Imamat 7
7
Jou-jou ngali rugi
1Jou-jou ngali rugi 'i 'ofi-'ofi madutu. 'Atoranga mangale jou-jou ngali rugi so'o ne: 2Toma ngi'i gena-ge ga'a biasa tola'a haiwani sa'olo jou-jou tau'u, haiwani di'a jou-jou ngali rugi, 'imam matengo balasu 'a tola'a toma ma ngi'i gena-ge ḏi'i, re haiwani gena-ge ma ngaunu siajala toma jou-jou tau'u ma ngi'i ma ḇuḇuku rata ma gagoro. 3Haiwani ma gaji mo-moini, 'imam gena-ge balasu 'a sidoa'a sa'olo jou-jou: gena-ge ma di'imi ga'a rema gaji, gaji ga'a 'i sao toma po'olo ma dara, 4ma ginjal romoḏiḏi ga'a rema gaji re ma 'a'abala ma balangu ma rousu i'a. 5Mo-moini gena-ge, unanga balasu 'a tau'u toma jou-jou ma ngi'i ma re'u sa'olo jou-jou ngo-ngoromo di'a Ma JOU. Jou-jou gena-ge jou-jou ngali rugi. 6Ngowa'a nau'u mo-moini ra 'imam 'ai ju'uda tala, ananga nyengara 'aḏi oromo haiwani ma la-la'eme toma jou-jou gena-ge mada'a balasu 'aḏi oromo toma ngi'i ga'a siwola i'a sa'olo 'ofi-'ofi, sababu jou-jou gena-ge 'i 'ofi-'ofi. 7'Atoranga gena-ge mangale jou-jou di'a sigofi ngowa'a ra Ma JOU 'ai momina ma tero sa'olo 'atoranga di'a jou-jou ngali rugi. 'Imam ga'a 'o sidoa'a jou-jou ngali rugi gena-ge, la ngowa'a ḏuanga i'a dadunu 'aḏi dadi marimoi ra Ma JOU, unanga gena-ge sanga balangu toma jou-jou gena-ge. 8Re 'imam 'o sanga haiwani ma eno'o di'a masiretene toma jou-jou tau'u ga'a ra sidoa'a di'a 'a guna ḇato. 9So'o gena ḏi'i, jou-jou ngo-ngoromo mo-moini ga'a tau'u: bae toma baki bae toma para-para, bolo na 'osumu toma 'osu-'osumu roti ma ngi'i, jou-jou gena-ge ma balangu di'a 'imam ga'a 'a sidoa'a. 10Mada'a jou-jou ngo-ngoromo ma lelegu ga'a na tau'u ua: bae sicapuru reo goroho bolo 'i dudungu, gena-ge di'a Harun 'ai ngowa-ngowa'a nau'u re balasu sibalangu ma tero.
Jou-jou sababu dadunu marimoi moju ra Ma JOU
11'Atoranga mangale jou-jou sababu dadunu marimoi moju ra Ma JOU, ga'a ngowa'a balasu ya sidoa'a ra Ma JOU so'o ne: 12Na'o ngowa'a matengo i'a 'o sidoa'a jou-jou gena-ge sababu mau sibere ie murasa ma la ra Ma JOU, unanga balasu 'o sidoa'a haiwani sirimoi reo roti-roti kama ragi ua: Roti ga'a kapiringi gena-ge 'i sicapuru reo goroho zaitun, roti tore nginara kama ragi ua ga'a si'ese reo goroho zaitun re roti ḇululu re si'a'a reo gulupungu ma rousu i'a re sicapuru mode-mode'e reo goroho zaitun. 13Sidogo ḏi'i, unanga 'o sidoa'a roti-roti rema ragi sirimoi reo jou-jou sababu dadunu marimoi moju ra Ma JOU, gena-ge sababu mau sibere ie murasa ma la. 14Unanga 'o 'oro roti rimoi toma roti fara muḏuo i'a mo-moini gena-ge di'a sidoa'a sa'olo jou-jou ga'a ri siwola i'a ra Ma JOU. Roti-roti gena-ge 'i dadi 'imam matengo 'ai balangu. Unanga gena-ge ga'a 'o 'oro haiwani ma ngaunu toma jou-jou sababu dadunu marimoi moju ra Ma JOU, kara ngaunu gena-ge unanga 'a siajala toma jou-jou ma ngi'i ma ḇuḇuku rata ma gagoro. 15Ngowa'a ga'a gasa 'ai jou-jou gena-ge, unanga balasu 'o oromo haiwani ma la'eme ma balangu toma wangere gena-ge ḏua. Re awa rema jingianga singadolo da-daini.
