Ester 6
6
'Olana 'o silamo'o 'a Mordekhai
1Utu gena-ge ma 'olana 'o otu yoḏu'u. Sababu gena, unanga 'o golo'o boku ga'a toma dara 'i silefo mangale pareta ma sajaraha re 'o soma'a ngowa ya baca la unanga 'a 'isene. 2Toma boku gena-ge ma dara 'i silefo ḏi'i mangale 'a Mordekhai ro siajele ra ma 'olana mangale, 'a Bigtan re 'a Teresh manga 'akala 'i cira mau 'aḏi sisenenge ma 'olana. Ananga ngamu ḏiḏi gena-ge ma 'olana ya'u ngaku ga'a 'aḏi jaga ma 'olana 'ai kamara.#Est. 2:21-22 3'Olana 'o sano,<<Silamo'o re sibalasa reo 'oru ḏua ra Mordekhai sababu 'ai 'akala ma la gena-ge?>> Ngowa'a ga'a de-de'oso ma 'olana 'aḏi sangoro,<<Unanga 'o sanga 'oru rimoi i'a mai ua.>>
4Ḏua ma 'olana 'o sano,<<'A guna ga'a 'age toma kadato ma soana nange-ne?>> Sidaene i'a 'a Haman 'aro 'o osama toma kadato ma soana. Unanga mau 'o golo'o loasa ra ma 'olana di'a kole 'a Mordekhai toma ngasu'u ga'a unanga 'a sidodahe ḏua.
5Ngowa'a ga'a de-de'oso ma 'olana 'aḏi sangoro,<<Gena-ge 'a Haman, re unanga 'o talaḏi toma kadato ma soana nange-ne.>> 'Olana 'o kanau, <<Soma'a unanga 'o osama ino!>>
6Wakutu 'a Haman ro osama, 'olana 'o kanau ra unanga,<<'Age rema ngowa'a ga'a ngoi mau to silamo'o, ngoi balasu to pula'a 'oru ra unanga?>> Haman 'o madibanga tai 'akala ma dara, <<'Aguna moju 'olana mau 'o silamo'o? Tantu ḏua pa'i ngoi ḇato!>>
7-8Sababu gena-ge, 'a Haman 'a sangoro, <<'Oro pakeanga kabasarana, ga'a soi rai o'o i'a 'olana na pake. Re ḏi'i 'oro 'olana 'ani jarana, re sipake toma jarana ma sae'e 'olana 'ani lastari.#6:7-8 Pareta ma nana'o ḏa ma tero sa'olo Lastari
9Re ngowa'a la-lamo'o matengo ga'a 'ai ḏe-ḏegoro lai kau'u, 'o sipake pakeanga kabasarana gena-ge, toma ngowa'a ga'a 'olana mau silamo'o, re unanga 'o palene toma jarana gena-ge. Re ngowa'a la-lamo'o gena-ge, unanga 'o tagi si-siḏa singata'a i'a tola'a limau ma tana'a lapanga re unanga 'o poa-poa'a ma betongo so'o ne: <<Oḏi'i so'o nena-ne ngowa'a ga'a ma 'olana mau 'o silamo'o.>>
10Gena ḏua, ma 'olana 'o kanau ra Haman.<<Capati no 'oro pakeanga re jarana gena-ge, pula'a re sipake ra Mordekhai ngowa'a Yahudi gena-ge. Ngana si'a'a mo-moini ma tero sa'olo ngana na siajele ḏua, ngana sikuranga rimoi i'a mai awa. Ngana no ma'u sanga ra unanga, unanga 'o maḏe-ḏegoro toma kadato ma ngalana lamo'o ma biono.>>
11Gena ḏua, Haman 'o 'oro pakeanga kabasarana reo jarana gena-ge, re 'u sipake pakeanga gena-ge ra Mordekhai. Gena ḏua 'a Mordekhai 'o palene jarana gena ge, re 'a Haman 'o tagi si-siḏa tola'a i'a limau ma tana'a lapanga re 'o mabo-boa'a <<Oḏi'i, so'o nena-ne ngowa'a ga'a ma 'olana mau 'o silamo'o!>>
12Togumu i'a, 'a Mordekhai 'o maḏibo toma kadato ma ngalana lamo'o ma biono. Mada'a 'a Haman jau-jau 'o maḏibo tai wala 'a damunu 'ai biono, sababu 'o mara'a lai siḏi, unanga 'o oḏu'u ngowa'a 'aḏi oḏi'i unanga. 13Ngadolo toma wala 'a Haman 'a sijarita mo-moini tai were'a ngo Zeresh re tai ḏagilomu-ḏagilomu 'oru ga'a ri dadi 'au nange. Ḏua 'ai were'a, re 'ai ḏagilomu-ḏagilomu ga'a 'aḏi pahe, ananga 'aḏi kanau ra unanga, <<Ngana mulaingi no nga'unu 'a Mordekhai ua. Unanga ngowa'a Yahudi re ngana ngaunu ua no lawana unanga. Tantu ḏua unanga ni sieta'a ngana!>>
'A Haman sanga hukumu sengene
14Wakutu ananga ḏi maka-kanau moju ra Haman 'ai wala, ngowa'a ga'a 'olana ya'u ngaku, ananga 'aḏi sapolo sidola'a 'a Haman, gasa ra ngo Ester 'ami laya oromo.
2025 Indonesian Bible Society (LAI)