Nyo-nyoimi 36
36
Tana'a warisi di'a we-were'a ga'a molo'ara ḏua
36:1-13
1Toma wangere rimoi ma dara, ete re dotumu manga ngitu re ngale ma sae'e toma rera toma ngowa'a Gilead ino, unanga gena-ge Makhir 'ai ngowa'a nau'u, Manasye 'ai danongo, rera rimoi toma Yusuf 'ai ju'uda tala manga rera ma sigolona, ananga gena-ge 'aḏi maco-cori re kanau ra Musa re ḏi'i bi-biri'i mo-moini, gena-ge ngowa'a Israel manga ete re dotumu manga ngitu re ngale. 2Ananga gena-ge 'aḏi kanau rema betongo so'o ne:<<Ma JOU ro parenta taminga tuanga di'a sibalangu tana'a gena-ge reo pake loterei di'a ngowa'a Israel sa'olo manga warisi. Re ḏi'i Ma JOU ro parenta taminga tuanga di'a sipula'a tana'a warisi ta Zelafehad, minga ioro re nongoḏu, di'a 'ai ngowa-ngowa'a were'a. 3Mada'a si'ade-'ade ananga ḏuanga i'a 'aḏi molo'ara reo na-nau'u matengo toma suku lelegu toma ngowa'a Israel manga sigolona. Ḏua 'a Zelafehad 'ai ngowa-ngowa'a were'a gena-ge manga warisi 'i sikuranga taminga ete re dotumu manga warisi re sidogo taminga nau'u manga suku ma warisi. Dadi ngomi minga tana'a warisi ga'a sanga ga'a 'i sipake loterei, gena-ge 'i sikuranga. 4Dadi, sa'olo minga tuanga reno waro, kalaha ngowa'a Israel manga Musungu Siḏibo 'i ngadolo, we-were'a gena-ge manga warisi ma tana'a ḏuanga i'a 'i sidogo taminga nau'u manga suku ma warisi. Rema duhu so'o gena-ge, ngomi minga ete re dotumu manga warisi gena-ge 'i siiranga simoini.>>
5Dadi 'a Musa 'o parenta toma ngowa'a Israel mete'e Ma JOU 'ai putusanga so'o ne: <<'A Yusuf 'ai suku rimoi gena-ge ma ju'uda manga demo gena-ge 'i tero re banari. 6Nena-ne Ma JOU 'ai putusanga mangale Zelafehad 'ai ngowa-ngowa'a were'a, so'o ne: <Ananga nyengara 'aḏi molo'ara ra na-nau'u guna ḇato ga'a nyafusu ananga, mada'a ananga balasu 'aḏi molo'ara toma rera rimoi i'a tamanga ḇaḇa 'ai suku ma dara, gena-ge suku Manasye. 7Sababu gena-ge, ngowa'a Israel manga warisi ma tana'a 'i sijujuru yoḏu'u tamanga suku i'a re ino, mada'a ngowa'a Israel ananga matengo re matengo balasu macako'o namo-namoto manga ete re dotumu manga warisi ma tana'a. 8Dadi ngowa'a were'a matengo re matengo toma suku Israel ga'a remanga warisi ma tana'a, ananga balasu 'aḏi molo'ara reo na-nau'u toma rera rimoi i'a ga'a osama nyo-nyoimi manga ḇaḇa 'ai suku. Rema duhu gena-ge, ngowa'a Israel matengo re matengo ḏuanga i'a 'aḏi sanga tau-taunu manga ete re dotumu ma warisi. 9Sababu tana'a warisi gena-ge 'i sijujuru yoḏu'u toma suku i'a re ino, mada'a ngowa'a Israel manga suku-suku ananga matengo re matengo balasu 'aḏi macako'o namo-namoto manga warisi ma tana'a masiretene.> >>
10Ma tero Ma JOU ro parenta ra Musa, so'o gena-ge 'a Zelafehad 'ai ngowa-ngowa'a were'a ya si'a'a. 11Dadi ngo Mahla, Tirza, Hogla, Milka re Noa, mo-moini gena-ge 'a Zelafehad 'ai ngowa-ngowa'a were'a, ananga gena-ge raḏi molo'ara reo na-nau'u tamanga ḇaḇa 'ai rera. 12Ananga gena-ge 'aḏi molo'ara reo na-nau'u toma suku Manasye 'ai rera-rera ino, unanga gena-ge 'a Yusuf 'ai ju'uda tala. Rema duhu gena-ge, warisi ma tana'a enanga 'i tegoro tamanga ḇaḇa 'ai suku manga rera.
13Gena-ge parenta re 'atoranga mo-moini ga'a Ma JOU ra sipula'a ra Musa di'a unanga 'o singadolo toma ngowa'a Israel, wakutu ananga 'aḏi side'oso manga suyu'u toma Moab ma tana'a rata, toma Ḇanyo Yordan ma 'uḏu papolo wangere ma la'o, talaḏi Limau Yerikho ga'a toma ḇanyo gena-ge ma kaci moi papolo wangere soḏu.
2025 Indonesian Bible Society (LAI)