Dadunu 26
26
Gasa hasili ma mulaingi ra Ma JOU
26:1-11
1<<Wakutu ngini reni osama toma tana'a ga'a Ma JOU, Unanga gena-ge Ma Jou'ongu Madutu ga'a ngini ni silamo'o re siḏubuso, Unanga ḏuanga i'a 'o pula'a tana'a gena-ge ra ngini sa'olo ninga warisi, re ngini na ḏegoro, 2ḏua ngini balasu ni gasa balangu taninga hasili ma mulaingi ga'a na malomu toma tana'a ga'a Ma JOU, Ma Jou'ongu Madutu ga'a ngini silamo'o re siḏubuso, Unanga gena-ge 'a pula'a ra ngini, re ngini balasu ni sigare ma balangu toma karajanga ma dara. Gena ḏua, ngini balasu na gasa mo-moini toma ngi'i ga'a Ma JOU, Unanga gena-ge Ma Jou'ongu Madutu, Unanga 'o ḏuanga i'a 'A sitantukanga di'a ngini balasu ni silamo'o re siḏubuso Unanga. 3Re ngini ni ngadolo talaḏi toma 'imam ga'a siḏagi 'ai munara toma 'orasa gena-ge, re ni kanau ra unanga so'o ne: <Wangere nange-ne, ngoi to siajele ra Ma JOU, Ma Jou'ongu Madutu ga'a ngene wo silamo'o re siḏubuso, mangale ngoi reto osama toma daeraha ga'a Ma JOU ro sijaji rema sasi tananga ngimo-ngimono, Unanga ḏuanga i'a 'a pula'a ra ngene.> 4Dadi 'imam gena-ge balasu 'o dawongo ma karajanga taninga giama re sigare toma jou-jou ma ngi'i ma biono di'a Ma JOU, Unanga gena-ge Ma Jou'ongu Madutu ga'a ngini ni silamo'o re siḏubuso. 5Gena ḏua, ngini balasu ni kanau ra Ma JOU, Unanga gena-ge Ma Jou'ongu Madutu ga'a ngini ni silamo'o re siḏubuso, so'o ne: <'Ari ḇaḇa ma siḏa ngowa'a Aram, ngowa'a paradidu. Unanga 'o tagi toma Mesir rai ngitu re ngale ga'a ngowa'a repe ua re 'aḏi tegoro da'a sa'olo ngowa'a tagi-tagi ino.#Do. 46:27 Mada'a toma Mesir unanga 'o dadi bangsa rimoi ga'a lamo'o, te'e re ngowa'a manga repe masala. 6Toma 'orasa gena-ge, ngowa'a Mesir 'aḏi sikisa re sito-to'u ngomi singadolo ngomi mi dadi manga budaka re ananga gena-ge 'aḏi soma'a ngomi mi munara tu-tubuso. 7Dadi ngomi mi maḏigaro'o ra Ma JOU, Unanga gena-ge Ma Jou'ongu Madutu ga'a minga ngimo-ngimono 'aḏi silamo'o re siḏubuso. Ḏua Ma JOU 'o 'isene minga iḏingi re Unanga 'o oḏi'i minga sangisara re kangela re ngowa'a Mesir mu'u sito-to'u. 8Ḏua Ma JOU 'o gasa ngomi sisupu toma Mesir, Unanga 'o sijumu 'Ai kuasa lamo'o re de-de'e ga'a ma pari cua singadolo ngowa'a Mesir 'aḏi dadi mojongo madutu re ḏi'i Unanga 'o 'a'a didina'o heranga re ga'a 'i hera-heranga. 9Unanga 'o sigasa ngomi toma ngi'i nena-ne, re 'O pula'a daeraha nena-ne ga'a ma tana'a lai rousu ga'a ri romanga reo haiwani piara re tana'a ma hasili lai repe. 10Sababu gena-ge, 'ane ngomi mi gasa minga tana'a ma hasili ma mulaingi ga'a Ma JOU ro pula'a ra ngomi, ya Ma JOU.> Gena ḏua, ngini balasu na sigare toma jou-jou ma ngi'i di'a Ma JOU, Unanga gena-ge Ma Jou'ongu Madutu ga'a ngini ni silamo'o re siḏubuso kara ngini balasu ni mapagara ninga biono singadolo toma tana'a ra Ma JOU, Unanga gena-ge Ma Jou'ongu Madutu ga'a ngini ni silamo'o re siḏubuso. 11Ḏua, ngini re ninga ngitu re ngale, re ḏi'i ngowa'a suku Lewi re ngowa'a tagi-tagi ino ananga gena-ge ga'a 'age taninga limau, ngini mo-moini balasu ni maroanga sababu hasili ma la-la ga'a Ma JOU, Unanga gena-ge Ma Jou'ongu Madutu ro pula'a ra ngini.>>#Dad. 12:18, 14:23
