Dutronome 7
7
Fasin blong Hae God blong jusumaot ol man blong hem
(Eksodas 34.11-16)
1 #
Wok 13.19
Nao Moses i talem se, “Olgeta. Hae God i God blong yumi, mo taem hem i tekem yufala i go long kantri ya we bambae yufala i holem i blong yufala, hem bambae i ronemaot ol man blong ol narafala laen* oli gowe long kantri ya. Long taem ya, bambae hem i ronemaot ol man blong seven laen, we olgeta oli plante we plante, mo oli strong moa winim yufala. Olgeta ya, i gat ol laen blong Het, mo ol laen blong Gigas, mo ol laen blong Amoro,* mo ol laen blong Kenan,* mo ol laen blong Perij, mo ol laen blong Hivi,* mo ol laen blong Jebus. 2Nao taem hem i putum olgeta ya long han blong yufala, mo yufala i winim olgeta, bambae yufala i mas kilim olgeta evriwan i ded. Bambae yufala i no mas mekem promes blong stap gud wetem olgeta, mo yufala i no mas sore long olgeta. 3Bambae yufala i no mas letem ol boe blong yufala oli go mared long ol gel blong olgeta, mo ol boe blong olgeta oli kam mared long ol gel blong yufala. 4Sipos yufala i mekem olsem, bambae olgeta oli tanem tingting blong ol pikinini ya blong yufala i gowe long Hae God, nao bambae oli go mekem wosip long ol narafala god. Mo sipos oli mekem olsem, Hae God bambae i kros tumas long yufala, mo hem bambae i spolem yufala wantaem nomo. 5#Dut 12.3Nao from samting ya, bambae yufala i mas brekemdaon ol olta blong olgeta, mo yufala i mas brebrekem ol longlongfala ston ya blong olgeta we oli stanemap blong mekem wosip long olgeta, mo yufala i mas katemdaon ol pija blong woman god ya Asera,* we i god blong olgeta, mo yufala i mas bonem ol aedol blong olgeta. 6#Eks 19.5; Dut 4.20; 14.2; 26.18; Taet 2.14; 1 Pita 2.9Yufala i mas mekem ol samting ya, from we Hae God i God blong yumi, mo yumi tabu, yumi man blong hem. Hem i jusumaot yumi finis long olgeta man blong wol ya, blong mekem we yumi kam prapa man blong hem, we yumi spesel long fes blong hem.
7“Nao taem we Hae God i jusumaot yumi, hem i no mekem from we yumi plante moa, i winim ol narafala laen long wol ya, nao hem i lavem yumi from. Long taem ya, laen blong yumi i smol tumas, i winim ol narafala laen long wol. 8Be hem i lavem yumi, mo hem i wantem mekem promes* ya blong hem i kamtru, we hem i bin mekem wetem ol bubu ya blong yumi bifo. Nao from samting ya, hem i sevem yumi long bigfala paoa blong hem, i tekemaot yumi long han blong king blong Ijip ya we yumi stap wok slef* long hem, i mekem yumi fri. 9#Eks 20.5,6; 34.6,7; Nam 14.18; Dut 5.9,10Yufala i mas save we Hae God ya, hem nomo i God, mo tingting blong hem i stap strong oltaem blong givhan long yumi. Fasin blong hem long ol man we oli lavem hem, mo oli stap obei long ol tok blong hem, hem i stap holem promes blong hem oltaem, mo i stap lavem olgeta, wetem ol pikinini blong olgeta, mo olgeta we bambae oli kamaot biaen long olgeta, gogo kasem plante taosen yia. 10Be long ol man we oli no laekem hem, oli agens long hem, hem i stap givimbak fasin we i stret blong olgeta oli kasem, mo i no save tektaem blong givim panis long olgeta. 11From samting ya, yufala i mas obei long olgeta tok ya blong hem we mi tijim yufala long hem, mo yufala i mas obei long olgeta loa ya we mi stap givim long yufala tede.”
