Yosua 2
2
Ngo Rahab mo riono tamo-tamolo Israel nga muḏiḏi toma Yerikho
1Ḏua, 'a Yosua 'o 'utusu ngowa'a tamo-tamolo nga muḏiḏi toma Sitim 'aḏi tagi toma Kanaan. Ananga nga muḏiḏi sanga soma'a di'a disa waro ma sigo-gogoro toma Kanaan, ma la-lamo'o i'a limau Yerikho. Togumu i'a, ananga nga muḏiḏi 'aḏi tagi toma limau gena-ge, re 'aḏi masiḏingoto otu rango Rahab were'a sudala matengo 'ami wala. 2'Olana limau Yerikho 'a 'isene mangale 'au utu 'age rema ngowa'a Israel 'aḏi sapolo di'a disa waro limau nena-ne. 3Ḏua 'Olana Yerikho 'o soma'a ngowa'a 'aḏi tagi rango Rahab 'ami wala di'a singadolo ma 'olana 'ai parenta, <<Sisupu ngowa'a ga'a 'aḏi tuḏu tani wala. Sababu ananga gena-ge 'aḏi sapolo di'a disa waro daeraha Yerikho mo-moini!>>
4-6Mada'a ngo Rahab mo sangoro, <<Tero mode'e rema ngowa'a 'aḏi sapolo tari wala, mada'a ngoi ta waro ua ananga le'a ino. Co-cori lobi'i, toma 'orasa limau ma ngalana lamo'o 'i kuci nyangu, ananga gena-ge raḏi tagi. Re ngoi ḏi'i ta'u sano ua ananga 'aḏi tagi lea, mada'a na'o ni kunu'i capati, ngini nyengara na'u ḏuḏono ananga moju.>> Momongolo ua, ngo Rahab ma'u gogono tamo-tamolo nga muḏiḏi gena-ge toma rami ma to-tounu#2:4-6 Gena-ge ma tero sa'olo rurubu ga'a ngowa'a ya pake di'a si'a'a ḇa'a. ma 'aḏu tami wala ma re'u.
7Ḏua ma 'olana 'ai so-soma'a gena-ge 'aḏi tagi sisoi'i tala limau. Ananga 'aḏi ngadolo toma limau ma ḏuḏunu kara limau ma ngalana lamo'o ya kuci. Ananga 'aḏi disa ngowa'a tamo-tamolo nga muḏiḏi gena-ge singadolo toma ba-balene Ḇanyo Yordan.
8Toma utu gena-ge, wakutu ngowa'a ga'a tamo-tamolo 'aḏi otu nyangu, ngo Rahab mo pere toma wala ma re'u, 9re mo kanau ra ananga, <<Ngoi ta waro mangale Ma JOU ro pula'a daeraha nena-ne di'a ngini. Ngowa'a mo-moini 'ane-ne 'aḏi sawana madutu! 10Sababu ngomi rema 'isene ma duhu sa'olo Ma JOU 'o sidudungu Ngoloto Teberau ra ngini ninga momina, toma 'orasa ni sisoi'i tala Mesir. Ngomi ḏi'i rema 'isene ma duhu sa'olo ngini ni sisengene ngowa'a Amori manga 'olana nga muḏiḏi, 'a Sihon re 'a 'Og toma Ḇanyo Yordan papolo wangere ma la'o.#Sup. 14:21; Nyo. 21:21-35 11Toma 'orasa ngomi mi 'isene jarita-jarita gena-ge, ngomi mi dadi sawana madutu re ngowa'a mo-moini manga 'akala re sinyingara 'i nau'u riwara, sababu ngini. Ma JOU gena-ge 'ani Jou'ongu Madutu, Unanga gena-ge mode-mode'e Ma Jou'ongu Madutu ga'a 'O kuasa da'u toma dungia re diwanga tala. 12-13Pahala nange-ne, ngini ni masisasi ni pake Ma JOU 'ai lomanga, mangale ngini ni sijumu ninga 'akala re sinyingara la-la tari ngitu re ngale ma tero ngoi ta si'a'a ḏua ra ngini. Ni jaji, mangale 'ari ḇaḇa re ngina, 'ari ioro re nongoḏu, re ananga manga ngitu re ngale mo-moini, ananga gena-ge ngini na'u sisengene ua, mada'a ngini na'u saolo. Sababu gena-ge, ni pula'a nana'o rimoi mangale ngini, ngoi tini ngaku!>>
