Dadunu 2
2
Ḏo-ḏagi toma daeraha baulaco ma jarita
1Gena ḏua, ngene wo macelolo re wo tagi toma daeraha baulaco, papolo Ngoloto Teberau, mete'e Ma JOU 'ai parenta ra ngoi. Ma di'ara ngene nanga ḏo-ḏagi 'i sigoloḏi daeraha sau-sau toma nagara Edom.#2:1 Seir
2Ḏua Ma JOU 'o kanau ra ngoi so'o ne: 3<<Ti'ara ḏua, ngini ni tagi sigoloḏi daeraha sau-sau nena-ne, dadi nange-ne ni macelolo papolo kore mie 4Soma'a bangsa Israel, so'o ne: <Ti'ara riwara, ngini ḏuanga i'a ni tagi mete'e ninga ioronongoḏu manga daeraha, ninga ju'uda 'a Esau, ga'a tegoro toma nagara Edom.#2:4 Seir Ananga ḏuanga i'a 'aḏi dadi mojongo sababu ngini. Mada'a kalaha so'o gena, ngini balasu ni ma'istiari ino: 5Awa ngini ni parangi ananga, sababu Ngoi to pula'a ua manga tana'a sata moi i'a mai ua ra ngini, sababu Ngoi reto pula'a daeraha sau-sau toma nagara Edom#2:5 Edom bolo Seir ra Esau re 'ai ju'uda sa'olo ananga manga warisi. 6Ngini balasu ni tibo ngo-ngoromo ra ananga reo pipisi, la ngini nyengara ni sanga oromo, re ḏi'i balasu ni tibo ḇanyo reo pipisi, la ngini nyengara ni sanga ka'e. 7Sababu Ma JOU, Ma Jou'ongu Madutu ga'a ngini ni silamo'o re siḏubuso, Unanga 'o sibarakati taninga munara mo-moini. Unanga 'o waro 'oru 'i dadi taninga ḏo-ḏagi mete'e daeraha baulaco lamo'o gena-ge. Ma JOU, Ma Jou'ongu Madutu ga'a ngini silamo'o re siḏubuso, Unanga gena-ge 'o mamete'e ra ngini singadolo ngini kama basono kuranga ua 'oru ḇato ma di'ara musungu nyagi rata.> >>
8Dadi ngene wo tagi sisoi'i tala nanga ioronongoḏu 'a Esau 'ai ju'uda ga'a tegoro toma nagara Edom, sisoi'i tala ḏi'i ngo'omo da'a toma Picaru Yordan ino, gena-ge da'a ba-balene Elat re Ezion-Geber ino. Gena ḏua, ngene wo dowanga nanga ḏo-ḏagi wo tagi seko papolo kore mie toma daeraha Moab, gena-ge ma daeraha baulaco. 9Ḏua Ma JOU 'o kanau ra ngoi: <<Awa ni lawana Moab bolo ni parangi ananga, sababu Ngoi to pula'a tana'a ceka'a i'a mai ua tamanga nagara sa'olo ngini ninga warisi. Sababu Ngoi Reto pula'a limau Ar, ngowa'a Moab manga limau ma lamo'o i'a, re manga nagara gena-ge mo-moini di'a Lot 'ai ju'uda, ananga gena-ge ngowa'a Moab, sa'olo manga warisi.>>
10(Ma siḏa ngowa'a Emim 'aḏi tegoro da'a, bangsa ga'a lamo'o re manga repe masala, manga gau'u ma tero ngowa'a Enak. 11Ananga gena-ge 'aḏi aje ma tero ngowa'a Enak, re ḏi'i si'aro'o ngowa'a Refaim, mada'a ngowa'a Moab 'aḏi si'aro'o ananga gena-ge ngowa'a Emim. 12Re ma siḏa ḏi'i, ngowa'a Hori 'aḏi tegoro toma nagara Edom,#2:12 Seir ma tero Edom mada'a ngowa'a Esau 'ai ju'uda, ananga gena-ge 'aḏi dusu'u re singi-ngiranga ngowa'a Hori toma nagara Edom singadolo nagara Edom 'i dadi ngowa'a Esau manga tana'a. Maha ngowa'a Israel ḏuanga i'a 'aḏi si'a'a ma tero toma nagara Kanaan ga'a Ma JOU ro pula'a di'a ananga sa'olo manga warisi.)
