Tito 3
3
Njaji sheepacaperri narsutsa naumaca nanaitjaca ljiaji matsiadali apana irsu
1Piwaopiatsakja picaiteca narsu njaji sheepacaperri neepacarru talricanati yaacu njite cacunaperri tsakja, pumenacarru-tsakjana caidalritsa nanaitjacarru ljiaji matsiadalri. 2Curricarro cacu maashina apada inacu, naufacarruwa merruatsa, matsiacarruna napiyawaca, njite nacañatacacarruwa kjenaperrishutsa narsu pjiumi njaji apana.
3Ima apapiapia jalredauca maanjicaperripiacatsa faa njite mjeepecaperritsa; manalreperripiaca faa njite lripapipia faa pjiumi ljiaji matsidalri wawaopiakje upidalrim icadalri wanaitjaca. Waufaapiava wamatsicanalricu njite ikemikjetirricu, maashipia wacapacacao waapiyawaca. 4Micatsa ljiaji wa-Dioste Iyumjetacaita faa lricañjata warsu ljiaji lrimachiaca njite cuanca lripeyuca faa pjiumi, 5njite lricadaapia warsu ljiaji yumjecai curricadana wanaitjamitsa matsia, kjenaacapua lricapaca warsu lripecu wauya wamatsicana, lricadaa walridalri wacaolrewa, njite lricadaca warsu walridalri wawaopiakje Espíritu Santo shu. 6Ljiaji lricadaalri jurre yufaaca wanacu lrinakjuite ljiaji Jesucristo Iyumjetacaita faa, 7Dios inaitjaca cayu wataitacarruatsa mamashicanaperrica faa lripjeyalje njite warsucarruatsa ljiaji jalredauca mawayacacadalri.
8Yaacuti ajadalrica ljiaji, njite numa picaitepjaca kjaidani, nanaitjacarrupjawatsa matsia njaji sheepacaperri Dios yacu. Matsiadalri icanantacakjetica ljiaji njite canacaidalricani pjiumi warsu. 9Mitsa pimaudaca lriuya ljiaji nacaitependa midalritsa njite mjemitsa ljiaji midalritsa nanacuapanna njaji naferrinaipe njite lriuyatsakja ljiaji Moisés idanandapia ljiaji cacuperrina ikjaote. Ima ljiaji caidalri midalricatsani, curridalritsa cuadaca.
10Ninicada apada icadacada njeenitaca nauyawaca, piwana picaiteni papia u yamapia; mitsa curricada ljiepa, shenita yuuyaoni, 11ima njaji cayuperriji waajintsa teeculjecana lriuya ljiaji ajadalri njite ljiatsa ljiaji namachicana ljirrapjitetana.
Yaacuti Tito irsuwalre
12Numenacacadana-cuenautsa piikjaolre Artemas o Tíquico-cada pikjeyatautsa pinucarruatsa picapaca nuikjaolre aji yacalre Nicópolirriculje, ima nirsecautsa nua njuyapeta uunia. 13Pikitsindatautsa matsia piinaiwa pjiumi nacu pitaitacawa ljiaji Zenas yaajicada ley-nacu njite ljiaji Apolos naacadanacuenautsawa, wadeewatsa canaica narsu cucacan. 14Njitepjatsakja picananta njaji wakitsiñape, naajicarru nanaitjaca matsia nakitsindatarru njaji kjenaperri; wadeewatsa mikjapanpericatsa yuufacawa.
15Memoriena pirsu pjiumi njaji aapeeri nuinai. Pinaitjautsa matsiacalri picaiteutsa numemorian narsu njaji wakitsiñape sheepaca. Wa-Dioste watsa icadaa lrimatsiaca inacu pjiumi.
Currently Selected:
Tito 3: kpc
Highlight
Copy
Compare
Share
Want to have your highlights saved across all your devices? Sign up or sign in
© 2025 CLAN
© 2025 Seed Company