bawiliki te. 28Da dágbá loni kaidi kadua bagbanga bämbu ka ni asungä ngä mbatano kawisigä pa ägu ahẽ si nikaida na ni ya? Ka ni sungä ngä käbi he si ngia ni adʉ na falanga gbẽ tɨpa kanyasa ha ya? 29Ka si adʉ nga wo ya, nikima mbulu bämbu zanga lengba kanyasa ha, ägu abolo dundukä nikabi he, i atona mama ni 30ninyã: ‹I bi gi kʉmba le náenge dʉa bämbu, ono kʉ alengba nga kanyasa ha te!› 31Watadu, ka bäkindä sã dʉ na asuda kútu bawe (10.000) tɨpa kandʉ kaso vʉla kuti gu kula bäkindä. Ni asungä ngä mbatano kawisigä hä si ngia ni lengbe kaso vʉla kuti gu bäkindä nayee na vʉla sa ni na asuda kútu uwe bawe (20.000) te? 32Ka ni ǎlengba nga ya, ni akeda amokedi fuä gu bäkindä nayee ti gu legbo dʉ ni ni kindi tutũlũ kahõ zeleda. 33Si awo tɨpa loni. Gu bolo dagba loni ámbu nga gäni ahẽ dundukä ya, ka ni dʉ nga ni gimi bawiliki te.
Kpia pai lii pa tikpo
(Matayo 5:13; Malako 9:50)
34Tikpo ni wene hẽ. Ono ka hĩã hã nyäsi logo ho, i lengbe kagasa hĩã hã fu he belewe waĩ? 35Si na sʉnge fu sende te, si na sunge fu nduka â te. Si lengbe i ya be tini. Gu bolo dʉ na tu giã pai, ni gĩ he!»
Currently Selected:
Luka 14: ZNE
Highlight
Copy
Compare
Share
Want to have your highlights saved across all your devices? Sign up or sign in
2025 Centre Interconfessionnel de la Traduction de la Bible et d'Alphabétisation
