Dadunu 10
10
Ma soi ḏiḏi 'a Musa 'o dawongo Ma Jou'ongu Madutu 'ai Parenta Nyagi Moi
10:1-11
1<<Toma 'orasa gena-ge, Ma JOU 'O kanau ra ngoi, <Musa, ngana no sonoto'o maḏi bela ḏiḏi ma tero ma mulaingi, re no 'a'a ḏi'i burua ate rimoi di'a maḏi bela ma ngi'i. Gena ḏua, no gasa sie maḏi bela ḏiḏi gena-ge ra Ngoi toma kie ma tubu. 2Toma maḏi bela ḏiḏi gena-ge, Ngoi, Ma JOU ḏuanga i'a To lefo ma demo-demo ga'a ma tero toma maḏi ga'a ngana na suka, kara ma maḏi bela gena-ge ngana balasu na siosama toma burua gena-ge.>
3Ḏua ngoi, Musa, to 'a'a burua gena-ge reo ate 'akasia re to sonoto'o maḏi bela ḏiḏi ma tero ma siḏa re ta gasa sie toma kie ma tubu. 4Toma maḏi gena-ge Ma JOU 'a lefo Parenta Nyagi Moi ma tero ma mulaingi, gena-ge parenta-parenta ga'a 'O singadolo ra ngini toma 'orasa Unanga 'O kanau toma u'u ma leja-lejanga ma dara re ngini ni malomu toma kie ma cimi. Gena ḏua, Ma JOU 'o pula'a maḏi bela ḏiḏi gena-ge ra ngoi 5Ḏua, ngoi dadunu to 'uci da'u kie tala re mete'e Ma JOU 'ai parenta, maḏi bela ḏiḏi gena-ge ngoi ta siosama toma burua ga'a ngoi reta 'a'a. Re mulaingi toma 'orasa gena-ge singadolo nange-ne, maḏi bela ḏiḏi gena-ge 'age moju.>>
6(Gena ḏua, ngowa'a Israel 'aḏi sisoi'i tala toma Beerot Bene-Yaakan, gena-ge ngowa'a Yaakan manga sumu-sumu ma ngi'i, re 'aḏi tagi toma Mosera. Toma Mosera gena-ge 'a Harun 'o sengene re siotomo.#Nyo. 20:28, 33:38 Ḏua 'a Eleazar, Harun 'ai ngowa'a nau'u, unanga 'o ngali 'a Harun sa'olo 'Imam 'Agung. 7Toma ngi'i gena-ge, ananga 'aḏi tagi toma Gudgod re toma Gudgod toma Yotbata, daeraha ga'a ma ḇanyo lai repe. 8Toma 'orasa gena-ge, Ma JOU 'O siwola i'a suku Lewi di'a sigasa Ma JOU 'ai burua jaji re 'aḏi munara sa'olo Ma JOU 'ai 'imam-'imam, re 'aḏi sibarakati ra Ma JOU 'Ai lomanga toma ngowa'a Israel. Gena-ge ananga ya si'a'a singadolo nange-ne. 9Sababu gena-ge, toma suku Israel mo-moini manga sigolona, pa'i suku Lewi ḇato 'aḏi sanga ua tana'a ma balangu sa'olo manga warisi, sababu Ma JOU 'o siwola i'a ananga gena-ge di'a 'aḏi munara sa'olo 'Ai 'imam-'imam mete'e Ma JOU Ma Jou'ongu Madutu ga'a ngini ni silamo'o re siḏubuso, Unanga ro siajele toma suku Lewi.)
