Dadunu 4
4
Musa 'o babata ngowa'a Israel la 'aḏi mete'e
1Ḏua Musa 'o kanau toma bangsa Israel ma betongo so'o ne: <<Hei ngowa'a Israel, ngini ni siḏagi huku-hukumu re 'atoranga-'atoranga ga'a nange-ne ngoi to doto'o ra ngini, la ngini ni 'ahu re osama re ni ḏegoro daeraha ga'a Ma JOU Ma Jou'ongu Madutu ga'a ninga ngimo-ngimono 'aḏi silamo'o re siḏubuso, Unanga gena-ge 'o pula'a ra ngini. 2Kalaha pa'i ceka'a 'ua, awa ni sikuranga bolo ni dogo 'oru ga'a ngoi to parenta ra ngini. Na siḏagi Ma JOU 'ai parenta-parenta ga'a ngoi to singadolo ra ngini. Unanga gena-ge Ma Jou'ongu Madutu ga'a ngini ni silamo'o re siḏubuso. 3Ngini masiretene ni oḏi'i ḏua 'oru ga'a Ma JOU Ma Jou'ongu Madutu ga'a ngini silamo'o re siḏubuso, Unanga gena-ge 'O 'a'a toma Kie Baal-Peor. Unanga gena-ge 'o singi-ngiranga ngowa'a mo-moini taninga sigolona ga'a 'aḏi silamo'o re siḏubuso dulada Baal toma Kie Peor. 4Mada'a ngini ga'a tatapu silamo'o re siḏubuso Ma JOU Ma Jou'ongu Madutu ga'a ngini silamo'o re siḏubuso, ngini gena-ge ni 'ahu moju singadolo nange-ne. 5'Elingi tau-taunu, ma hukumu re 'atoranga mo-moini ngoi reta sidoto'o ra ngini ma tero sa'olo Ma JOU Ma Jou'ongu Madutu ga'a ngoi to silamo'o re siḏubuso, Unanga gena-ge Ra soma'a ngoi. Ngini balasu ni si'a'a mo-moini gena-ge toma nagara ga'a nange-ne ngini na osama re ḏuanga i'a na ḏegoro gena-ge. 6Mete'e re si'a'a gena-ge tau-taunu. Na'o ngini na si'a'a so'o gena-ge, enanga gena-ge 'i dadi ninga 'akala soro'unu re wo-waro lai ngido ga'a 'i waiti di'a bangsa-bangsa lelegu. Na'o ananga ya 'isene mangale huku-hukumu gena-ge, ananga ḏuanga i'a 'aḏi kanau, <Mode-mode'e ngowa'a toma bangsa gena-ge ga'a lamo'o, ananga remanga 'akala soro'unu re wo-waro lai ngido!> 7Sababu bangsa ma lamo'o rimoi i'a mai ua ga'a remanga jou'ongu ma somoara ga'a co-cori ra ananga ma tero Ma JOU, Ma Jou'ongu Madutu ga'a ngene wo silamo'o re siḏubuso, Unanga gena-ge 'o lai co-cori ra ngene. Unanga gena-ge jau-jau 'O riono ngene na'o ni golo'o di'a 'Ai ri-riono toma 'orasa 'oru ḇato.#Nya. 145:18 8Re bangsa ma lamo'o rimoi i'a mai ua ga'a remanga huku-hukumu re 'atoranga-'atoranga ga'a 'i 'adili madutu ma tero toma Hukumu ma dara nena-ne ga'a ḏuanga i'a ngoi ta doto'o ra ngini toma wangere nange-ne! >>
9<< Totoho re ma'istiari la-la ninga diri, la awa ngini ni sidaioranga 'oru ngini masiretene na oḏi'i Ma JOU ro si'a'a re ḏi'i la awa gena-ge 'i iranga taninga 'akala re sinyingara singadolo 'ahu ma giḏanga. Sijarita taninga ngowa'a re danongo tala. 10Sijarita gena-ge ra ananga mangale ma wangere wakutu ngini ni talaḏi ra Ma JOU, Ma Jou'ongu Madutu ga'a ngini silamo'o re siḏubuso toma Kie Sinai.#4:10 Kie Sinai bolo Kie Horeb Toma 'orasa gena-ge Ma JOU 'o kanau ra ngoi, <Lomu bangsa gena-ge. Ngoi, Ma JOU to mau ananga 'aḏi 'isene 'oru ga'a ḏuanga i'a Ngoi to singadolo, la ananga 'aḏi madoto'o di'a silamo'o re mojongo Ngoi tamanga 'ahu ma giḏanga, la ananga 'aḏi sidoto'o manga ngowa-ngowa'a di'a silamo'o re mojongo Ngoi, Ma JOU.> >>
