Dadunu 23
23
Ngowa'a ga'a osama nyo-nyoimi yoḏu'u ra Ma JOU 'ai 'umata
1'A Musa 'o kanau moju toma ngowa-ngowa'a Israel rema betongo so'o ne: <<Matengo i'a mai ua ga'a 'ai dalaḏi 'i siwejere bolo sanga kabiri ḏua, ananga gena-ge 'aḏi osama nyo-nyoimi yoḏu'u ra Ma JOU 'ai 'umata. 2Matengo i'a mai ua ga'a 'o siḏe-ḏegoro i'a wakutu ma ḇaḇa re ngina ga'a molo'ara nyangu, ananga gena-ge 'aḏi osama nyo-nyoimi yoḏu'u ra Ma JOU 'ai 'umata. Kalaha ananga manga ju'uda singadolo nani soi nyagi moi, ananga gena-ge 'aḏi osama nyo-nyoimi yoḏu'u ra Ma JOU 'ai 'umata! 3Matengo i'a mai ua ga'a ngowa'a Amon bolo Moab#Do. 19:30-38 ananga gena-ge 'aḏi osama nyo-nyoimi yoḏu'u ra Ma JOU 'ai 'umata kasingado-ngadolo i'a. Kalaha ananga manga ju'uda mo-moini singadolo nani soi nyagi moi, ananga gena-ge 'aḏi osama nyo-nyoimi yoḏu'u ra Ma JOU 'ai 'umata, 4sababu ananga 'aḏi oḏu'u pula'a ngo-ngoromo bolo ḇanyo ra ngini wakutu ngini toma ḏo-ḏagi ma dara supu toma Mesir. Sidogo ḏi'i, ananga 'aḏi sewa 'a Bileam di'a sikutuki ngini. 'A Bileam, Beor 'ai ngowa'a toma limau Petor toma daeraha Mesopotamia. 5Mada'a Ma JOU, Ma Jou'ongu Madutu ga'a ngini ni silamo'o re siḏubuso, Unanga gena-ge 'o 'isene ua 'a Bileam. Mada'a siḏibo ḏi'i, Ma JOU, Ma Jou'ongu Madutu ga'a ngini ni silamo'o re siḏubuso, Unanga 'o singali kutuki gena-ge singadolo 'i dadi barakati, sababu Ma JOU, Ma Jou'ongu Madutu ga'a ngini ni silamo'o re siḏubuso, Unanga gena-ge 'o dadalara ngini. 6Ma di'ara ngini ni dadi bangsa rimoi, awa ni riono bangsa gena-ge bolo si'a'a ananga manga 'ahu 'i sanangi. 7Awa ni sipa-pake ua ngowa'a Edom sababu ananga gena-ge ninga ioronongoḏu.#Do. 36:1 Awa ni sipa-pake ua ḏi'i ngowa'a Mesir, sababu 'au nga'ene ngini ni dadi ngowa'a tagi-tagi ino tamanga daeraha. 8Ngowa'a Edom re ngowa'a Mesir, ananga gena-ge manga ju'uda mulaingi ma soi ro'ange re sino nyengara 'aḏi dadi ma JOU 'ai 'umata.
Sordado manga suyu'u balasu 'i si'ofi taunu
9<<Toma 'orasa ngini ni tegoro taninga suyu'u wakutu ni parangi nyangu taninga lawana, ngini balasu ni maki-kiḏanga toma 'oru ḇato ga'a 'i si'a'a ngini ni dadi najis. 10Na'o matengo i'a 'o dadi najis sababu 'o sisupu 'ai ḇa-ḇanyo wakutu 'o otu, unanga balasu 'o sisoi'i tala suyu'u ma daeraha re 'o tegoro toma ngi'i gena-ge ma ḏuḏunu. 11Mada'a, toma 'orasa wangere soḏu nyangu, unanga balasu ma'ori'i kara toma 'orasa wangere soḏu, unanga nyengara 'o maḏibo toma suyu'u ma daeraha.
