Dadunu 21
21
Ma'u sengene ma hali ga'a putusu yoḏu'u
1'A Musa 'o kanau toma ngowa-ngowa'a Israel rema betongo so'o ne: <<Na'o toma daeraha Kanaan ma dara ga'a Ma JOU ḏuanga i'a 'A pula'a ra ngini di'a ḏegoro, Unanga gena-ge Ma Jou'ongu Madutu ga'a ngini ni silamo'o re siḏubuso, 'age rema ngowa'a ga'a ngowa'a 'u sengene toma daeraha ma rurubu re waro ua 'a guna 'o sisengene ngowa'a gena-ge. 2Ḏua ninga bi-biri'i re ninga juruhakimi balasu 'aḏi tagi tuga mulaingi toma ngowa'a sengene 'ai mayeti ma ngi'i singadolo toma limau-limau ga'a ma'u cori. 3Ḏua limau ga'a lebe cori gena-ge, ma bi-biri'i balasu 'aḏi disa sapi ma were'a ra-ramasa ie rimoi ga'a simunara somoi i'a mai nyangu, ga'a sigare ma gading nyangu. 4Re Ngowa'a bi-biri'i toma limau gena-ge ananga balasu 'aḏi gasa sapi ma were'a ra-ramasa ie gena-ge toma picaru rimoi cori ḇanyo ga'a kama dudungu ua re ma tana'a ngowa'a ya pajeko soi rimoi i'a mai nyangu bolo siso'ana 'oru ḇato nyangu. Toma picaru gena-ge, ananga balasu 'aḏi sipoti sapi gena-ge ma camala ma ḏuḏunu. 5'Imam-'imam ngowa'a suku Lewi ḏi'i balasu 'aḏi tagi toma ngi'i gena-ge, sababu Ma JOU, Unanga gena-ge Ma Jou'ongu Madutu ga'a ngini ni silamo'o re siḏubuso, Unanga gena-ge ro cumutu 'imam gena-ge di'a siḏagi 'Ai mau re sibarakati pake 'Ai lomanga re 'aḏi sipula'a putusanga di'a hali mo-moini re hali mo-moini mangale ngowa'a 'aḏi ma'u 'oto. 6Ḏua limau ga'a lebe cori ma bi-biri'i, ananga mo-moini balasu 'aḏi soso'o manga giama toma sapi ma were'a ra-ramasa ie gena-ge ma re'u 7re balasu 'aḏi kanau, <Ngomi ua ga'a mi sisengene ngowa'a gena-ge, re ngomi mi maoḏi'i ua 'a guna ga'a si'a'a gena-ge. 8Ya Ma JOU, No dawongo jou-jou gena-ge, la No singi-ngiranga ma ḏosa gena-ge di'a 'Ani 'umata ga'a No situusu toma Mesir. Awa No aje ngomi minga sala di'a sisengene ngowa'a kai sala ua Tani ngowa'a Israel manga sigolona. Dadi No singi-ngiranga ma ḏosa di'a sisengene ngowa'a gena-ge> 9Dadi rema duhu so'o gena-ge, ngini ni si'a'a 'oru ga'a banari ra Ma JOU 'ai momina, la ngini ni sigofi ngowa'a kama sala ua 'ai ngaunu taninga sigolona.>>
'Atoranga mangale we-were'a ga'a sanga dawana
10<<Si'ade-'ade ngini ni tagi parangi taninga lawana re Ma JOU Ma Jou'ongu Madutu ga'a ngene silamo'o re siḏubuso, Unanga 'o riono ngini ni sita'aloko ananga singadolo ananga mamuni'a ngini na'u dawana, 11ḏa 'age rema we-were'a rousu matengo toma dawana ma sigolona ga'a ngini nimi nyafusu re mau ni sidadi sa'olo ninga were'a, 12re ni gasa we-were'a gena-ge taninga wala. 'Age munanga masiretene balasu mo guti 'ami utu, tola'a 'ami kulucimi'i, 13re mangali 'ami baju ga'a ma pake wakutu munanga sanga dawana. Munanga balasu mo tegoro taninga wala re mo duka 'ami bi-biri'i ga'a raḏi sengene ma di'ara ngara moi. Gena ḏua, ngana nyengara no molo'ara munanga kara munanga mo dadi 'ani were'a re ngana no dadi 'ami nau'u. 14Na'o ḏuanga i'a, ngana reno oḏu'u munanga, ngana nyengara no soma'a munanga mo tagi bebasa le'a ḇato. Mada'a munanga, ngana nimi wu'unu reo salaka yoḏu'u, bolo ngana nimi sipula'a mara'a yoḏu'u sa'olo budaka sababu munanga ngana nimi pakisa otu malomu sa'olo ninga were'a.
