Afyisuyi 3
3
Shekwoyi ɓəmwushi manai ntu n Abyedo ɓo
1Ntu ɓəye ɓo əmi, Bwulus, mi dna n zhalu da Kirisiti Yeisu ɓo nu, ntu əfye Abyedo ɓo.
2Ɓəhnihni, fye kwu Shekwoyi shebmyashi aɓəfyekpe ɓo wo, n a ɓə ga mi ntu əfye ɓo nyi, 3əkwo nu zhni asigyi ń a ɓə wu mi ɓa n ɓəwyegye, ngye shi mi ɓə kwu shnika ga fye fyewyi nyi. 4Shi fye ba dəye, nlonu nu n fye ɓa myi fya ɓwa gənyikpe əmi awyega Kirisiti asigyi nya, 5ədo n a to ɓə wu aza kwo n acala aje m, ngye shi Zafnu wo la kwo kpeyawu Shekwoyi atnutnuloyi agyigyiyi ɓədo n sheaɓəgwognayi nsaiye nyi m. 6Asigyiyi ye əɓa nu ge, dna n nabagyi manai, Abyedo ɓa kwu zhni abeɓyi ɓədo n Israilayi, aza n ɓa kwnufyi n nayi gbmanyi, jesnu aza n ɓa kwnu ɓəgbeshi gwo fyi n Kirisiti Yeisu.
7Mi ɓə la zè nabagyi manai ye tnutnuyi ntu Shekwoyi shebmyashi nyaga ɓo, ń wo ɓə ga mi dna ń tńutńuzhni əwo kalá nya. 8Kwo shikwonyi əmi nu gnagbagbai lo dna n Shekwoyi aza vnyanya, a ɓə la shebmyashi ye ga mi: ma zhni waazi ga Abyedo, Kirisiti nyaɓwa ń a taa myi a zo kwo ɓəyekpe vnyanya m, 9jesnu ma kwu asigyi ye aɓəfyekpe wu zahozahoyi pəipəi, ədo n a ɓə ncei sodna n Shekwoyi, n aye bəgye n ɓa la duya nyi, n wo ɓə zhni anya vnyanya nyi. 10Əwo ɓəmwi nu ɓə nyi ge nsaiye, dna n ikilisiya, a ɓa wú Shekwoyi wyemwa loloi ń abegyiyi aba, ɓədo n aikwodai fyi n ashebmana, 11kwoi vyi əwo ɓəmwi nyalonyalo nya, n wo ɓə kwu kwo nu dna n Kirisiti Yeisu, əyi Dagayi. 12Dna n wo jesnu dna n gaiciyaga n wo, yi ɓa myi ya yegwu Shekwoyi n loloyai jesnu n agwumyii. 13Ntucenu, mi gna fye nge, fye to bmabwugba ntu azhnìgye ɓo n mi gye n əfye ɓo m, ɓa zhni əfye latu nu.
Aduwazhni ntu n Afyisuyi ɓo
14Ntu dəye ɓo, mi ceakwokwo shi nyi n Dada abye, 15aba n pwuwa dəhodəhoi n əshemi ɓədo n anyii ɓwa əkwo əye. 16Mi zhniaduwa ge, dna n əwo nyaɓwa latu nya, n wo ɓa kwu fye myizhi dna n ikwo əwo Zafnu nya n əfye adu n miimì, 17nabai n Kirisiti ɓaa sase dna n əfye adu dna n gaiciyaga. Mi je aduwazhni nge fya kwu myizhi n agbegyei myimyii dna n yeye, 18fya myi fya ɓwa kalá, n kwnusnu n Dagayi aza agyigyiyii vnyanya, fya kpe ngye shi Kirisiti yeye nsnu lo ń pata, n kpaai, n asnayii jesnu she kwo loloi lo nsnu, 19jesnu fya kpe yeye ye n kwo du ɓəyekpe tu; nabai n fye ɓa myi fya kwu nu zhi n Shekwoyi nunui vnyanya.
20Nsaiye, ga əwo n wo myi woi zhni aɓo n du shi a ɓa myi n mwi vnyanya, n yi nyaɓo kwo n yi zhninubwo nyi, kwoi vyi əwo kalá n əkwo nu zhni tnutnu fyi n əyi nyi, 21latu zhni əwo nya nu dna n ikilisiya njesnu dna n Kirisiti Yeisu kwa lo acala vnyanya nyalonyalo! Aamyi.
Currently Selected:
Afyisuyi 3: GNB
Highlight
Copy
Compare
Share
Want to have your highlights saved across all your devices? Sign up or sign in
Gbagyi Nyizeyenya Baibwulu: Shekwoyi Ɓədagbma™, Ɓəgbeshì Woiwoyi
© 1997, 2025 Biblica, Inc.
Apmazhni n gbegai nu. Ɓəznu vnyanya wnafyi lo n anyìvnyanya.
Gbagyi Contemporary Bible™, New Testament
Copyright © 1997, 2025 by Biblica, Inc.
Used with permission. All rights reserved worldwide.