Nyo-nyoimi 1
1
Roimi sordado Israel
1Ma JOU 'o kanau ra Musa toma tanggal rimoi, toma ngara ma soi ḏiḏi toma 'orasa ngowa'a Israel raḏi supu sisoi'i tala daeraha Mesir, toma daeraha baulaco Sinai, toma Suyu'u Lo-lomu ma dara, Unanga gena-ge 'O kanau rema betongo so'o ne: 2<<Ngana balasu no roimi ngowa'a Israel mo-moini ma repe mete'e manga rera-rera re ete re dotumu manga ngitu re ngale rimoi re rimoi, re na lefo na-nau'u gena-ge manga loma-lomanga 3ga'a manga 'umuru musungu nyagi romoḏiḏi re sie, mo-moini gena-ge ngowa'a Israel ga'a nyengara mete'e parangi ḏua. Ngana re 'a Harun, ngini balasu ni lefo manga lomanga matengo re matengo mete'e manga sordado ma toropo rimoi re rimoi. 4Toma suku rimoi re rimoi ino balasu 'age rema ngowa'a nau'u matengo, unanga gena-ge ma bi-biri'i toma ete re dotumu ma ngitu re ngale rimoi re rimoi di'a riono ngini. 5Ngowa'a nau'u matengo gena-ge ga'a 'o riono ngini ni silefo manga loma-lomanga: Toma suku Ruben ino: 'a Elizur, unanga gena-ge 'a Zyedeur 'ai ngowa'a nau'u; 6toma suku Simeon ino: 'a Selumiel, unanga gena-ge 'a Zurisyadai 'ai ngowa'a nau'u; 7toma suku Yehuda ino: 'a Nahason, unanga gena-ge 'a Aminadab 'ai ngowa'a nau'u; 8toma suku Isakhar ino: 'a Netaneel, unanga gena-ge 'a Zuar 'ai ngowa'a nau'u; 9Toma suku Zebulon ino: 'a Eliab, unanga gena-ge 'a Helon 'ai ngowa'a nau'u; 10#Do. 49:22-26 ra Yusuf 'ai ngowa-ngowa'a nau'u manga ju'uda ino: 'Age toma suku Efraim ino, 'a Elisama, unanga gena-ge 'a Amihud 'ai ngowa'a nau'u, toma suku Manasye ino, 'a Gamaliel, unanga gena-ge 'a Pedazur 'ai ngowa'a nau'u; 11toma suku Benyamin ino: 'a Abidan, unanga gena-ge 'a Gideoni 'ai ngowa'a nau'u; 12toma suku Dan ino: 'a Ahiezer, unanga gena-ge 'a Amisyadai 'ai ngowa'a nau'u; 13toma suku Asyer ino: Pagiel, unanga gena-ge 'a Okhran 'ai ngowa'a nau'u; 14toma suku Gad ino: 'a Elyasaf, unanga gena-ge 'a Rehuel 'ai ngowa'a nau'u; 15toma suku Naftali ino: 'a Ahira, unanga gena-ge 'a Enan 'ai ngowa'a nau'u.>> 16Gena-ge ngowa-ngowa'a ga'a sanga cumutu toma ngowa'a Israel manga lo-lomu, ananga gena-ge bi-biri'i tamanga ete re dotumu manga suku; re ananga gena-ge 'aḏi dadi sae'e di'a Israel manga toropo rimoi re rimoi.#1:16 nyengara so'o gena ḏi'i: sae'e toma Israel manga sordado ma toropo rimoi re rimoi 17Ḏua Musa re Harun ya'u 'aro'o ngowa'a nga nyagi moi re ngamu ḏiḏi ga'a sanga cumutu gena-ge, 18re toma tanggal rimoi ma ngara ma soi ḏiḏi ananga 'aḏi soma'a ngowa'a Israel mo-moini 'aḏi malomu. Gena ḏua ngowa'a Israel mo-moini manga lomanga 'i silefo mete'e rera re ete re dotumu manga ngitu re ngale. Ḏua ngowa'a nau'u ga'a manga 'umuru musungu nyagi romoḏiḏi re sie, ananga manga lomanga 'i silefo matengo re matengo. 19Dadi 'a Musa 'a si'a'a so'o gena-ge toma daeraha baulaco Sinai, ma tero Ma JOU ro parenta Musa.
20'A Ruben 'ai ju'uda, unanga gena-ge Israel 'ai ngowa'a nau'u ma jomolo, ngowa'a gena-ge mete'e ananga manga rera-rera re ete re dotumu manga ngitu re ngale, dadi ya lefo na-nau'u mo-moini manga loma-lomanga matengo re matengo ga'a manga 'umuru musungu nyagi romoḏiḏi re sie, mo-moini gena-ge ga'a nyengara 'aḏi tagi parangi: 21Toma suku Ruben ino ga'a ananga ya lefo mo-moini manga repe nga cala nyagi rata re rarama, re nga latu romotoa (46.500).
