Namba 9
9
Namba tu Lafet blong Pasova we ol laen blong Isrel oli mekem
1 #
Eks 12.1-13
Nao long seken yia biaen long taem ya we olgeta oli aot long Ijip, long fas manis blong hem, Hae God i toktok long Moses long draeples ya long Sinae. Hem i talem se, 2-3“Moses. Long namba fotin dei* blong manis ya, i stat long taem we san i godaon, bambae yufala evriwan i mas mekem Lafet* blong Pasova,* mo bambae yufala i mas folem ol rul blong hem olsem we Loa i talem.” 4Nao Moses i talemaot tok ya long olgeta, 5mo long draeples ya, long namba fotin dei blong manis ya, taem san i godaon, olgeta oli mekem lafet ya, mo oli mekem evri samting blong hem stret olsem we Hae God i bin talem bifo.
6Be long taem ya, i gat sam long olgeta i stap we oli no klin long fes blong Hae God, from we oli bin tajem dedbodi, nao oli no save joen blong mekem lafet ya long dei blong hem. Nao olgeta oli go luk Moses wetem hae pris, oli talem long tufala se, 7“Mifala i no klin long fes blong Hae God, from we mifala i bin tajem dedbodi. ?Olsem wanem? ?I gat rod i stap blong mifala i save joen wetem olgeta blong givim presen i go long Hae God?”
8Nao Moses i talem se, “Yufala i wet fastaem. Bambae mi go traem faenemaot rod blong yufala long Hae God.”
9Nao hem i go askem long Hae God, mo Hae God i givim tok blong hem long hem 10-11blong i go talemaot long olgeta laen* blong Isrel.* Hem i talem se, “Moses. Rul blong yufala wetem ol pikinini blong yufala mo olgeta we bambae i kamaot biaen long yufala i olsem. Sipos i taem blong Lafet blong Pasova, nao wan long yufala i no klin long fes blong mi from we i tajem dedbodi, bambae hem i save mekem lafet ya long nekis manis blong hem. No sipos wan long yufala i stap wokbaot blong go long narafala ples long taem ya, be i wantem yet blong mekem lafet ya, bambae hem tu i save mekem long nekis manis blong hem. Ol man olsem bambae oli save mekem long seken manis, long namba fotin dei blong hem, long sapa. Be oli mas kakae mit blong smol sipsip wetem ol bred* ya we i no gat is long hem, mo ol lif ya we i konkon, 12#Eks 12.46; Jon 19.36mo oli no mas livim ol hafkakae i stap kasem nekis moning, mo oli no mas brekem bun blong anamol ya we bambae oli kakae. Taem oli mekem lafet ya, be bambae oli mas folem olgeta rul blong hem. 13Be sipos wan long yufala i stap klin nomo long fes blong mi, mo i no go samples, i stap wetem yufala nomo be i no mekem lafet ya, bambae mi mi no moa save kaontem hem, se i man blong mi#9.13: Tok ya we i talem se “bambae mi mi no moa save kaontem hem, se i man blong mi,” i min se man ya bambae i ded., from we hem i no givim presen long mi blong mekem wosip long mi long prapa taem we mi mi putum. Man ya bambae i mas panis from sin blong hem.
14“Mo sipos wan narafala man i stap wetem yufala, mo i wantem joen long yufala blong mekem lafet ya, bambae hem i mas folem olgeta rul blong hem. Sem tok nomo bambae i kavremap olgeta man sem mak, nating we i wan long yufala no i narafala man.”
Klaod ya we i stap lidim olgeta
(Eksodas 40.34-38)
15-16Nao long dei ya we Moses olgeta oli putumap Haos Tapolen blong Hae God we Bokis ya we i Saen blong Promes* blong hem i stap long hem, klaod ya we i soemaot we Hae God i stap i kam kavremap Haos Tapolen ya. Mo long naet, olgeta oli luk klaod ya i laet olsem faea. Mo oltaem klaod ya i stap wetem olgeta. 17Nao oltaem, oli stap lukluk long klaod ya, mo taem hem i muv i go antap, olgeta oli tektekemaot ol haos tapolen blong olgeta, oli girap, oli biaen long hem. Mo taem klaod ya i kamdaon bakegen, i stap long wan ples, olgeta oli mekem ples blong olgeta bakegen long ples ya. 18Oltaem, taem Hae God i talem long olgeta blong oli muv i go, olgeta oli tektekemaot ol haos tapolen blong olgeta, oli muv i go. Mo taem hem i talem long olgeta blong oli stap long wan ples, olgeta oli mekem ples blong olgeta bakegen long ples ya. Nao taem we klaod ya i no moa muv, i stap nomo antap long Haos Tapolen ya, be olgeta tu oli stap long sem ples ya, oli no save aot. 19Mo taem we klaod ya i stap longtaem antap long Haos ya, be olgeta oli obei long Hae God, oli stap longtaem long ples ya, oli no save muvaot. 20Samtaem, klaod ya i save stap antap long Haos Tapolen ya blong tutri dei nomo, be oltaem, olgeta oli folem tok we Hae God i talem long olgeta, se oli stap no oli muvaot. 21Samtaem klaod ya i stap wan naet nomo, nao taem we hem i muv, olgeta tu oli girap, oli muv i go. Evritaem, taem we klaod i go antap, be olgeta oli girap, oli go. 22Sipos klaod ya i stap antap long Haos Tapolen ya tu dei, no wan manis, no wan yia no i bitim wan yia, be olgeta tu oli mas stap olsem, oli no save aot long ples ya. Be sipos klaod i muv i go antap, olgeta oli girap, oli muv i go. 23Oltaem oli stap obei long Hae God blong tektekemaot ol haos tapolen blong olgeta, mo blong putumap olgeta bakegen. Olgeta oli folem tok ya we Hae God i talem long Moses fastaem, se bambae oli mas mekem olsem.
Currently Selected:
Namba 9: OBBR
Highlight
Copy
Compare
Share
Want to have your highlights saved across all your devices? Sign up or sign in
Open Bislama Bible Revised
Bible Society of the South Pacific © 2012
