GHLƆMÖÖ NƖKPAA 'BƆGƲ 4
4
Sa -Lagɔwɛlɩɛ 'bɔgʋ gba-a Ablaamöö 'möslɛnɩgbʋ
1Sa -a ji-e 'mö-a -aa -tɩbhatɩbha Ablaamöö yɛ gba 'nɩ? 'Manɩ ɔ ghlɩ-a 'nɩ? 2Ɛ -yɛ la naa Ablaamöö nʋnʋlie yɛ -Lagɔ zʋɔ 'möslɛnɩnyɔ 'wʋ glɩnɩ, ɔ bhɛlɩ ɔ 'yɛ la -gömö 'gbɔ-ɔ 'bhë-ë, ɛ'ɛ -lɛ-a 'mö -bha -Lagɔ ji klʋ. 3-Ma ɩ 'mö, sa -Lagɔwɛlɩ gba-a 'nɩ? Ɩ nɛ naa:
“-Lagɔ Ablaamö ka-a dlɩ 'wʋ,
ɩ yɛ 'möslɛnɩnyɔ 'wʋ -Lagɔ 'libhïɔ-a 'wʋ.”
4Nɩkpɛ -yɛ libho nʋ, 'pɛnɔ ɔ ghlɩ -bha. 'Pɛnɔ la'a ɔ ghlɩ-ɛ -sɩbha, ɛ'ɛ -lɛ 'soko wʋ, gagbʋɔ swɩ -bha. 5Nɩkpɛ -mɔ nɩ libho -bhlʋɔ 'bhë nʋ, ɔ -yɛ -Lagɔ -ʋ slɛmanɩ-a 'jinylolie nʋnʋngwa 'mö dlɩ 'wʋ -ka-a, ɔ dlɩwʋkakʋɔ yɛ 'möslɛnɩnyɔ -Lagɔ zʋɔ-a 'wʋ. 6Nɩkpɛ -ɔ 'nɩ-a -luo -lu -bhlʋ 'tɩɛ 'bhë nʋ 'bhë -ɔ -Lagɔ zʋa-a 'möslɛnɩnyɔ 'wʋ-ɔ, -sɩbha Davidɩ gba-a ɔ 'mʋnaligbʋ.
7Davidɩ nɛ:
“Nɩkpa -waa 'jinylolie gbʋ -Lagɔ 'tatinɩ-a 'ji
-waa -li ʋ 'su-a 'wʋ, 'mʋna 'lɩbhʋa.
8Nɩkpɛ -ɔ Nyininyɔ -Lagɔ 'nɩ-a
ɔ 'jinylolie gbʋ -gömö -la, 'mʋna 'lɩbhɔ.”
9'Ma 'mʋna la'a -aa gbʋ Davidɩ gba-a, -wa la'a -waa zɔmö-ö 'dɩɔ-a 'wʋ, wa 'nyizee -la-a 'nɩ-ɩ? Ɛ'ɛ -lɛ 'yɛ -nɩ -mʋaa zɔmö-ö 'nɩ-a 'wʋ 'dɩɔɔ -la gamö? -Wʋʋ yɛ-a, sa'a -a gba-a naa, Ablaamöö dlɩwʋkakʋɔ yɛ -Lagɔ lɔ-a 'möslɛnɩnyɔ. 10Laa do'o -Lagɔ lɔ-a 'möslɛnɩnyɔ-ɔ, sa ɔ -wʋnʋ la-a 'mö 'nɩ? 'Wʋ ɔ zɔmö 'dɩɔ la-a 'nɩɩ, -ma 'nɩ la 'wʋ 'dɩɔ-a? Ɔ zɔmö 'nɩ la -bhla 'wʋ 'dɩɔ. 11-Lagɔ yɛ Ablaamö 'möslɛnɩnyɔ la 'bhë, 'n Ablaamö ji-a zɔmö 'wʋ -dɩ. 'Mɛ zɔmöö 'wʋdɩdɩɛ la'a, jɩblɩna -a -Lagɔ zʋ-a Ablaamö yawʋ, sa ɔ lɔ-a 'möslɛnɩnyɔɔ yɛ ma -bha. -Bhaa do'o, ɔ'ɔ la -bhla zɔmö 'wʋ -dɩ. Ɩ yɛ Ablaamö glɩnɩ-a -wa bhuo-o ka-a -Lagɔ dlɩ 'wʋɔ -tɩbha, wa zɔmöö 'bhë nɩ 'wʋ 'dɩɔ-ɔ, -Lagɔ 'kʋa 'möslɛnɩngwa la. 12'Zwiföa -waa zɔmö 'dɩɔ 'yɛ-a 'wʋ, -wa 'nɩ-a wa zɔmöö 'wʋdɩdɩɛ 'nyize dlɩ 'tɛnɩ, -wa -ganɩ-a -aa -tɩbha Ablaamöö dlɩwʋkakʋ la ɔ zɔmö 'nɩ la-a -bhla 'wʋ 'dɩɔ-ɔ, wa -tɩbha ɔ glɩnɩ 'yɛ -bha.