14Ḏua ngowa'a nga muḏiḏi gena-ge ya sangoro, <<Ngomi mi majaji, mangale wakutu Ma JOU sipula'a daeraha nena-ne ra ngomi, ngomi ḏuanga i'a mi 'a'a la-la ra ngini, na'o ngana no sijarita ua ra guna ḇato mangale ngomi. Na'o nyengara gari'a, Ma JOU 'o sikutuki ngomi na'o ngomi mi masoloto minga jaji gena-ge.>>
15Ngo Rahab 'ami wala ma ge-gelo kaci moi gena-ge ma'u rimoi reo limau ma ge-gelo. Dadi munanga mo siala ananga nga muḏiḏi reo gumi toma jangela. 16Ngo Rahab mo kanau ra ananga, <<Ni tagi toma daeraha kie-kie, la ngowa-ngowa'a ga'a ma 'olana 'o soma'a disa ngini, ananga 'aḏi cako'o ngini ua. Ni magogono toma ngi'i gena-ge ma di'ara wangere ro'ange, singadolo ananga 'aḏi maḏibo, kara ngini na dowanga ninga ḏo-ḏagi.
17Ngowa'a tamo-tamolo nga muḏiḏi gena-ge 'aḏi kanau ra ngo Rahab, <<Nyengara, ngomi ḏua ngi'a mi masitotomo minga jaji ga'a ngana na golo'o, 18pa'i ngana balasu na si'a'a so'o ne: wakutu ngomi ḏuanga i'a mi sapolo di'a mi parangi 'ani daeraha, gumi ko-kolili nena-ne ngana balasu na piri'u toma jangela nena-ne, ga'a ngana no siala ngomi. 'Ani ḇaḇa re ngina, 'ani ioro re nongoḏu, re 'ani ngitu re ngale, ananga mo-moini balasu 'aḏi malomu tani wala nena-ne. 19Na'o matengo i'a 'aḏi supu tani wala nena-ne re unanga ngowa'a 'u sisengene, enanga gena-ge unanga 'ai sala masiretene; ngomi minga sala ua. Mada'a na'o rema ngowa'a ga'a 'o sanga bodito tani wala nena-ne ma dara, enanga gena-ge ngomi minga sala. 20Mada'a, na'o ngana no siajele mangale ngomi toma ngowa'a matengo i'a, ngomi remi supu toma jaji ga'a ngana no golo'o ra ngomi. 21Ngo Rahab ma 'akoru hali-hali gena-ge. Ḏua munanga mo sibebasa ananga 'aḏi tagi. Gena ḏua munanga mo piri'u gumi ko-kolili madutu tami jangela.
22Dadi ngowa'a tamo-tamolo nga muḏiḏi gena-ge 'aḏi tagi re 'aḏi magogono toma daeraha kie-kie. Ma di'ara wange ro'ange 'olana 'ai so-soma'a 'aḏi disa ananga toma daeraha gena-ge mo-moini, mada'a ananga 'aḏi ma'u sanga tamo-tamolo gena-ge ua. Ma ḏo-ḏogumu, 'olana 'ai so-soma'a gena-ge 'aḏi maḏibo toma Yerikho. 23Gena ḏua, ngowa'a tamo-tamolo nga muḏiḏi 'aḏi 'uci da'u kie tala re 'aḏi iwanga Ḇanyo Yordan, kara 'aḏi sapolo ra Yosua. Ananga ya sijarita mo-moini ra unanga 'oru ga'a ananga ya si'a'a re ya basono. 24Ḏua, ananga 'aḏi kanau, <<Tantu ḏua, Ma JOU 'o pula'a ḏua tana'a mo-moini gena-ge ra ngene; ngowa'a mo-moini toma daeraha gena-ge 'aḏi sawana madutu sababu ngene.>>
2025 Indonesian Bible Society (LAI)