13'A Musa dadunu 'o kanau moju ra ngowa'a Israel ma betongo so'o ne: <<Ḏua Ma JOU 'o kanau so'o ne: <Nange-ne ni maḏu-ḏuanga ḏua di'a ni iwanga ḇanyo Zered.> >> Dadi ngene wo iwanga ḇanyo Zered. 14Ngene nanga ḏo-ḏagi mulaingi toma Kades-Barnea singadolo ngene wo sapolo toma ḇanyo Zered kaci moi, ma di'ara musungu nyagi ro'ange re tu'angere singadolo ju'uda manga sordado ma nga-ngamasa mo-moini 'aḏi sengene ma tero sa'olo Ma JOU ro 'a'a jaji ra ananga rema sasi. 15Sababu mode-mode'e Ma JOU masiretene ya'u lawana ananga gena-ge re Unanga ya'u sihukumu Rai kuasa lai te'e, la ananga mo-moini 'aḏi sengene singadolo mo-moini gena-ge 'aḏi cua ḏua toma suyu'u ma daeraha.
16Gena ḏua wakutu bangsa gena-ge manga sordado raḏi moini, 17Ma JOU 'o kanau ra ngoi ma betongo so'o ne: 18<<Wangere nange-ne, ngini mo-moini ḏuanga i'a no osama nagara Moab co-cori limau ma lamo'o ga'a si'aro'o Ar. 19Wakutu ngini ḏuanga i'a ni ngadolo co-cori ngowa'a Amon manga nagara. Awa ni lawana bolo ni parangi ananga, sababu Ngoi to pula'a tana'a ceka'a i'a mai ua tamanga nagara sa'olo ngini ninga warisi. Sababu Ngoi Reto pula'a nagara gena-ge mo-moini di'a Lot 'ai ju'uda, gena-ge ngowa'a Amon, sa'olo ananga gena-ge manga warisi.>>
(20Daeraha gena-ge ḏi'i 'i dadi ngowa'a Refaim manga daeraha. Ma siḏa ngowa'a Refaim 'aḏi tegoro da'a - mada'a ngowa'a Amon ya'u si'aro'o ngowa'a gena-ge Zamzumim. 21Ngowa'a Refaim gena-ge bangsa ga'a lamo'o re manga repe masala, manga gau'u ma tero ngowa'a Enak. Mada'a Ma JOU 'o singi-ngiranga ngowa'a Refaim singadolo ngowa'a Amon nyengara 'aḏi ra-rabasa tana'a gena-ge kara ya ḏegoro. 22So'o gena ḏi'i, Ma JOU 'o si'a'a di'a ngowa'a Edom, 'a Esau 'ai ju'uda, ga'a tegoro nagara Edom. Ma JOU 'o singi-ngiranga ngowa'a Hori, singadolo ngowa'a Edom 'aḏi ra-rabasa tana'a gena-ge re ya ḏegoro da'a singadolo nange-ne. 23Ma tero ḏi'i di'a ngowa'a Awi. Ma siḏa, ananga 'aḏi tegoro toma gamu-gamu toma Ngoloto Golona ma 'uḏu papolo kore sara giḏanga singadolo limau Gaza. Maha ngowa'a Filistin ga'a sapolo toma pulo Kreta,#2:23 Kreta ma tero Kaftorananga gena-ge raḏi singi-ngiranga ngowa'a Awi re 'aḏi ra-rabasa manga tana'a singadolo ya ḏegoro da'a.)
