Rut 2
2
Ngo Rut mo munara ra Boas 'ai guḏa
1Ngo Naomi 'ami rera moi matengo, tami nau'u ino 'a Elimelekh ga'a ro sengene, unanga gena-ge 'ai lomanga 'a Boas. Ngowa'a gena-ge, ngowa'a rema enanga re ngowa'a 'u silamo'o unanga.
2Toma 'orasa rimoi, ngo Rut mo kanau ra ngo Naomi, <<Meme, nyengara gari'a to tagi ra matengo i'a 'ai guḏa, la to pu'uru gandum tu-tuu'u toma ngowa'a munara ga'a manga 'akala la-la ra ngoi ga'a ya sieta'a.>>
Ngo Naomi mo sangoro, <<Tagi ḇato 'ari ngowa'a!>>#'Im. 19:9; Dad. 24:19
3Gena ḏua, ngo Rut mo tagi toma guḏa ḇotu moi, re mo pu'uru tu-tuu'u toma ngowa'a munara manga ḏuḏunu. Guḏa gena-ge ta Boas.
4Palisi'i i'a ti'ara ua, 'a Boas, guḏa madutu, 'o sapolo da'a Betlehem ino re 'o pula'a tabea tai ngowa'a munara 'utu'u. <<Nyengara gari'a Ma JOU 'o mamete'e ra ngini.>>
Ngowa'a munara gena-ge 'aḏi sangoro, <<So'o gena ḏi'i Ma JOU 'o sibarakati tuanga.>>
5Ḏua 'a Boas 'o sano tai mandor, <<'A ngo guna gena-ge?>>
6Mandor gena-ge 'o sangoro, <<Munanga were'a Moab 'aro mo sapolo mo mete'e ngo Naomi da'a daeraha Moab ino. 7Munanga mo golo'o watasa ḏua ra ngoi, la mo pu'uru gandum ga'a ngowa'a munara ya sisoi'i. Munanga mo pu'uru da-daini i'a moju, ne munanga aro mo mangomasa i'a toma kekecongo.>>
8-9Gena ḏua, 'a Boas 'o kanau ra ngo Rut, <<No 'isene si, ngana no pu'uru awa gandum toma ngowa'a lelegu manga guḏa, pu'uru ḇato 'ane-ne ma'u mete'e 'ari ngowa'a munara we-were'a. No tailako ananga 'aḏi 'utu'u papolo le'a, la no ma ki-kiḏanga awa ra ananga. Na'o 'ani camala 'i dudungu, no 'oro ḇato ḇanyo toma tampayanga, ga'a 'ari ngowa'a munara na-nau'u ya sidodahe ḏua. Ngoi ta sibobita ḏua ra ananga, la ananga ni se-seḏu'u ngana awa.>>
10Wakutu ngo Rut mo 'isene gena-ge, munanga mo mapagara ami biono ngadolo toma tana'a ra Boas 'ai biono re mo kanau, <<Tuanga, ngoi patasa ua no 'a'a ma rousu so'o gena-ge ra ngoi, sababu ngoi pa'i ngowa'a tagi-tagi ino ḇato.>>
11Boas 'o sangoro, <<Ngoi ta 'isene ḏua 'oru ga'a no 'a'a di'a 'ani dunungu wakutu 'ani nau'u 'o sengene palisi'i i'a. Ngoi to waro, ngana no sisoi'i tala 'ani ḇaḇa re ngina re 'ani daeraha, la no tegoro 'ane-ne toma ngowa-ngowa'a ga'a ngana na'u nana'o nyangu. 12Nyengara gari'a Ma JOU, 'a balasa 'ani ga'a ma la-la, re ngana no patasa sanga 'ori i'a ma la-la toma Israel manga JOU gena-ge, sababu no sapolo re no masidiriwa ra Unanga!>>
13Rut mo sangoro, <<Tuanga, kalaha no ma tero ua reo 'ani ngowa'a munara we-were'a, no la masala ra ngoi re 'ani seri'i re gogasa 'i dadi 'ari 'akala ma de-de'e.>>
14Wakutu ma 'orasa oromo 'i ngadolo, 'a Boas 'o kanau i'a ra ngo Rut, <<Ino, ngene wo oromo ne rema ḏabu.>> Ḏua ngo Rut mo oromo ma'u mete'e reo ngowa'a munara. Re 'a Boas 'o pula'a ḏi'i gandum 'osumu, singadolo ngo Rut mo wunusu. Oromo 'i togumu ḏua, ngo-ngoromo gena-ge rema bai'i moju. 15-16Gena ḏua, ngo Rut dadunu mo pu'uru gandum. Wakutu ngo Rut mo tagi, 'a Boas 'o kanau i'a tai ngowa'a munara so'o ne <<Na'o munanga mo pu'uru co-cori toma gandum ga'a ngini na piri'u ḏua, sieanga i'a ḇato ni pula'a mara'a awa, bolo ni ngamo munanga awa. Nyengara gari'a na sieta'a mamuni'a di'a munanga ma 'oro.>>
17Singadolo wangere so'o ne'o, ngo Rut mo pu'uru gandum. Gena ḏua, munanga ma sica'olo siwo-wola gandum ma ma-miri re ma 'oki munanga ma sanga ma hasili ḏa kilo nyagi moi. 18Gena ḏua, munanga mo maḏibo toma limau re mo gasa 'ami hasili ma sijumu tami dunungu ga'a munanga mo pu'uru toma wange moi ma dara. Re munanga mo pula'a oromo 'ami dunungu reo ngo-ngoromo ga'a munanga ma sidodahe ḏua. 19Dadi ngo Naomi mo sano, <<No sanga le'a ino mo-moini nena-ne? Re ra guna 'ai guḏa ngana no pu'uru? Nyengara gari'a Ma JOU 'o sibarakati ngowa'a ga'a manga 'akala la-la ra ngana!>>
Gena ḏua, ngo Rut ma sijarita rango Naomi, munanga mo pu'uru gandum toma ngowa'a nau'u matengo 'ai guḏa, unanga 'ai lomanga 'a Boas.
20Ngo Naomi mo kanau, <<Ngowa'a gena-ge nanga rera moi ga'a balasu 'o sioḏi'i ngene.#'Im. 25:25-26 Nyengara gari'a Ma JOU 'o sibarakati unanga. Nyengara gari'a Ma JOU 'o siganapu 'ai jaji: Bae ra ngene ngowa'a 'ahu-'ahu, bae toma ngowa'a senge-sengene ḏua!>>
21Gena ḏua ngo Rut mo kanau moju, <<Meme, ngowa'a gena-ge 'o kanau ra ngoi, ngana no pu'uru toma ngowa'a munara manga ḏuḏunu singadolo ma 'orasa 'utu'u gandum 'i moini.>>
22Ngo Naomi mo sangoro, <<'I nyengara 'ari ngowa'a! Jobilaha ngana no pu'uru ra Boas 'ai guḏa, re no mete'e tai ngowa'a munara we-were'a ḇato. Na'o no pu'uru toma guḏa lelegu, ngowa'a ni se seḏu'u ngana.>> 23Sababu gena-ge, ngo Rut mo mete'e 'a Boas 'ai ngowa'a munara we-were'a, singadolo 'orasa 'utu'u 'i moini: Bae 'orasa 'utu'u ma mulaingi, bae 'orasa 'utu'u ma ḏo-ḏogumu. Toma 'orasa gena-ge, ngo Rut mo tegoro tami dunungu.
2025 Indonesian Bible Society (LAI)