1 Atasaloniyi 1
1
1Bwulus, Sila n Timwotii.
Kwo lo da Ikilisiya Atasaloniyi nya nu, n ɓa fyi n Shekwoyi Dada ɓədo n Dagayi Yeisu Kirisitii nyi.
Shebmyashi n bwugbafui ɓa kwu kwnusnu n fyei.
Amisaga ntu Atasaloniyi gaiciyaga ɓo
2Yi sa Shekwoyi ami lo ciici ntu əfye ɓo vnyanya, yii sa əfye aye ciici fyi n əyi aduwazhni. 3Yi pá əfye tnutnu ɓo lo gnyi n Shekwoyi əyi Dadai abye, n fye ɓə zhni kwo dna n gaiciyaga nyi. Əfye tnutnu, ń yeye nu ɓə dna fye kwo zhni nyi, jesnu əfye bwugbaɓwa n awyetui dna n əyi Dagayi Yeisu Kirisiti.
4Ntuge yi kpəlo, əyi azaje, azanugbai n anyikwozai n Shekwoyi ye fye nyi, nge wo la fye knyi, 5ntuge əyi nabagyi manai to ɓə ɓe da fye, n ɓwasnu n aɓədagbmai nu m, ama ɓədo n kalái, ɓədo n Zafnu Gyigyiyii n bwugbaknyi loloyi. Fye kpəlo she yi ɓə gyianyì fyi n əfye atasni ntu əfye apma ɓo. 6Fye ɓə kwu zè aza n ɓa shna yi, ɓədo n Dagayii, ntuge fye ɓə la ɓədatnu gwo fyi n azhnìgye yaakwo atasni fyei wu agbmada ń Zafnu Gyigyiyi ɓə ga nyi. 7Ntulonu əfye n fyehni, fya kwu zè aɓəmwutuba n agaiciyagayi vnyanya aba n ɓa fyi n Makyidoninya n Akaiyai nyi. 8Dagayi ɓədatnu ɓə gwoawyiya n əfye nu, toge n ɓwasnu fyi n Makyidoninya n Akaiyai m; a kwu əfye gaiciyaga n Shekwoyi kpeye n ɓwahoɓwahoi. Ntucenu yi to n ɓəhoi lo ya shna da ntu əkwo ɓo m, 9ntuge əɓa n ɓahnii, ɓa ɓə kwu nabagyi da ntu gwogwo pya ɓo n fye ɓə gwo yi ncei nyi. Ɓa kwu da shi fye ɓə pmyiawyeya n ashna fya gwo Shekwoyi nabai fya zhni Shekwoyi hnihnii n wyewyeyidai tnutnu, 10jesnu ntuge fya pmi əwo Nugwnu n wo gbmi n əshemi, n wo ɓə la wo kala n əfyí, Yeisu, n wo gnyi yi n minagyi napyei n kwo ɓe lo nyi.
Currently Selected:
1 Atasaloniyi 1: GNB
Highlight
Copy
Compare
Share
Want to have your highlights saved across all your devices? Sign up or sign in
Gbagyi Nyizeyenya Baibwulu: Shekwoyi Ɓədagbma™, Ɓəgbeshì Woiwoyi
© 1997, 2025 Biblica, Inc.
Apmazhni n gbegai nu. Ɓəznu vnyanya wnafyi lo n anyìvnyanya.
Gbagyi Contemporary Bible™, New Testament
Copyright © 1997, 2025 by Biblica, Inc.
Used with permission. All rights reserved worldwide.