24Togumu i'a ngene wo sitola'a i'a nagara Moab, 'a Musa 'o kanau ma betongo so'o ne: <<Ma JOU 'o kanau ra ngene, <Nange-ne, ngini ni tagi iwanga ḇanyo Arnon. Ngoi, Ma JOU ḏuanga i'a to sipula'a 'a Sihon, ngowa'a Amori manga 'olana ga'a 'o parenta toma limau Hesybon, simete'e soi moi rai nagara ḏi'i. Dadi ngini balasu ni parangi ananga kara na ḏegoro manga nagara. 25Mulaingi wangere gena-ge, Ngoi Ma JOU ḏuanga i'a To si'a'a bangsa-bangsa le'a ḇato, ananga gena-ge 'aḏi basono mojongo singadolo terewete sababu ngini. Ananga matengo re matengo 'aḏi terewete sababu mojongo, wakutu 'aḏi 'isene jarita mangale ngini.> >>
Israel sita'aloko 'Olana Sihon
(Nyo. 21:21-30)
26Gena ḏua, toma daeraha baulaco ga'a si'aro'o Kedemot, ngoi to siḏingoto 'utusana nga muḏuo i'a 'aḏi tagi ra 'Olana Sihon toma limau Hesybon di'a golo'o dame re ma betongo so'o ne: 27<<Tuanga, no sipula'a loasa ngomi tagi tola'a i'a 'ani nagara. Ngomi ḏuanga i'a mi tagi siboloto ḇato toma ngo'omo lamo'o re mi tagi seko ua kuḇali bolo kuwiḏa toma ngo'omo gena-ge. 28Ngomi ḏuanga i'a mi fangu ngo-ngoromo ga'a ngomi mi oromo re mi fangu ḇanyo ga'a ngomi mi ka'e. Ngomi pa'i paralu ḇato mi tola'a i'a 'ani nagara nena-ne, 29ma tero 'a Esau 'ai ju'uda ga'a 'aḏi tegoro toma nagara Edom re ngowa'a Moab ga'a 'aḏi tegoro toma limau Ar, ananga gena-ge raḏi pula'a loasa ra ngomi di'a tola'a i'a ananga manga daeraha. Dadi sieanga i'a ngomi mi tola'a i'a 'ani nagara singadolo ngomi mi iwanga Ḇanyo Yordan di'a osama toma tana'a ga'a Ma JOU, Ma Jou'ongu Madutu ga'a ngomi mi silamo'o re siḏubuso, Unanga gena-ge ḏuanga i'a 'a pula'a ra ngomi.>>
30Mada'a 'a Sihon, 'olana Hesybon, unanga 'o simaha ua ngene wa tola'a i'a unanga 'ai nagara gena-ge sababu Ma JOU, Ma Jou'ongu Madutu ga'a ngini silamo'o re siḏubuso, Unanga gena-ge 'o si'a'a unanga 'ai 'akala re sinyingara te'e, la Unanga 'o sipula'a 'olana gena-ge ra ngene ma tero sa'olo ga'a 'i dadi toma 'orasa nange-ne.
31Gena ḏua, Ma JOU 'o kanau ra ngoi, 'a Musa ma betongo so'o ne: <<Ngana balasu no waro! 'Olana Sihon rai nagara, Ngoi ḏuanga i'a Ta pula'a ra ngana. Dadi ngana mulaingi no parangi re ngini ni ḏegoro nagara gena-ge.>> 32Ḏua, 'Olana Sihon 'o sisoi'i tala 'ai limau mamete'e rai sordado mo-moini, di'a 'aḏi parangi ngene ga'a co-cori limau Yahas. 33Mada'a Ma JOU, Ma Jou'ongu Madutu ga'a ngene wo silamo'o re siḏubuso, Unanga gena-ge 'O sipula'a 'Olana Sihon ra ngene. Dadi ngene wo sita'aloko unanga rai ngowa-ngowa'a nau'u re 'ai sordado mo-moini. 34Toma 'orasa gena-ge ḏi'i, ngene wo rabasa re siwejere manga limau mo-moini, re wo sisengene limau ma manusia mo-moini: bae na-nau'u, bolo we-were'a re ngowa 'olo ḏi'i singadolo ngowa'a matengo i'a mai riwara ga'a 'ahu. 35Pa'i manga haiwani ḇato 'i 'ahu moju, ngene wa 'oro re manga limau-limau ma 'ori i'a rana re 'oru ḇato ma lelegu, ngene wa rabasa. 36Ma JOU, Ma Jou'ongu Madutu ga'a ngene wo silamo'o re siḏubuso, Unanga gena-ge 'o sipula'a limau mo-moini gena-ge ra ngene: mulaingi toma limau Aroer ga'a toma Picaru Arnon ma dere re limau toma picaru ma golona gena-ge, singadolo toma daeraha Gilead; limau rimoi i'a mai ua ga'a ma gegelo lai te'e ga'a ngene nga'unu ua wa siwejere. 37Mada'a ngene wo co-cori ua ngowa'a Amon manga tana'a: bae toma ḇanyo Yabok ma 'uḏu, bolo limau-limau toma daeraha kie-kie bolo toma ngi'i lelegu le'a ḇato ga'a Ma Jou'ongu Madutu ga'a ngene wo silamo'o re siḏubuso, Unanga gena-ge 'a simaha ngene ua.
Currently Selected:
Dadunu 2: SAJ
Highlight
Copy
Compare
Share
Want to have your highlights saved across all your devices? Sign up or sign in
2025 Indonesian Bible Society (LAI)