12Ngini balasu ni sidodahe ninga ngi'i toma suyu'u ma ḏuḏunu di'a pa'ala ḇanyo lamo'o. 13Na'o ni tagi toma ḏuḏunu balasu ni gasa ninga parangi ma pakakasa re ḏi'i ate ma jule di'a sipaiti tana'a ma duso'o re sijujumu wakutu ni pa'ala ḇanyo lamo'o togumu i'a. 14Sababu taninga suyu'u ma daeraha, Ma JOU 'o mamete'e ra ngini di'a saolo ngini re 'o pula'a 'utungu ra ngini taninga lawa-lawana, Unanga gena-ge Ma Jou'ongu Madutu ga'a ngini ni silamo'o re siḏubuso. Dadi jaga la-la ino, la ninga suyu'u ma daeraha 'i tatapu 'ofi-'ofi. Awa singadolo rema 'ori i'a ga'a Ma JOU 'a emo-emono taninga sigolona, la Unanga 'o sisoi'i tala ngini awa.>>
Budaka ga'a dadalara ro wiḏi
15'A Musa 'o kanau moju toma ngowa-ngowa'a Israel rema betongo so'o ne: <<Na'o budaka matengo 'o wiḏi sisoi'i tala 'ai tuanga re 'o sapolo ra ngini di'a golo'o saolo, awa ni siḏibo unanga tai tuanga. 16Unanga nyengara 'o tegoro taninga limau rimoi i'a le'a ḇato ga'a unanga 'o mau, re ngini awa ni sito'u-to'u unanga. 17Ngowa'a Israel matengo, bae na-nau'u bae we-were'a, awa ni wu'unu ninga diri ra Ma JOU 'ai wala. 18Pipisi ga'a ngini sanga sababu ni wu'unu ninga diri, awa na gasa toma Ma JOU 'ai wala re ni pake di'a fangu ninga jaji ra Ma JOU, Ma Unanga gena-ge Ma Jou'ongu Madutu ga'a ngini ni silamo'o re siḏubuso. Sababu pipisi gena-ge Ma JOU 'a emo-emono, Unanga gena-ge Ma Jou'ongu Madutu ga'a ngini ni silamo'o re siḏubuso. 19Awa ngini ni singa'unu ma rete taninga ngowa-ngowa'a Israel bae pipisi bae 'oru ḇato ga'a sibau'u re nyengara ni sipula'a ma rete. 20Ngini nyengara ni golo'o ma rete toma ngowa'a tagi-tagi ino, mada'a taninga ngowa'a Israel awa ni golo'o ma rete—la Ma JOU, Ma Jou'ongu Madutu, Unanga gena-ge 'o sibarakati ngini ninga munara ma dara, toma daeraha ga'a ngini ḏuanga i'a ni dongosama re ḏegoro.>>
Mangale jaji
23:21-23
21'A Musa 'o kanau moju toma ngowa-ngowa'a Israel rema betongo so'o ne: <<Na'o ngini ni 'a'a jaji ra Ma JOU, Ma Jou'ongu Madutu ga'a ngini silamo'o re siḏubuso, ngini balasu ni sitotomo caiti ninga jaji, sababu tantu ḏua Ma JOU, Ma Jou'ongu Madutu ga'a ngini silamo'o re siḏubuso ḏuanga i'a, Unanga ḏuanga i'a 'a tuntutu ngini ni siḏagi mete'e ninga jaji, singadolo hali gena-ge ngini ni dadi sala re 'a'a ḏosa na'o ni sitotomo ua. 22Mada'a na'o ngini ni 'a'a jaji ua, hali gena-ge 'i dadi ḏosa ua ra ngini. 23Jaja la-la jaji 'oru ḇato ga'a 'i supu taninga madanga masiretene, sababu ngini balasu na siḏagi, sababu ngini ni sibere ninga jaji reninga mau masiretene ra Ma JOU, Ma Jou'ongu Madutu ga'a ngini ni silamo'o re siḏubuso, re jaji gena-ge ni sikanau reninga madanga masiretene.>>
'Atoranga mangale 'utu'u ma hasili toma ngowa'a lelegu manga guḏa
24Na'o ngini ni tola'a i'a ngowa'a lelegu manga guḏa 'anggur, ngini nyengara ni oromo 'anggur mete'e ninga mau, mada'a awa na gogono taninga sa-sao. 25Na'o ngini ni tola'a i'a ngowa'a lelegu manga guḏa gandum ga'a 'aḏi 'utu'u nyangu, ngini nyengara ni 'utu'u enanga ma sowo'o rani giama, mada'a ngana na tola'a yoḏu'u reninga peḏa ngowa'a lelegu manga gandum ma lese-lese gena-ge.>>
Currently Selected:
Dadunu 23: SAJ
Highlight
Copy
Compare
Share
Want to have your highlights saved across all your devices? Sign up or sign in
2025 Indonesian Bible Society (LAI)