16Na'o matengo i'a 'o sidoa'a 'ai jou-jou di'a 'o sitotomo 'ai jaji, bolo jou-jou sababu 'ai 'akala re sinyingara sa-sanangi. Jou-jou gena-ge 'ai balangu, unanga nyengara 'a oromo toma wangere ga'a unanga 'a sidoa'a. Re ma jingianga nyengara 'a oromo toma wangere da-daini ḏi'i. 17Na'o la-la'eme ma jingianga rema enanga singadolo wangere ma soi ro'ange, la-la'eme gena-ge mo-moini balasu ya tau'u simoini. 18Na'o toma wangere ma soi ro'ange, matengo i'a 'a oromo haiwani ma la-la'eme ceka'a i'a tai jou-jou sababu dadunu marimoi moju ra Ma JOU, unanga gena-ge Ma JOU 'o dawongo ua re ḏi'i ma barakati cua ra unanga gena-ge, sababu jou-jou gena-ge 'i dadi emo-emono ra Ngoi 'ari momina. Re matengo i'a ga'a 'a oromo, unanga 'o dadi sala re balasu 'o doiti ma hukumana di'a 'ai ga'a ma rapu. 19Haiwani ma la-la'eme ga'a 'i nga'unu 'ori i'a ma najis, balasu 'aḏi tau'u simoini re oromo yoḏu'u. La-la'eme toma jou-jou sababu dadunu marimoi moju ra Ma JOU, pa'i ngowa'a ga'a 'ofi ḇato ra Ma JOU 'ai momina, ananga gena-ge nyengara ya oromo. 20Mada'a na'o matengo i'a ga'a najis moju ra MA JOU 'ai momina, re unanga gena-ge 'o oromo la-la'eme toma jou-jou sababu dadunu marimoi moju ra Ma JOU ga'a siwola i'a di'a Ma JOU, unanga gena-ge ngini balasu nu sisupu toma bangsa Israel ma sigolona. 21Na'o matengo i'a 'o cigi 'ori i'a ma najis: bae ma 'asala toma manusia, bae haiwani, bolo haiwani nga-ngaro, kara unanga 'o oromo la-la'eme toma jou-jou sababu dadunu marimoi moju ra Ma JOU, unanga gena-ge ngini nu sisupu toma bangsa Israel ma sigolona.>>
22Ma JOU 'o kanau ra Musa ma betongo so'o ne: 23<<Siajele toma ngowa'a Israel, < Ngini ni oromo yoḏu'u ma gaji toma sapi, doba bolo 'abingi. 24Haiwani ga'a ri sengene masiretene enanga ma gaji, bolo haiwani ga'a ri sengene sababu ma haiwani nga-ngabala ya goḏi, ngini na oromo yoḏu'u. Mada'a ma gaji gena-ge, ngini nyengara na sipake di'a paralu ma lelegu. 25Ngowa'a mo-moini ga'a 'aḏi oromo ma gaji ga'a nyengara 'i sidoa'a sa'olo jou-jou ngo-ngoromo ra Ma JOU, ananga gena-ge, unanga ngini nu'u sisupu toma bangsa Israel ma sigolona. 26Sidogo ḏi'i, ngowa'a Israel ga'a 'aḏi tegoro le'a ḇato, ananga 'aḏi oromo yoḏu'u ma ngaunu bae toma namo bolo haiwani. 27'A guna ḇato 'o mete'e ua 'atoranga gena-ge, unanga ngini nu sisupu toma bangsa Israel ma sigolona.
