Afyisuyi 5
5
1Ntucenu, fye vyi Shekwoyi ɓədogbe, ngye aɓyi ayeyeyi 2fya znazna fyi n yeye, n ɓwasnu shi Kirisiti ɓə ye yi wa ga əwohni tukwo ntu əyi ɓo n zhni nyaga snidaí jesnu nyagbmi ga Shekwoyi.
3Ama fyi n əfye, a to wo asisiɓozhni kwo n liya m, kwo aɓoajegbmi ho pya, kwo fnana m, ntuge aɓo ye to gwogwolo n Shekwoyi aza gyigyiyii m. 4Kwo acegyeɓəzhni, n ɓəda tnatukwogyii, kwo aɓocící, ɓa to fyilo n zokwo m, ama kwo du ya ga Shekwoyi amisa nu.
5Ntu ɓəye ɓo, fye ɓa kpəge: asisiɓozhniyi ntnagyiyi kwo əza n wo n əwyei, əza yi pya zhni shnagbayi nu, wo to n əgwúi lo dna n Kirisiti əbemi n Shekwoyi nyai m. 6Fye to ye əzaho wa dna fye kwoce n aɓədagbma agbəloii m, ntu aɓo ye ɓo nù n Shekwoyi minagyi napyei ɓe kpe n aza yi n ɓa ta vyi ɓəgbetu nyi m. 7Ntucenu fye to dnaɓwado n əɓai m.
8Ntuge fye ɓə zhni wyegbma nu dna nsaho, ama nsaiye fye zhni bwuznagna nu dna ń Dagayi. Fye gyianyì ngye bwuznagna aɓyi. 9(Ntuge gyigyiga bwuznagna nya kwo zhni ɓəmanai nu vnyanya, ɓəfyecezhni n gaiciyanunui). 10Nlonu fye zna əɓo shni n əkwo ɓó da Dagayi. 11Fye to dnaɓwa n wyegbma atnutnu gbəloi m, ama fye kpmi ɓa anya ya wu pəipəi. 12Kwo zhni əɓo vnyinkwo nya nu kwo a sa ɓəye pya ye ń atnaɓəgbetuvyiyi zhni fyi n ɓwiɓwi. 13Ama nyahonyahoi n bwuznagna la fnukpe n kwo a ɓa gye kwo əwye, 14jesnu nyahonyahoi n bwuznagna la knaya kpe n kwo, kwo la zè bwuznagna. Cenuzhni ai gna:
“Gyewnayi, la kwnúagyewyi,
la laka n əfyí,
Kirisiti ɓa fnukpe n ho.”
15Fye zhni pəceye dəidəi shi fye gyianyì nsaiye, toge ngye atna-ceceyi m, ama ngye aza aceceyi, 16fyei zhni apma n əsa dəhodəhoi n fya ɓwa, ntuge anyipyei ye zhni anukwoi nu. 17Ntucenu fye to kwu zhni amama m, ama fye ɓwa awyega əɓo n kwo zhni Dagayi ɓəye. 18Fye to sni anamnuwna m, n kwo dna əza ɓənukwoizhni nyi m. N əkwoɓwi fye kwu nu n Zafnui, 19fye daɓo n ajei n anyiásásayii, anyíciciyii jesnu n anyii n ɓa kwnu n Zafnu. Fye kwoanyi fyei gyianya n ɓa kwnu n əfye abwugba ga Dagayi, 20fyei ga Shekwoyi Dada amisa ciici, ntu nyahonyahoi ɓo, dna ń əyi Dagayi Yeisu Kirisiti əye.
Agbega ntu Kirisitiavyiyi apwuwa ɓo
21Fye kwu əfyehni ga aje, ntu Kirisiti mwamwaga ɓo.
22Anyikwo anusei, fye kwu əfyehni ga əfyehnii aɓá shi fye ga Dagayi nyi. 23Ntuge əɓá nu zhni əwo nyikwo tukwo, ngye shi Kirisiti nu zhni ikilisiya tukwo nyi, əwo nayi, n əwo nu zhni əkwo Gnyiyi nyi. 24Nsaiye shi ikilisiya n kwohnii ga Kirisiti nyi, nlonu ce n anyikwo anusei ɓa ɓa kwu əɓahni ga fyi n əɓa aɓá akwnu n ɓəhoɓəhoi.
25Aɓá, fye ye ǹ əfye anyikwoi, n ɓwasnu shi Kirisiti ɓə ye n ikilisiyai nyi, wa ga əwohni tukwo ntu kwo ɓo, 26waa kwo zè gyigyiyi, woi pmya kwo, dna n zhnazhna n nuwna Shekwoyi ɓədagbma nyai, 27jesnu wa ɓe n woi n əwohni aba, ngye ikilisiya bmyabmyai, ntna cegye kwo abwi dəhodəhoi, kwo ɓətui, ama n gyigyiyi jesnu ntnaɓətu. 28N ɓwasnu nlai nu, n aɓá gwo ɓa ye n əɓa anyikwoi ngye əɓahni anayi. Əza n wo ye n əwo nyikwoi, wo ye əwohni nu. 29Nshnisnusnu, əzaho to lo n wo wnu əwohni nayi nu m, ama wo ga nyagyi woi wna kwo akna n ɓwasnu shi Kirisiti wna ikilisiya akna nyi, 30ntuge yi zhni əwo nayi aga nu. 31“Ntu dəye ɓo, zanugbayi ɓa fa əwo dada n əwo əyai jesnu wa nyima əwo nyikwo, jesnu əɓa ngwnu-aba ɓa ɓə kwu zè nayi gbmanyi” 32Dəye nu zhni asigyi kpokəloi, ama mi daɓo tu n Kirisiti ɓo nu n ikilisiyai. 33Dudulonu, ɓəshishi nu zahozahoyi wa ye n əwo nyikwoi ngye shi wo ye əwohni, njesnu ɓəshishi nu nyikwo wa ga əwo əɓá mwamwa.
Currently Selected:
Afyisuyi 5: GNB
Highlight
Copy
Compare
Share
Want to have your highlights saved across all your devices? Sign up or sign in
Gbagyi Nyizeyenya Baibwulu: Shekwoyi Ɓədagbma™, Ɓəgbeshì Woiwoyi
© 1997, 2025 Biblica, Inc.
Apmazhni n gbegai nu. Ɓəznu vnyanya wnafyi lo n anyìvnyanya.
Gbagyi Contemporary Bible™, New Testament
Copyright © 1997, 2025 by Biblica, Inc.
Used with permission. All rights reserved worldwide.