22'A Simeon 'ai ju'uda, ngowa'a gena-ge mete'e ananga manga rera-rera re ete re dotumu manga ngitu re ngale, dadi ya lefo na-nau'u mo-moini manga loma-lomanga matengo re matengo ga'a manga 'umuru musungu nyagi romoḏiḏi re sie, mo-moini gena-ge ga'a nyengara 'aḏi tagi parangi: 23Toma suku Simeon ino ga'a ananga ya lefo mo-moini manga repe nga cala nyagi romotoa re siworo re nga latu ro'ange (59.300).
24'A Gad 'ai ju'uda, ngowa'a gena-ge mete'e ananga manga rera-rera re ete re dotumu manga ngitu re ngale, dadi ya lefo na-nau'u mo-moini manga loma-lomanga matengo re matengo ga'a manga 'umuru musungu nyagi romoḏiḏi re sie, mo-moini gena-ge ga'a nyengara 'aḏi tagi parangi: 25Toma suku Gad ino ga'a ananga ya lefo mo-moini manga repe nga cala nyagi rata re romotoa re nga latu rarama nga nyagi romotoa (45.650).
26'A Yehuda 'ai ju'uda, ngowa'a gena-ge mete'e ananga manga rera-rera re ete re dotumu manga ngitu re ngale, dadi ya lefo na-nau'u mo-moini manga loma-lomanga matengo re matengo ga'a manga 'umuru musungu nyagi romoḏiḏi re sie, mo-moini gena-ge ga'a nyengara 'aḏi tagi parangi: 27Toma suku Yehuda ino ga'a ananga ya lefo mo-moini manga repe nga cala nyagi tumudingi re rata re nga latu rarama (74.600).
28'A Isakhar 'ai ju'uda, ngowa'a gena-ge mete'e ananga manga rera-rera re ete re dotumu manga ngitu re ngale, dadi ya lefo na-nau'u mo-moini manga loma-lomanga matengo re matengo ga'a manga 'umuru musungu nyagi romoḏiḏi re sie, mo-moini gena-ge ga'a nyengara 'aḏi tagi parangi: 29Toma suku Isakhar ino ga'a ananga ya lefo mo-moini manga repe nga cala nyagi romotoa re rata re nga latu rata (54.400).
30'A Zebulon 'ai ju'uda, ngowa'a gena-ge mete'e ananga manga rera-rera re ete re dotumu manga ngitu re ngale, dadi ya lefo na-nau'u mo-moini manga loma-lomanga matengo re matengo ga'a manga 'umuru musungu nyagi romoḏiḏi re sie, mo-moini gena-ge ga'a nyengara 'aḏi tagi parangi: 31Toma suku Zebulon ino ga'a ananga ya lefo mo-moini manga repe nga cala nyagi romotoa re tumudingi re nga latu rata (57.400).
32'A Yusuf 'ai ju'uda gena-ge ngowa'a suku Efraim, mete'e ananga manga rera-rera re ete re dotumu manga ngitu re ngale, dadi ya lefo na-nau'u mo-moini manga loma-lomanga matengo re matengo ga'a manga 'umuru musungu nyagi romoḏiḏi re sie, mo-moini gena-ge ga'a nyengara 'aḏi tagi parangi: 33Toma suku Efraim ino ga'a ananga ya lefo mo-moini manga repe nga cala nyagi rata re nga latu romotoa (40.500). 34'A Manasye 'ai ju'uda, ngowa'a gena-ge mete'e ananga manga rera-rera re ete re dotumu manga ngitu re ngale, dadi ya lefo na-nau'u mo-moini matengo re matengo manga loma-lomanga ga'a manga 'umuru musungu nyagi romoḏiḏi re sie, mo-moini gena-ge ga'a nyengara 'aḏi tagi parangi: 35Toma suku Manasye ino ga'a ananga ya lefo mo-moini manga repe nga cala nyagi ro'ange re romoḏiḏi re nga latu ḏiḏi (32.200).
36'A Benyamin 'ai ju'uda ngowa'a gena-ge mete'e ananga manga rera-rera re ete re dotumu manga ngitu re ngale, dadi ya lefo na-nau'u mo-moini manga loma-lomanga matengo re matengo ga'a manga 'umuru musungu nyagi romoḏiḏi re sie, mo-moini gena-ge ga'a nyengara 'aḏi tagi parangi: 37Toma suku Benyamin ino ga'a ananga ya lefo mo-moini manga repe nga cala nyagi ro'ange re romotoa re nga latu rata (35.400).