Hae God bambae i blesem olgeta we oli obei long hem
(Dutronome 28.1-14)
12 #
Dut 11.13-17
Mo Moses i talem se, “Hae God i God blong yumi, mo sipos yufala i stap lesin long ol tok ya we hem i givim, mo yufala i stap obei long hem oltaem, hem bambae i holemstrong promes* blong hem, mo bambae i soemaot we oltaem hem i stap lavem yufala tumas, olsem we hem i bin promes long ol bubu blong yumi bifo, se bambae i mekem. 13Hem bambae i lavem yufala, mo bambae i blesem yufala, nao bambae yufala i kam plante we plante. Bambae hem i mekem we yufala i gat plante pikinini, mo bambae hem i blesem ol garen blong yufala, nao bambae yufala i gat fulap kakae, wetem waen mo oel blong kuk, mo bambae hem i blesem ol buluk mo ol sipsip blong yufala, blong oli bonem plante pikinini. Taem yufala i go stap long kantri ya we hem i promes finis long ol bubu blong yufala bifo, se bambae i givim long yufala, hem bambae i blesemgud yufala. 14Olbaot long wol ya, i no gat wan narafala laen* nating we Hae God i blesemgud olgeta olsem we hem bambae i blesemgud yufala. Bambae i no gat wan long yufala, man no woman, we i no save gat pikinini, mo bambae i no gat wan anamol blong yufala tu we i no save gat pikinini. 15Hem bambae i blokemgud yufala blong bambae i no gat wan sik nating i kasem yufala. Bambae hem i no save letem wan long ol rabis sik ya blong Ijip we yufala i luk finis i kam kasem yufala bakegen. Bambae hem i mekem we ol man blong kantri ya nomo oli kasem ol sik ya. 16Ol narafala laen ya we hem bambae i putum olgeta long han blong yufala, bambae yufala i mas kilim olgeta evriwan i ded, mo yufala i no mas gat sore long olgeta. Mo yufala i no mas mekem wosip long ol god blong olgeta, from we fasin ya i wan trap blong yufala, we i blong ded nomo.
17“Bambae yufala i no mas tingting se, ‘!Olgeta ya oli plante tumas ya! !Bambae mifala i no naf blong ronemaot olgeta!’ 18Bambae yufala i no mas fraet long olgeta. Hae God i God blong yumi, mo yufala i mas tingbaot ol samting ya we hem i mekem long king blong Ijip bifo, wetem olgeta man blong hem. 19Ol bigbigfala trabol ya we i nogud we i nogud, we hem i tekem i kam long olgeta, mifala i luk long ae blong mifala stret. Mo mifala i luk ol merikel ya tu, wetem ol samting blong sapraes, mo bigfala paoa ya blong hem, we hem i yusum blong mekem yumi fri. Bambae hem i spolem olgeta man ya we yufala i stap fraet long olgeta, long sem fasin ya nomo we hem i spolem ol man Ijip. 20Olgeta we bambae oli ronwe long yufala, oli stap haed, hem bambae i mekem olgeta oli lusum hed, oli ron wanwan, gogo oli ded evriwan.#7.20: Narafala rod blong tanem tok blong vas ya i olsem. Olgeta we bambae oli ronwe long yufala, oli stap haed, hem bambae i sanem ol honet i go blong ronemaot olgeta, gogo oli ded evriwan.
21“Nao from samting ya, i nogud yufala i fraet long olgeta. Hae God i God blong yumi, mo hem i strong we i strong. Hem bambae i stap wetem yufala, mo i stret nomo blong ol narafala man oli fraet long hem. 22Taem yufala i stap go klosap long olgeta, hem bambae i stap ronemaot olgeta smosmol, gogo i finisim olgeta evriwan. Bambae yufala i no save ronemaot olgeta wantaem, from we sipos yufala i mekem olsem, ol wael anamol we oli stap long ples blong olgeta bambae oli kam plante, nao oli kilim yufala. 23Hae God bambae i putum ol man blong kantri ya long han blong yufala, mo bambae i mekem olgeta oli lusum hed, gogo yufala i kilim olgeta evriwan oli ded. 24Mo bambae hem i putum ol king blong olgeta long han blong yufala, mo bambae yufala i mas kilim olgeta i ded, blong ol man bambae oli no moa save tingbaot olgeta bakegen. Bambae yufala i save kilim olgeta man i ded, we bambae i no gat man i save blokem yufala. 25Mo bambae yufala i mas bonem olgeta aedol blong olgeta. Ol silva mo gol we i stap long olgeta, yufala i no mas tingting blong holem i blong yufala, yufala i mas bonem. Long fes blong Hae God, ol samting ya oli nogud we i nogud, mo sipos yufala i holem, bambae oli save kam olsem trap blong holem yufala. 26Bambae yufala i no mas tekem ol aedol olsem i kam long ol haos blong yufala. Sipos yufala i mekem olsem, trabol ya we Hae God i putum long olgeta bambae i kasem yufala tu. Yufala i mas luk olgeta olsem rabis nomo, from we Hae God i talem finis, se ol aedol oli no save stap, oli blong lus nomo.”
Currently Selected:
Dutronome 7: OBBR
Highlight
Copy
Compare
Share
Want to have your highlights saved across all your devices? Sign up or sign in
Open Bislama Bible Revised
Bible Society of the South Pacific © 2012