Jou-jou balangu moi toma balangu nyagi moi
26:12-15
12<<Toma musungu ma jelele i'a, ngini ninga balangu moi toma balangu nyagi moi taninga tana'a ma hasili, ngini balasu na gasa re pula'a sa'olo ninga jou-jou ra Ma JOU. Mada'a toma musungu ma soi ro'ange ma jelele i'a, ngini ninga balangu moi toma balangu nyagi moi gena-ge, ngini balasu na gasa re pula'a toma ngowa'a Lewi, ngowa'a tagi-tagi ino, ngowa'a daga re toma balo-balo, la ananga nyengara sanga oromo taninga limau singadolo 'aḏi ḏugala. 13Gena ḏua, ngini balasu ni kanau ra Ma JOU, Unanga gena-ge Ma Jou'ongu Madutu ga'a ngini ni silamo'o re siḏubuso rema betongo so'o ne: <Jou-jou gena-ge ga'a siwola i'a ra Ma JOU, Ngoi reta sisoi'i tari wala kara ngoi reto pula'a toma ngowa'a Lewi, re toma ngowa'a tagi-tagi ino, ngowa'a daga re balo-balo, mete'e 'oru ga'a Ma JOU no parenta ra ngoi. Ngoi ta mete'e re sidaioranga ua 'Ani parenta gena-ge. 14Toma 'orasa ngoi to sanga duka, ngoi to oromo ua balangu toma jou-jou gena-ge ga'a 'i siwola i'a ra Ma JOU, bolo toma 'orasa ngoi to dadi najis ngoi to sisoi'i tala jou-jou gena-ge tari wala, re ḏi'i ma balangu 'oru ḇato ta sipula'a ua sa'olo jou-jou toma ngowa'a senge-sengene. Mada'a ngoi to mete'e Ma JOU 'ai iḏingi, Unanga gena-ge Ma Jou'ongu Madutu ga'a ngoi to silamo'o re siḏubuso, ngoi to siḏagi mo-moini ga'a Ma JOU na parenta ra ngoi. 15Tani wala toma soroga ma dara ino, Ma JOU no oḏi'i re No sibarakati 'Ani 'umata Israel, re tana'a ga'a Rena pula'a ra ngomi, ma tero sa'olo Ma JOU Reno 'a'a jaji rema sasi taminga ngimo-ngimono, tana'a gena-ge rimoi ga'a ma tana'a lai rousu ga'a ri romanga reo haiwani piara re tana'a ma hasili lai repe.>>
Demo ma ḏo-ḏogumu ra Ma JOU 'ai hukumu
16<<Toma wangere nange-ne, Ma JOU, Unanga gena-ge Ma Jou'ongu Madutu ga'a ngini ni silamo'o re siḏubuso, Unanga gena-ge 'O parenta ngini balasu ni siḏagi hukumu re 'atoranga gena-ge. Sababu gena-ge, ngini balasu ni siḏagi tau-taunu mo-moini gena-ge reninga 'akala re sinyingara mo-moini re fikirana mo-moini. 17Toma wangere nena-ne, ngini reni kanau mangale Ma JOU, Unanga gena-ge 'O dadi Ma Jou'ongu Madutu ga'a ngini ni silamo'o re siḏubuso, re ngini ḏi'i ni kanau mangale ninga 'ahu ma ngo'omo ḏuanga i'a 'i mete'e 'oru ga'a Unanga 'a sijumu re ni siḏagi 'Ai hukumu, parenta re 'atoranga, re ni mete'e 'Ai iḏingi. 18Re ḏi'i toma wangere nena-ne, Ma JOU ro kanau mangale pa'i ngini ḇato ni dadi 'Ai 'umata masiretene. Gena-ge mete'e 'Ai jaji ga'a Unanga ro 'a'a pasala ḏua ra ngini, re ḏi'i ngini balasu ni siḏagi 'Ai parenta mo-moini. 19Na'o ngini ni 'a'a so'o gena, Unanga ḏuanga i'a 'o sitede ngini sie toma bangsa mo-moini ga'a Unanga ya'u sidadi. Ḏua bangsa-bangsa ḏuanga i'a 'aḏi puji ngini re silamo'o ngini, re ngowa'a nu'u sayanga. Dadi ngini ni dadi 'umata ga'a siwola i'a di'a Ma JOU, Unanga gena-ge Ma Jou'ongu Madutu ga'a ngini silamo'o re siḏubuso, gena-ge mete'e 'oru ga'a Unanga gena-ge ro 'a'a jaji ra ngini.>>
Currently Selected:
Dadunu 26: SAJ
Highlight
Copy
Compare
Share
Want to have your highlights saved across all your devices? Sign up or sign in
2025 Indonesian Bible Society (LAI)