10'A Musa 'o kanau moju toma ngowa'a Israel ma betongo so'o ne: <<Ma di'ara wangere nyagi rata re utu nyagi rata ngoi masiretene to tegoro toma kie ma tubu ma tero ma mulaingi. Soi moi moju Ma JOU 'O 'isene ngoi 'ari go-golo'o singadolo Unanga 'o singi-ngiranga ngini riwara. 11Ḏua Ma JOU 'o kanau ra ngoi so'o ne: <Momi'i, no tagi toma bangsa gena-ge manga biono, la ananga 'aḏi osama re ḏegoro tana'a ga'a Ngoi to 'a'a jaji rema sasi taninga ngimo-ngimono di'a Ta pula'a ra ananga.>>
Ma JOU 'o parenta ngowa'a Israel 'aḏi mete'e Unanga mode-mode'e
12'A Musa 'o kanau moju toma ngowa'a Israel ma betongo so'o ne: <<Dadi nange-ne, hei ngowa'a Israel, Ma JOU Ma Jou'ongu Madutu ga'a ngini ni silamo'o re siḏubuso, Unanga gena-ge 'O parenta ngini ni madiga'a so'o ne: Silamo'o re mojongo Ma JOU Ma Jou'ongu Madutu ga'a ngini ni silamo'o re siḏubuso, re ninga 'ahu ma ngo'omo 'i mete'e 'Ai parenta mo-moini. Dadalara re siḏagi Unanga 'ai mau reninga 'akala re sinyingara mo-moini, reninga fikirana mo-moini. Unanga gena-ge Ma JOU, Ma Jou'ongu Madutu ga'a ngini ni silamo'o re siḏubuso, 13re ni siḏagi Ma JOU 'Ai huku-hukumu re parenta-parenta ga'a wangere nange-ne ngoi ta singadolo ra ngini di'a ninga la masiretene. 14'Elingi, Ma JOU Ma Jou'ongu Madutu ga'a ngini silamo'o re siḏubuso, diwanga rema dara mo-moini re ḏi'i dungia rema dara mo-moini, gena-ge Ta Unanga. 15Kalaha mo-moini gena-ge ta Unanga, Ma JOU 'o sitantukanga di'a dadalara taninga ngimo-ngimono, singadolo toma bangsa mo-moini, Unanga 'o cumutu ngini ga'a ananga gena-ge manga ju'uda sa'olo 'Ai 'umata. Re singadolo nange-ne ngini ni dadi Unanga 'Ai 'umata ga'a Ro cumutu. 16Sababu gena-ge, mulaingi nange-ne, ngini balasu ni sitantukanga mete'e mode-mode'e Ma JOU re awa ninga 'akala re sinyingara 'i te'e moju. 17Ma JOU Ma Jou'ongu Madutu ga'a ngini silamo'o re siḏubuso, Unanga toma jou'ongu ma somoara mo-moini ma re'u re Unanga lebe lamo'o reo ngowa'a mo-moini ga'a remanga kuasa, Unanga Ma Jou'ongu Madutu ga'a lamo'o madutu re 'Ai de-de'e 'i ma pari cua singadolo Unanga Ma Jou'ongu Madutu ga'a ngowa'a balasu ya'u mojongo. Re Unanga 'o pa'ala kaci moi ua mada'a 'O sijuruhakimi ngowa'a rema 'adili tau-taunu. 18Unanga 'O siḏagi 'adili di'a ngowa'a daga re balo. Unanga 'O dadalara ngowa'a tagi-tagi ino ga'a 'aḏi 'ahu marimoi tananga bangsa singadolo 'O sipula'a ananga manga pakeanga re ngo-ngoromo. 19Sababu gena-ge, ngini ḏi'i balasu ni sijumu dadalara ngowa'a tagi-tagi ino gena-ge, sababu ma siḏa ngini ḏi'i ni dadi ngowa'a tagi-tagi ino toma Mesir. 20Silamo'o re mojongo Ma JOU Ma Jou'ongu Madutu ga'a ngini silamo'o re siḏubuso: Ngini balasu ni siḏagi Unanga 'ai mau, ngini balasu ni macako'o namo-namoto tau-taunu ra Unanga re ngini ni masisasi pake pa'i Unanga 'Ai lomanga ḇato.#Yos. 22:5 21Ngini balasu ni puji re silamo'o pa'i Unanga ḇato sababu Unanga Ma Jou'ongu Madutu ga'a ngini ni silamo'o re siḏubuso re ngini masiretene rena oḏi'i Unanga 'Ai ga'a ma pari cua ga'a 'i simojongo ngowa'a. 22Wakutu ngini ninga ngimo-ngimono, gena-ge 'a Yakub rai ngitu re ngale, ananga 'aḏi tagi tala toma Mesir, ananga manga repe pa'i nga nyagi tumudingi ḇato. Mada'a Ma JOU, Ma Jou'ongu Madutu ga'a ngini silamo'o re siḏubuso, Unanga gena-ge Ro si'a'a ngini ganau repe ma tero sa'olo mumuḏungu toma diwanga.>>
Currently Selected:
Dadunu 10: SAJ
Highlight
Copy
Compare
Share
Want to have your highlights saved across all your devices? Sign up or sign in
2025 Indonesian Bible Society (LAI)
