Ester 7
7
1Toma 'orasa ma soi ḏiḏi 'olana re 'a Haman 'aḏi 'oromo re ka'e ma'u mete'e ra ngo Ester 'olana 'ai were'a. 2Wakutu ananga 'aḏi ka'e 'anggur, ma 'olana 'o sano ra ngo Ester.<< 'Ari were'a, ngana no mau 'oru? Siajele ḇato! Tantu ḏua, kalaha no golo'o 'ari 'ori i'a rana kaci moi, ngoi ta pula'a!>>
3Ngo Ester ma sangoro, <<Na'o 'olana no nyengara, ngoi to golo'o: Bae ngoi, bae 'ari bangsa, nyengara gari'a sijira ngomi awa.
4Sababu bae ngoi, bae 'ari bangsa, re mi sanga wu'unu di'a sisengene. Na'o ngomi, pa'i mi sanga wu'unu di'a dadi budaka, ngoi pa'i to masiogoro ḇato, re tu ruwahe ma 'olana ua. Mada'a nange-ne, ngomi ḏuanga i'a ngowa'a mau 'aḏi sijira, re ḏi'i mau 'aḏi singi-ngiranga!>>
5Ḏua ma 'olana Ahasyweros 'o sano moju ra ngo Ester, << 'Aguna 'o nau'u madutu, 'o 'a'a so'o gena-ge? Ngowa'a gena-ge unanga le'a?>>
6Ngo Ester mo sangoro << Ngowa'a gena-ge 'a Haman, 'ai 'akala re sinyingara lai cira, unanga 'o lawana ngomi, re 'o sidadi cira ngomi!>> 'A Haman 'o mojongo madutu, 'o talaḏi ma 'olana re ma were'a.
7Ma 'olana 'o ruta madutu. Ḏua unanga 'o te'oso 'a siso'i tala meja, 'o masupu tagi toma kadato ma soana ngi'i saya-saya. 'A Haman ra waro mangale ma 'olana ro 'oro putusanga di'a sihukumu unanga. Sababu gena-ge, 'a Haman 'o malage ua rango Ester, re unanga 'o golo'o la nga'unu gari'a ngo Ester mo sisalamata unanga.
8Rai 'akala re sinyingara 'i tola'a, unanga 'o maeta'a ra ngo Ester mi jingi'i di'a 'o golo'o 'apongo ra munanga, sidaene i'a 'orasa gena-ge ma 'olana ro maḏibo ino da'a guḏa saya-saya. Wakutu ma 'olana 'o oḏi'i 'a Haman 'ai duhu so'o gena-ge, unanga 'o kanau, << Unanga 'o mau 'a'a 'oru? Lao nau'u mode'e unanga mau 'o pakisa 'o nakala 'ari were'a, ra ngoi 'ari biono, re tari kadato ma dara?>> Ma 'olana 'o kanau togumu i'a, 'age ngowa'a la-lamo'o nga muḏuo i'a 'aḏi sapolo ya damunu 'a Haman 'ai sae'e.
9'A Harbona, unanga ḏi'i ma 'olana 'o ngaku 'o kanau ra ma 'olana,<<Tuanga 'olana! Co-cori ra Haman 'ai wala rema ngasu'u di'a sikole ngowa'a, ma gau'u metere nyagi romoḏiḏi re romoḏiḏi. Unanga ra side'oso, di'a sikole 'a Mordekhai, unanga gena-ge 'au nga'ene ga'a ro sisalamata 'olana 'ani nyawa.>>
Ḏua 'olana 'o parenta <<Kole 'a Haman toma ngasu'u gena-ge!>>#7:9 Ngowa'a Persia manga hukumana ma duhu gena-ge sitopo'o reo ngasu'u dau ie lapasa da'u
10Ma duhu so'o gena-ge, 'a Haman 'o sanga kole, toma ngasu'u ga'a sidodahe di'a mau sikole 'a Mordekhai. 'A Haman ngowa'a ru kole togumu i'a, ma 'olana 'o ruta riwara.
Currently Selected:
Ester 7: SAJ
Highlight
Copy
Compare
Share
Want to have your highlights saved across all your devices? Sign up or sign in
2025 Indonesian Bible Society (LAI)