Sa Ablaamö -kakanɩ-a -Lagɔ dlɩ 'wʋ 'mö
13Ɛ'ɛ -lɛ -Lagɔɔ gbö Ablaamö 'yɛ -bha zʋɔ yɛ -Lagɔ 'kɔ 'dɩ 'yukwli 'mö palɩ naa, ɔ -yɛ ɔ 'gwiee 'gwie 'sɔ ʋ jua 'pɩ-ɩ bhë 'ye 'nyɛɛ. Sa Ablaamö ka-a -Lagɔ dlɩ 'wʋ, 'n ʋ jio-a 'möslɛnɩnyɔ laa yɛ -bha. 14Ɛ -yɛ la -Lagɔɔ gböö -bhazʋ yɛ nɩkpa ghlɩ -ɩ -Lagɔ nʋ-a ʋ 'kʋa 'nyɛ glɩnɩ-ɛ, -Lagɔɔ dlɩwʋkakʋ 'na la zɔmö -ka. Dɩ -ɩ ʋ palɩ-a nɩkpa 'yukwli 'mö 'na la 'yɛ -lu 'ji -ka. 15-Wʋʋ yɛ-a, -Lagɔɔ yʋlʋ gbö la-a nɩkpa -gömö. La gbö 'nɩ 'yɛ-a -wʋ-ɔ, ɩ -sasɩɛ 'nɩ -bha -wʋ. 16-Ma ɩ 'mö, dlɩwʋkakʋ nya wa ghlɩnɩ-a -ɩɩ gbʋ -Lagɔ gba la-a, ɩ 'yɛ -Lagɔɔ ngazɩdlɩ 'mö 'bhönɩɛ yɛ. -Bhaa do'o Ablaamöö 'gwiee 'gwie 'bhuo 'kɩ ghlɩ, ɛ'ɛ -lɛ -wa gbö nyini-aa 'nyize, -wa la'a -wa ka-a Ablaamöö swɩ -Lagɔ dlɩ 'wʋ 'gamö mʋa -bha. Sa ɩ 'cɛlɩɔ-ɔ -ma -Lagɔwɛlɩɛ 'bɔgʋ 'mö Ablaamöö yɛ naa:
17“-Gwlɩ -bebee -tɩbha n -zʋamö-a 'wʋ.”
-Aa 'bhuoo -tɩbha Ablaamö glɩnɩ -bha. -Lagɔ -ʋ ɔ ka-a dlɩ 'wʋɔ 'ji 'klʋ, -Lagɔ -ʋ nyɛ-a 'kudungwa 'pɩ, -li -ɩ 'nɩ-a sɛ -wʋ -ʋ lɩ-a yɛ.
18-Ɩ -Lagɔ gba-a 'mɩ Ablaamö ka-a dlɩ 'wʋɔ yɛ, la 'bhë dlɩ 'na la-a 'wʋ 'tɛnɩ -bha ɔ dlɩ 'tɛnɩ-a 'wʋ, 'n ɔ ji-a ɩ yɛ -gwlɩ -bebee -tɩbha zʋ, sa -Lagɔ gbɩ la-a ɔ de naa:
“-Sɩbha -na ngëyi ji-a 'wʋ -die.”
19-Bhaa do'o, Ablaamö ka la 'ylʋböö gwlɩ -ngbïë swɩ. Ɔ yɛ la gɔ tenyi 'bhë, ɔ 'nglɔ Sala yɛ 'yɛ gɔ 'bhë, ɔ'ɔ la-a 'mö 'gughlɩswɩ'ɩ -wʋ, 'bhë ɔ 'pɩ-a dlɩ 'wʋ, 'kwa 'nɩɔ-ɔ yawʋ tlɩnɩ -ma ɔ dlɩwʋkakʋ 'mö. 20Wɛlɩ -ɩ -Lagɔ palɩɔ-a 'yukwli 'mö, ɔ'ɔ -lɛ ɩ de dudua, ɔ'ɔ -lɛ dlɩ 'mö 'tumanɩ. -Lagɔ ɔ ka-a dlɩ 'wʋɔ yɛ, 'n ɔ ji-a -Lagɔɔ 'nglɩ 'ghlimanɩ. 21-Ɩ ɔ dlɩ -wʋ-a -gömö tenyi mɩ-ɩ la-a naa: -Ɩ -Lagɔ gba-a, 'mö ʋ 'tɛ-ɛ -bhaa yɛ, ʋ bhɛlɩ ʋ 'kɩ 'wʋ 'wlenɩ. 22Ɩ yɛ -Lagɔ 'libhïɔ-a 'möslɛnɩnyɔ 'wʋ 'wʋ. 23-Ma ɩ 'mö, ɛ'ɛ -lɛ ɔ 'nyizee yɛ ɩ 'cɛlɩɔ-ɔ naa, -Lagɔ kɔ 'möslɛnɩnyɔ 'wʋ 'wʋ 'libhï 'bhë. 24-Abha la'a -abha ka-a -Lagɔ -ʋ -sa-a -ma 'kudungwa 'gbamö -aa Nyininyɔ Zezwi dlɩ 'wʋ, -aa yɛ ɩ 'cɛlɩɔ-ɔ 'yɛ-a -nɩ 'gamö naa, -abha ʋ ji-a 'möslɛnɩngwa 'wʋ 'wʋ 'libhïë. 25'Mɔ Zezwi 'Kli, 'mɔ -Lagɔ zʋ-a -aa 'jinylolie yɛ, 'bhë 'n ɔ ji-a glu 'wlʋ ɔ -kaya 'möslɛnɩngwa 'wʋ zʋaa yɛ.
Currently Selected:
GHLƆMÖÖ NƖKPAA 'BƆGƲ 4: BNT96
Highlight
Copy
Compare
Share
Want to have your highlights saved across all your devices? Sign up or sign in
Bete New Testament © Bible Society of Côte d'Ivoire 1996