'Imam 'ai balangu toma jou-jou sababu dadunu marimoi moju ra Ma JOU
7:28-38
28Ḏua Ma JOU 'o kanau ra Musa ma betongo so'o ne: 29<<Siajele toma ngowa'a Israel, < 'A guna ḇato 'o gasa jou-jou sababu dadunu marimoi moju ra Ma JOU, ma balangu balasu 'a siwola i'a, kara sidoa'a jou-jou gena-ge ra Ma JOU. 30Unanga masiretene balasu 'a gasa jou-jou ngo-ngoromo gena-ge, ma gaji re ma katere toma haiwani gena-ge re 'o sitede ie di'a sijumu mangale jou-jou gena-ge di'a Ma JOU. 31Re 'imam balasu 'o tau'u haiwani ma gaji gena-ge toma jou-jou ma ngi'i ma re'u, mada'a ma katere enanga gena-ge ma balangu di'a Harun re 'ai ngowa-ngowa'a nau'u. 32Sidogo ḏi'i haiwani gena-ge ma busuu'u ma kuwiḏa balasu 'i sipula'a sa'olo bu-bula'a toma jou-jou sababu dadunu marimoi moju ra Ma JOU di'a 'imam masiretene. 33'A guna ra Harun 'ai ngowa-ngowa'a nau'u manga sigolona ga'a 'o sigasa ngaunu re ma gaji toma jou-jou sababu dadunu marimoi moju ra Ma JOU, unanga gena-ge ḏuanga i'a 'o sanga busuu'u ma kuwiḏa sa'olo 'ai balangu. 34Sababu, Ma JOU masiretene ro 'oro ma katere ga'a 'i sitede ie re ma busuu'u ma kuwiḏa, enanga gena-ge toma jou-jou sababu dadunu marimoi moju ra Ma JOU ga'a ngowa-ngowa'a Israel ya sidoa'a ḏua. Ḏua Ma JOU 'o pula'a enanga gena-ge ra Harun re 'ai ngowa'a nau'u sa'olo manga balangu toma ngowa-ngowa'a Israel. Gena-ge hukumu ga'a 'i siḏagi kasingado-ngadolo i'a. 35Gena-ge balangu di'a Harun re 'ai ngowa-ngowa'a nau'u toma jou-jou ngo-ngoromo ra Ma JOU ga'a 'i sidoa'a toma wangere ananga 'aḏi sisolano di'a munara sa'olo Ma JOU 'ai 'imam-'imam. 36Wangere gena-ge ga'a Musa 'o siba-ba'ala goroho zaitun toma 'imam-'imam 'ai sae'e, Ma JOU 'o pareta ngowa'a Israel 'aḏi pula'a tamanga jou-jou, balangu gena-ge di'a 'imam-'imam. Hukumu gena-ge, ngowa'a Israel re manga ju'uda tala, ananga balasu ya mete'e kasingado-ngadolo i'a.>>
37So'o gena ḏi'i 'atoranga mangale jou-jou tau'u, jou-jou ngo-ngoromo, jou-jou di'a sigofi ngowa'a ra Ma JOU 'ai momina, jou-jou ngali rugi, jou-jou solano re jou-jou sababu dadunu marimoi moju ra Ma JOU, 38ga'a Ma JOU 'o parenta Musa toma kie Sinai, wakutu Ma JOU 'o soma'a ngowa'a Israel 'aḏi gasa jou-jou ra Ma JOU toma baulaco Sinai.
Currently Selected:
Imamat 7: SAJ
Highlight
Share
Copy
Want to have your highlights saved across all your devices? Sign up or sign in
2025 Indonesian Bible Society (LAI)