11<< Re ngini ni sapolo co-cori re made-de'oso toma kie ma cimi ga'a romanga reo loworo hafu-hafu ma tero kakamo kapiringi re ma u'u ma lejanga ngadolo toma diwanga. 12Gena ḏua, Ma JOU 'o kanau ra ngini toma u'u ma dara ino re ngini ni 'isene 'Ai iḏingi ma betongo, mada'a ni oḏi'i Unanga ua toma duhu 'oru ḇato, pa'i 'aḏi 'isene 'Ai iḏingi ḇato. 13Toma ngi'i gena-ge Unanga 'O siajele mangale 'oru ga'a ananga gena-ge balasu ya 'a'a di'a sitotomo 'Ai jaji ga'a Unanga ra soma'a ḏua. Parenta nyagi moi ga'a Unanga ra lefo toma maḏi bela ḏiḏi gena-ge.#Sup. 31:18 14Toma 'orasa gena-ge, Ma JOU 'o soma'a ngoi to sidoto'o huku-hukumu re 'atoranga-'atoranga mo-moini ra ngini, la ngini balasu na mete'e toma daeraha ga'a nange-ne na osama re ḏuanga i'a na ḏegoro.>>
Si'elingi la awa ni silamo'o re siḏubuso jou'ongu ma somoara
15Wakutu Ma JOU ro kanau ra ngini toma u'u ma dara ino toma kie Sinai, ni oḏi'i ma duhu 'oru ua. Sababu gena-ge, ngini balasu ni 'elingi la-la ino! 16Jaga la-la ino! Awa singadolo ni sitola'a ninga hubungana 'ofi-'ofi ra Ma JOU sababu ni 'a'a dulada ma duhu 'oru ḇato di'a na silamo'o re siḏubuso: bae ma duhu ma na-nau'u bolo we-were'a, 17ma duhu ma haiwani 'oru ḇato toma tana'a ma re'u, ma duhu namo diwanga 'oru ḇato toma diwanga ma dara, 18ma duhu ma haiwani 'oru ḇato ga'a 'i tare-tare toma tana'a ma re'u, bolo ma duhu ma nyao'o 'oru ḇato ga'a toma ngoloto lai ngido ma dara. 19Jaga la-la ino! Awa singadolo ngini ni mapagara ninga biono singadolo tana'a di'a ni silamo'o re siḏubuso enanga re ni siḏagi enanga gena-ge ma mau ga'a ni oḏi'i toma diwanga: bae wangere ma la'o bolo ngara re mumuḏungu-mumuḏungu. Mo-moini ga'a Ma JOU 'a sipula'a enanga gena-ge sa'olo barakati toma bangsa mo-moini. Unanga gena-ge Ma Jou'ongu Madutu ga'a ngini ni silamo'o re siḏubuso. 20Mada'a Ma JOU 'o silalo'o ngini toma Mesir 'ai kuasa re 'O gasa sisupu ngini toma ngagara gena-ge ga'a ngini ni basono ma sangisara lai tubuso, ma tero sa'olo ma ngi'i ga'a lai sau'u di'a 'a'a ḇesi, la ngini ni dadi Unanga 'ai warisi masiretene, gena-ge ma tero ngini nange-ne.
21Re ma sababu ngini, Ma JOU 'o ruta ra ngoi singadolo Unanga 'o masisasi mangale ngoi to palisi'i yoḏu'u Ḇanyo Yordan di'a osama toma tana'a rousu ga'a Ma JOU ḏuanga i'a 'O pula'a ra ngini sa'olo ninga warisi. Unanga gena-ge Ma Jou'ongu Madutu ga'a ngini ni silamo'o re siḏubuso. 22Ti'ara riwara ngini ni iwanga ḇanyo Yordan re na ḏegoro tana'a ga'a rousu gena-ge; mada'a ngoi to mete'e ua, sababu ngoi balasu to sengene 'ane. 23'Elingi la-la ino! Awa singadolo ni sidaioranga jaji ga'a Ma JOU Ma Jou'ongu Madutu ga'a ngini silamo'o re siḏubuso, Unanga ra 'a'a ra ngini. Ngini balasu ni mete'e mode-mode'e 'Ai parenta ne: Awa ni 'a'a dulada ma duhu 'oru ḇato, sababu Unanga 'a simaha ua. 24Sababu Ma JOU Ma Jou'ongu Madutu ga'a ngini ni silamo'o re siḏubuso, Unanga ma tero sa'olo u'u ga'a siro'u 'oru ḇato. Dadi, Unanga gena-ge ḏuanga i'a 'O sijumu 'Ari duruta toma ngowa'a ga'a 'aḏi silamo'o re siḏubuso jou'ongu ma somoara.