'Atoranga mangale ngowa'a ma jomolo 'ai warisi
15<<Na'o ngowa'a Israel matengo rai were'a nga muḏiḏi, re ananga nga muḏiḏi matai sanga ngowa'a nau'u, mada'a ngowa'a nau'u ma jomolo toma were'a ga'a ngowa'a matengo gena-ge mi dadalara siḏi ua. 16Dadi wakutu unanga gena-ge mau 'o sibalangu 'ai warisi tai ngowa-ngowa'a nau'u mo-moini, awa unanga 'o pa'ala kaci moi sababu unanga 'o pula'a ngowa'a nau'u ma jomolo 'ai balangu toma ngowa'a nau'u tai were'a ga'a mi dadalara lai siḏi. Siḏibo ḏi'i unanga balasu 'o pula'a balangu gena-ge toma ngowa'a nau'u ma jomolo tai were'a ga'a unanga mi dadalara siḏi ua. 17Mada'a ngowa'a nau'u ma jomolo 'ai haku ma ḇaḇa balasu 'akoru. Dadi, kalaha ngowa'a nau'u ma jomolo, unanga gena-ge 'ai ngina ga'a were'a nau'u mi dadalara siḏi ua, unanga balasu 'o pula'a balangu sidu'o soi ḏiḏi tai warisi mo-moini ra unanga sababu ngowa'a nau'u gena-ge ngowa'a nau'u ma jomolo.>>
'Atoranga mangale ngowa'a nau'u ga'a tata malawana
18Na'o ḇaḇa matengo i'a rai ngowa'a nau'u ga'a tata malawana, ga'a 'isene ua 'ai ḇaḇa re ngina manga demo, re kalaha ananga 'u ca'olo, unanga gena-ge 'o 'isene ananga ua, 19dadi 'ai ḇaḇa re ngina balasu 'aḏi gu'u unanga sisupu re gasa toma limau ma bi-biri'i—bi-biri toma ngalana lamo'o ga'a ananga 'aḏi tegoro 'age, 20Ananga balasu 'aḏi siajele toma limau gena-ge ma bi-biri—bi-biri'i so'o ne: < Minga ngowa'a nau'u nena-ne 'o nyanyaḏi malawana singadolo 'o dadi tata malawana re 'isene ngomi ua; unanga pa'i ngowa'a nau'u ga'a 'eto-'etolo re da-danata ḇato.> 21Gena ḏua, ngowa'a nau'u gena-ge, na-nau'u toma limau gena-ge balasu ya'u poini reo maḏi singadolo sengene. Rema duhu so'o gena-ge, ngini ni singi-ngiranga kajahatana taninga sigolona, re ngowa'a mo-moini toma Israel ḏuanga i'a ya 'isene re 'aḏi dadi mojongo.>>
'Atoranga ma lelegu
21:22-23
22'A Musa 'o kanau moju toma ngowa'a Israel rema betongo so'o ne: <<Na'o matengo i'a sanga hukumu sengene sababu 'a'a kajahatana, re unanga gena-ge ngini nu sisengene kara ni sikole 'ai mayeti toma ngasu'u, 23'ai mayeti gena-ge sieanga i'a yoḏu'u toma lobi'i ma giḏanga. Mada'a ngini balasu ni siotomo wangere gena-ge ḏua. Mayeti ga'a 'i sikole toma ngasu'u 'i sisapolo Ma Jou'ongu Madutu 'ai kutuki toma daeraha. Dadi, siotomo ḇato mayeti gena-ge, la ngini ni sinajis ninga daeraha awa, daeraha gena-ge ga'a Ma JOU 'a pula'a ra ngini sa'olo ninga warisi, Unanga gena-ge Ma Jou'ongu Madutu ga'a ngini ni silamo'o re siḏubuso#Gal. 3:13.
Currently Selected:
Dadunu 21: SAJ
Highlight
Copy
Compare
Share
Want to have your highlights saved across all your devices? Sign up or sign in
2025 Indonesian Bible Society (LAI)
