Santiago 2
2
Santiago icaitena wadee napeyuca apadapenatsa
1Shaa nukitsiñape, icadacape icaulreo lrinacu ljiaji matsíadalri Waminalri Jesucristo, mapeyutsa apadapenatsa apetsida yuya. 2-3Iwaopia cayuntjaji, apada cananidalri yuucantja iwaketacacadanacua lricapirru uwirruda yapiya njite lritsayan cacuadadalri tsakja, icuadatantja matsiani njite icaitentja lrirsu: —"Pjiewawa, piufacarruwa matsiawerricu" njite ljiadanacutsakja lriucao ljiaji kjenadalri litsayani upiperrimitsa yapiya, njite ljiaji icaitentja lirsu cayuji: —"Pjia aamitsa piemawarra o piufacadaatsakjawa jiipairricu". 4Inaitjacada cayuji, icatsa icañataca nacapa iwaopiaca matsiaperripjaca njaji cayarruperri nauya njaji kjenaperri, lrideecapua shaa ljiaji iwaopikje maashidalri.
5Nukitsiñape nupeyunipe, jimi ljiaji: Dios iniwananpeca njaji kjenaperri aji jalredaucalricu lrienipecarruatsana, narsucarruatsa nayaadao Dios iinai lriyacalerriculje njite naufacarruatsa lriinai aji lritalricanatalriutsa nirse caiji lricaitecapishu narsu naji ipeyucapeni. 6Mitsa shaa imacuadataca njaji kjenaperrim. ¿Capja currica yaji icacatsa icuitetacapeca shaa njaji cananiperri, njite nadee shaa jiidatirricu nacaitecarru yacunao talricanati irsu lirrapjietacarru sha? 7¿Capja currica njaacatsa ljiaji cacuperri maashi lriipitana matsiadalri-nacu ljiaji Waminalri Jesucristo?
8Inaitjenina matsia, inaitjacadaa cayuji lricaitecapisho ljiaji yacuti Dios inanda panaitjaca canacaidalripja, lricaitecawa warsu cayuji: "Pipeyu ljiaji pikitsinda caiji pipeyuacacapishuwa pjiwacatsa"#Lv 19:18. 9Mitsa ipeyucadaa apadapenatsa apestida yuya, inaitjaca maashi njite camashicanaperri watsa shaa curricapua inaitja caiji lrinaacapishu ljiaji yacuti Dios inanda panaitjaca canacaidalripja 10Ima apada inaitjacada pjiumi cai linaacapishu ljiaji yacuti Dios inanda panaitjaca, mitsa lrimatadacadaa apada lrinakjuite, caicautsaniji curricapishu ljiepa pjiumi caiji lricaitecapishu. 11Ima ljiatsa ljiaji Dios lricaite cayuji: "Manaitja maashi pidakishu piinirri yuya o piinu yuya", lricaitetsakja cayuji: "Mainutsa inaiki"#Ex 20:13-14; Dt 5:17-18, niini, curricadatja apada inaitja maashi lridakishu, mitsa lrinucadekjenakja inaiki, uupina lrimjepata ljiaji yaacuti. 12Ljiaji yacuti Dios inanda pjepaca, iwatacalri shaa mashirri yuya icaiterriwatsa yacuna papia jalredauca. Caishupa irsutsa cacuca shaa njite yuufatsakja matsia lrinacu 13Ima njaji curriperri kjena icapaca apaana, curritsakjaotsa kjenaa Dios icapaca narsu lricaitecadanacuatsa naacuna, mitsa njaji kjenaperri icapaca apaana matsiawatsa namutucao lricaitecadanacuatsa naacuna.
Icañata nacapa icadaca icaolreo ajadalri lishu ljiaji inaitjali matsia
14Nukitsiñape, ¿cuca lricuada irsu ljiaji icaiteca icadaca icaolre ajadalri curridana ideji matsia icañatacarruni? ¿Capja iwada lriyumjetacautsa sha ljiaji caicada icadaca icaoleo Dios-nacu? 15Ninicadantja aape pakitsinda o pakitsidua curriperri irsu nananiu, naiñaotsakja jalredauca icuam icaoyanada; 16njite apada inaikjuite icaite narsu: —"Warsena yaawa matsia, jieta inani inacua njite iñja matsia cucacatsa yuma", ¿cuca lricuada narsu ljiaji caica lriacu narsu curricadana lria narsu ljiaji canaicadalri nadaki icaoyanada? 17Caishakja lrinacu ljiaji pacadaca pacauleo Dios-nacu: curricada inaitja matsia icañatacarru nacapa, mikjapanperricatsa caiji mayamicapishu cucaidacan.
18Apada icaitecadaa: —"Pjia picadenica picaolreo Dios-nacu, njite njua nunaitjenina matsia. ¿Cuajiwatsa picadaca nucapa picadaca icaoleo Dios-nacu curricadana pinaitja matsia? Mitsa njua nucañatautsa picapa nucadaca nucaolreo Dios-ancu lrishu ljiaji nunaitjalri". 19Pjiepacadaa apadacatsa ljiaji Dios, matsialri pjiepaca cayu; mitsa njaji icaolretim mashiperri njeepatsakja cayucani, njite natetjecao nafiucapua lriiwana. 20Mamajicantsa pjia. Pirsumitsa pjiepaca miikjapancatsa ljiaji picadacada picaoleo Dios-nacu curricadana pinaitja matsia. 21Inaitacada mayacan Dios icapaca ljiaji fanirrim Abraham lrinakjuite ljiaji lrinaitjalri lricadacadanacu mamjetacanatsa ljiaji lrienipe Isaac mayamicarrutjan.#Gn 22:1-14 22Lrishu ljiaji lrinaitjalri, Abraham icadaca wacapaca lricadaca lricaolreo ajadalri Dios-nacu, njite linaitjanda ima kjaidaapja lricadaaca lricaolreo Dios inacu. 23Cayupia lricadaca waaji, ajadalrica ljiaji nadanalripia Dios yaacu-nacu, nacaitecawa lrinacu: —"Abraham icadapia icaolreo lrinacu ljiaji Dios icaiterri lirsu, nini caishupa lricapacani matsiadalrican"#Gn 15:6 lrikjaote najicani Dios ikitsindaji.
24Cayuena icapacapishuena, Dios icuadata faa lrima ljiaji wanaitjalri currim lrimacatsantja ljiaji wacadacapua wacaoleo Dios-nacu. 25Caitsakja ruyapacapishuwa rsuaji cawilredarrum Rahab; Dios icuadatanu lrima ljiaji runaitjalri, rucuadatacapua njite rudawacapua naicao njaji ideecape yaacuti njite rukitsindana napitucarrua paakja inipulicu.#Jos 2:1-21; 6:17 26Ima caiji midalricapishutsa ljiaji padaki mayamicada pacaafica liuya caitsakja midalricatsa ljiaji pacadaca pacaole Dios-nacu curricadana panaitja matsia, caicaniji mayamicapishu cucaidacatsan.
Currently Selected:
Santiago 2: kpc
Highlight
Copy
Compare
Share
Want to have your highlights saved across all your devices? Sign up or sign in
© 2025 CLAN
© 2025 Seed Company