25Re ḏi'i na'o ngini ni tegoro ti'ara ḏua toma daeraha gena-ge singadolo ni sanga ngowa'a re danongo, awa ni 'a'a ḏosa sababu ni 'a'a dulada ma duhu 'oru ḇato. Ga'a gena-ge 'i dadi kajahatana madutu ra Ma JOU singadolo Unanga 'o dadi ruta madutu. Unanga gena-ge, Ma Jou'ongu Madutu ga'a ngini ni silamo'o re siḏubuso. 26Ḏua toma wangere nange-ne diwanga re tana'a 'i dadi sakisi ra ngini mangale na'o ngini ni 'a'a dulada gena-ge, ngini mo-moini ḏuanga i'a ni iranga capati toma tana'a ga'a ngini ḏuanga i'a ni iwanga toma ḇanyo Yordan ma kaci moi gena-ge di'a na ḏegoro. Ngini ni tegoro ti'ara ua moju toma tana'a gena-ge singadolo matengo i'a mai ua taninga sigolona 'aḏi tegoro moju toma tana'a gena-ge, 27sababu Ma JOU ḏuanga i'a 'o siare toma bangsa-bangsa lelegu singadolo ngini ninga jingianga pa'i ceka'a ḇato toma bangsa-bangsa lelegu ma golona ga'a Ma JOU 'a dusu'u ngini. 28Toma ngi'i gena-ge ngini ḏuanga i'a ni siḏagi jou'ongu ma somoara ma mau ga'a manusia ya 'a'a ga'a si'a'a reo ate re maḏi. Dulada gena-ge ga'a 'i oḏi'i re 'isene yoḏu'u, 'i oromo re 'i tumese mai yoḏu'u. 29Mada'a toma ngi'i gena-ge ḏi'i, ngini ḏuanga i'a ni manyiata ra Ma JOU Ma Jou'ongu Madutu ga'a ngini silamo'o re siḏubuso re Unanga ḏuanga i'a 'o 'isene ngini; mada'a ngini balasu ni manyiata reninga 'akala re sinyingara mo-moini re fikirana mo-moini. 30Re toma 'orasa toma biono wakutu ngini sanga sangisara re ngini ni basono ma sangisara mo-moini, ngini ḏuanga i'a ni maḏibo ra Ma JOU singadolo ni mete'e Unanga 'ai demo. Unanga gena-ge Ma Jou'ongu Madutu ga'a ngini ni silamo'o re siḏubuso. 31Na'o ngini ni 'a'a so'o gena-ge, Unanga 'o sieanga i'a ua ngini bolo singi-ngiranga ngini mo-moini, bolo 'O sidaioranga 'ai jaji ga'a 'O 'a'a rema sasi pasala ḏua taninga ngimo-ngimono, sababu Ma JOU 'o sijumu 'Ai dadalara lai lamo'o ra ngini. Unanga gena-ge Ma Jou'ongu Madutu ga'a ngini ni silamo'o re siḏubuso.
Pa'i Ma JOU ḇato, Ma Jou'ongu Madutu
4:32-40
32<<Ngini balasu ni fikiri mangale 'orasa ua re au wali, wakutu ngini ni siḏe-ḏegoro i'a nyangu, mulaingi toma 'orasa Ma Jou'ongu Madutu 'O sidadi manusia toma dungia nena-ne. Sanga ua, na'o ngini ni disa toma dungia sitabi donga, 'age hali ma lamo'o masala ma tero sa'olo nena-ne soi moi i'a mai ua 'i dadi. Re sanga ua, matengo i'a mai ua 'o 'isene mangale hali ma lamo'o masala ma tero sa'olo nena-ne. 33Sanga ua, bangsa lelegu rimoi i'a mai ua 'aḏi 'isene jou'ongu ma somoara 'o kanau toma u'u ma dara re 'aḏi sengene ua ma tero sa'olo ngini!#Sup. 20:22 34Sanga ua, jou'ongu ma somoara rimoi i'a, ga'a lai nau'u di'a 'oro bangsa rimoi toma bangsa lelegu ma sigolona re sidadi enanga masiretene ma 'umata, ma tero ga'a Ma JOU Ma Jou'ongu Madutu ga'a ngini silamo'o re siḏubuso Unanga gena-ge 'O si'a'a di'a ngini toma Mesir!#Sup. 14:30 Ngini ni oḏi'i masiretene Ma Jou'ongu Madutu 'o sijumu 'Ai kuasa re de-de'e ga'a ma pari cua singadolo ngowa'a Mesir 'aḏi sanga susa re sangisara madutu. Unanga gena-ge ḏi'i 'O si'a'a didina'o-didina'o heranga, ga'a 'i hera-heranga singadolo ngowa'a Mesir 'aḏi dadi mojongo madutu re Unanga 'o parangi ananga di'a ngini. 