Akwolosiyi 3
3
Anyìgyi ngye azayi n ɓa kwu wyewyeyi ɓwa fyi n Kirisiti
1Nsaiye, shikwonyi, a la fye kwnu kalakwu n Kirisitii nyi, fye kwu əfye adu zhi ntu anya ɓo nu n ɓa lo n əshe, aba n Kirisiti dna nyi, n sasetu n Shekwoyi ɓwaizheɓwa. 2Fye kwu əfye abwugba zhi ntu ń anya ɓo nu ń ɓa lo əshe, toge n zhi ń anya anyì nya ɓo m. 3Ntuge fye ɓə kwu fyí, jesnu nsaiye, əfye wyewyeyi sodna lo n kwnusnu n Kirisitii nu dna n Shekwoyi. 4Əsa n Kirisiti, n wo nu zhni əfye wyewyeyi nyi, ɓə kpeyaɓe, əfyehni ce, fye ɓə kwnú kpeyaɓe n woi dna n latu.
5Ntucenu, fye la nyahonyahoi wu n kwo zhni əfye nyinyì anyìmi nya: asisiɓozhni, aɓoajegbmi, shakpe, aɓəpwawo nukwoi ɓədo ǹ fnanai, n kwo nu zhni shnagba nyi. 6Ntu n aɓo ye ɓo nu ń Shekwoyi minagyinapyei ɓəlo. 7Fye ɓə zhni fyei gyianyì nlai nu, fyi n əfye anyìgyi sapa nya. 8Ama nsaiye, kwo zhni ɓəshishi nu fya kwu aɓo ye pya yaɓwa vnyanya n ɓa kpe nyi: minagyi, minagyinapyei, ɓəshinmì n əzai, əyewnuya n aɓəda kasai n ɓa kwnu n əfye agbe. 9Fye to ceakata fyi aje m, shikwonyi fye la əza kwokwoi kpmaya ɓədo n əkwo atnutnui. 10Jesnu fye kwu əzawoiwoyi kpe, n a gnyi ai shna kwo ədo n ɓəyekpe dna n əkwo Zhniyi dogbe nyi. 11Ń ya, Abyedo to kakai lo n Yahudiyi m, əza nyaznuyi kwo əza tnanyaznuyi, zhabwida, Sitiyayi, fyenu kwo əza loloiya m, ama Kirisiti nu zhni nyahonyahoi, jesnu əwo nu dna n əɓa vnyanya.
12Ntucenu, ntuge fye zhni Shekwoyi aza aknyiknyiyi nu, agyigyiyi jesnu ayeyeyi dəidəi, fye kwu fyehni pwi n snusnugyei, n ɓəmanaizhnii, n tukwogbai, n aɓəzhnii pəceye ɓədo n bwugbaɓwai. 13Fye ɓwa əmì najei jesnu ngye əzaho ń fye n minagyii lo n əwo zadoi, fya zo aje abwi. Fye zo abwi ngye shi Dagayi ɓə kwu abwizo fye nyi. 14Njesnu tu n alu amanai ye vnyanya, fye kwu yeye kpe, n əkwo nu ye ɓa ɓədo ń abagbmanyi dna n ɓwadodna nunui nyi.
15Fye fa Kirisiti bwugbafu kwa gyibe fyi n əfye adu, shikwonyi fye zhni aga nayi gbmanyi nya nu, a ɓə yi fye fyi n bwugbafu nu. Jesnu fye kwu zhni Shekwoyi amisa ga yii. 16Fye fa Kirisiti ɓədatnu kwaa sase dna n fye mi n mwa, əsa n fye ɓe aje n nyawui, fyei ga aje ɓəkwnukwnù n wyemwai vnyanya fyei kwoanyi n anyísasayi, ɓədo n anyí Shekwoyi cici nyai, jesnu n anyíi n ɓa kwnu n Zafnu. Fyei kwoanyi ga Shekwoyi ǹ amisai fyi n əfye adu. 17Njesnu ɓəhoɓəhoi n fye ɓa zhni, kwo kwoi dna n ɓədagbma nu, kwo n ɓəzhni, fye zhni kwo vnyanya dna n Dagayi Yeisu əye, fyei sa Shekwoyi Dada ami dna n wo.
Aɓəgbega ntu Kirisitiavyiyi apwuwa ɓo
18Anyikwo anusei, fye kwu əfyehni ga əfye aɓá, ntuge kwo wulo cewo dna n Dagayi.
19Aɓá, fye ye n əfye anyikwoi jesnu to fya pyena n ɓai m.
20Aɓyi, fye vyi əfye azamayi ɓəda fyi n ɓəhoɓəhoi, ntuge dəye kwo da Dagayi agbma.
21Adada, fye to wnu əfye aɓyi bwugba m, sakwnu bwugba kwa bma ɓa.
22Afyenu, fye kwu əfye adagayi anyì nya ɓəda shiɓwa dna n ɓəhoɓəhoi; jesnu fya zhni kwo, toge n ɓwasnu n əsa n ɓa gye fye əwye lo m, ntuge fya ɓwa əɓa bmyashi m, ama n ɓəhnihni nya dna n ədu ɓədo n mwamwagai ga Dagayi. 23Nyahonyahoi n fye ɓa zhni, fye zhni kwo n əfye ədui vnyanya, ngye fye zhni ga Dagayi nu, toge Dagayi zanyikwoci nya m. 24Shikwonyi fye kpəlo nge fye ɓə gwo əgwú n Dagayi akwnu nu ngye gyiba. Fye zhni Dagayi Kirisiti nu tnutnu. 25Əza n wa zhni ɓənukwoi, wo ɓə gwo ɓənukwoizhni gyiba, jesnu a to n azai knyiknyi lo n a ɓə wu ɓa bmyashi m.
Currently Selected:
Akwolosiyi 3: GNB
Highlight
Copy
Compare
Share
Want to have your highlights saved across all your devices? Sign up or sign in
Gbagyi Nyizeyenya Baibwulu: Shekwoyi Ɓədagbma™, Ɓəgbeshì Woiwoyi
© 1997, 2025 Biblica, Inc.
Apmazhni n gbegai nu. Ɓəznu vnyanya wnafyi lo n anyìvnyanya.
Gbagyi Contemporary Bible™, New Testament
Copyright © 1997, 2025 by Biblica, Inc.
Used with permission. All rights reserved worldwide.