38'A Dan 'ai ju'uda ngowa'a gena-ge mete'e ananga manga rera-rera re ete re dotumu manga ngitu re ngale, dadi ya lefo na-nau'u mo-moini manga loma-lomanga matengo re matengo ga'a manga 'umuru musungu nyagi romoḏiḏi re sie, mo-moini gena-ge ga'a nyengara 'aḏi tagi parangi: 39Toma suku Dan ino ga'a ananga ya lefo mo-moini manga repe nga cala nyagi rarama re romoḏiḏi re nga latu tumudingi (62.700).
40'A Asyer 'ai ju'uda ngowa'a gena-ge mete'e ananga manga rera-rera re ete re dotumu manga ngitu re ngale, dadi ya lefo na-nau'u mo-moini manga loma-lomanga matengo re matengo ga'a manga 'umuru musungu nyagi romoḏiḏi re sie, mo-moini gena-ge ga'a nyengara 'aḏi tagi parangi: 41Toma suku Asyer ino ga'a ananga ya lefo mo-moini manga repe nga cala nyagi rata re rimoi re nga latu romotoa (41.500).
42'A Naftali 'ai ju'uda ngowa'a gena-ge mete'e ananga manga rera-rera re ete re dotumu manga ngitu re ngale, dadi ya lefo na-nau'u mo-moini manga loma-lomanga matengo re matengo ga'a manga 'umuru musungu nyagi romoḏiḏi re sie, mo-moini gena-ge ga'a nyengara 'aḏi tagi parangi: 43Toma suku Naftali ino ga'a ananga ya lefo mo-moini manga repe nga cala nyagi romotoa re ro'ange re nga latu rata (53.400).
44Gena-ge ngowa'a manga repe ga'a Musa re 'a Harun ya lefo reo ri-riono toma Israel manga bi-biri'i, gena-ge ma repe nga nyagi moi re ngamu ḏiḏi toma ete re dotumu rimoi-rimoi manga ngitu re ngale. 45Dadi ngowa'a Israel mo-moini ga'a sanga lefo mete'e ete re dotumu manga ngitu re ngale, gena-ge ngowa-ngowa'a ga'a manga 'umuru musungu nyagi romoḏiḏi re sie. Re mo-moini tamanga sigolona ananga nyengara 'aḏi tagi parangi. 46Mo-moini manga repe nga cala latu rarama re ro'ange latu romotoa re nga nyagi romotoa (603.550).
47Mada'a kalaha ngowa'a Lewi manga ju'uda osama suku Israel manga ete re dotumu, ananga gena-ge manga lomanga sanga siroimi ua. 48Sababu Ma JOU ro kanau ra Musa: 49<Pa'i suku Lewi ḇato no lefo awa manga lomanga re no roimi awa ananga manga repe simete'e reo ngowa'a Israel ma lelegu. 50Mada'a ngana no sitatapu ngowa'a Lewi 'ai ju'uda gena-ge 'aḏi sioḏi'i Suyu'u 'Ofi-'Ofi, enanga gena-ge Ma Jou'ongu Madutu 'ai hukumu ma ngi'i, re enanga ma pakakasa 'ori i'a rana toma ma dara. Pa'i ananga ḇato nyengara 'aḏi gasa Suyu'u 'Ofi-'Ofi re enanga ma pakakasa. Re pa'i ananga ḇato gena-ge balasu ya kaḏiarata re 'aḏi side'oso manga suyu'u rimoi re rimoi sigolodi Ma Suyu'u 'Ofi-'Ofi gena-ge. 51Toma 'orasa ḇato, ngowa'a Israel 'aḏi tagi, Ma Suyu'u 'Ofi-'Ofi gena-ge ngowa'a Lewi balasu ya ruba, re ḏi'i ananga balasu ya side'oso. Na'o ngowa'a Israel ma lelegu 'aḏi maco-cori, ngowa'a gena-ge ngini balasu nu sihukumu sengene. 52Ngowa'a Israel lelegu balasu 'aḏi side'oso manga suyu'u rimoi-rimoi mete'e manga suku ma toropo re co-cori manga paji rimoi re rimoi, mete'e ananga manga sordado ma toropo. 53Mada'a ngowa'a Lewi balasu 'aḏi side'oso manga suyu'u sigoloḏi Suyu'u 'Ofi-'Ofi, enanga gena-ge Ma Jou'ongu Madutu 'ai hukumu ma ngi'i, la bangsa Israel sanga bahala awa. Re ngowa'a Lewi balasu ya sioḏi'i Suyu'u 'Ofi-'Ofi gena-ge.> >> 54Dadi ngowa'a Israel ya siḏagi so'o gena-ge, ananga 'aḏi siḏagi mete'e 'oru ga'a Ma JOU 'o parenta ra Musa.
2025 Indonesian Bible Society (LAI)