35Mo-moini gena-ge Ma JOU 'a sijumu ra ngini, la ngini ni waro mode-mode'e mangale pa'i Ma JOU ḇato Ma Jou'ongu Madutu, re ma lelegu 'i cua. 36Da'u diwanga tala, Unanga gena-ge sieanga i'a ngini ni 'isene 'Ai iḏingi di'a 'O doto'o ngini, la ngini ni mete'e Unanga. Re toma dungia nena-ne ngini gena-ge Unanga na'u sijumu 'Ai u'u ma pari cua, re toma u'u gena-ge ma dara, ngini gena-ge Unanga na'u kanau. 37Sababu Unanga 'o dadalara ninga ete re dotumu re ananga manga ju'uda gena-ge Unanga nu'u cumutu di'a 'aḏi dadi 'Ai 'umata. Rai kuasa ma pari cua, Unanga masiretene 'O gasa sisupu ninga ete re dotumu toma Mesir. 38Bangsa-bangsa ga'a lebe lamo'o re lebe te'e reo ngini, Unanga ya'u dusu'u ra ngini ninga momina di'a sigasa ngini ra ananga manga daeraha ga'a Ma JOU ḏuanga i'a 'O pula'a ra ngini, la daeraha 'i dadi ninga warisi ma tero wangere nange-ne. 39Sababu gena-ge wangere nange-ne ngini balasu ni gogono taninga 'akala re sinyingara re sidaioranga awa: Ma JOU pa'i Unanga matengo ḇato, Ma Jou'ongu Madutu toma diwanga re toma dungia; ma lelegu 'i cua. 40Sababu gena-ge, ngini balasu ni mete'e 'Ai huku-hukumu re parenta-parenta ga'a ngoi reta singadolo ra ngini wangere nange-ne, la ngini re ninga ju'uda ḏuanga i'a ni 'ahu la-la re tegoro ti'ara toma daeraha ga'a Ma JOU Ma Jou'ongu Madutu ga'a ngini silamo'o re siḏubuso, Unanga gena-ge 'A pula'a ra ngini di'a kasingado-ngadolo i'a.>>
Limau-limau ga'a sanga saolo toma Ḇanyo Yordan papolo ma wangere ma la'o
4:41-43
41Ḏua 'a Musa 'o siwola i'a limau ro'ange toma Ḇanyo Yordan papolo wangere ma la'o. 42Limau rimoi i'a gena-ge ngowa'a nyengara 'a wiḏi di'a sanga saolo na'o unanga 'o sangaja ua 'o sisengene ngowa'a ga'a 'ai lawana ua. Unanga nyengara 'o wiḏi toma limau rimoi i'a gena-ge, la unanga ngowa'a 'u sisengene ua. 43'A Musa 'o cumutu limau-limau so'o ne: limau Bezer toma tana'a kau'u toma daeraha baulaco di'a suku Ruben; limau Ramot toma daeraha Gilead di'a suku Gad, re limau Golan toma daeraha Basan di'a suku Manasye.
Ma Jou'ongu Madutu 'ai Hukumu 'i sipula'a toma bangsa Israel
44-47
44Ḏua 'a Musa 'o pula'a Ma Jou'ongu Madutu 'ai Hukumu toma bangsa Israel so'o ne: 45Parenta-parenta, huku-hukumu re 'atoranga-'atoranga gena-ge, 'a Musa 'a singadolo toma bangsa Israel wakutu ananga raḏi supu toma Mesir 46re 'aḏi ngadolo toma picaru Ḇanyo Yordan papolo wangere ma la'o, ma'u talaḏi reo limau Bet-Peor. Nagara gena-ge ma siḏa Sihon 'ai daeraha, ngowa'a Amori manga 'olana ga'a 'o parenta toma limau Hesybon. Unanga gena-ge, 'a Musa re bangsa Israel ya'u sita'aloko toma 'orasa ananga raḏi supu toma Mesir tamanga ḏo-ḏagi ma dara. 47Ananga 'aḏi ḏegoro toma 'olana Sihon 'ai tana'a gena-ge, re ḏi'i 'olana Og toma Basan 'ai tana'a. Ananga gena-ge 'olana Amori ga'a 'aḏi tegoro toma Ḇanyo Yordan papolo wangere ma la'o. 48Tana'a gena-ge ma giḏanga mulaingi toma limau Aroer ga'a toma picaru Ḇanyo Arnon ma 'uḏu ngadolo kore mie ngadolo kie Siryon, gena-ge kie Hermon, 49re tana'a mo-moini toma Ḇanyo Yordan kaci moi papolo wangere ma la'o toma kore sara ngadolo Ngoloto Sengene toma kie Pisga ma cimi.
Currently Selected:
Dadunu 4: SAJ
Highlight
Copy
Compare
Share
Want to have your highlights saved across all your devices? Sign up or sign in
2025 Indonesian Bible Society (LAI)
