Saunt Matthew 2
2
1Now whan Jesus was born in Bethlehem o’ Judea, in the days o’ Herod the king, behald, there cam’ wise men frae the east til Jerusalem,
2Sayin’, Whare is he wha is born King o’ the Jews? for we hae seen his star in the east, an’ are come to worship him.
3Whan Herod the king had hear’t thae things, he was foughten, an’ a’ Jerusalem wi’ him.
4An’ whan he had gather’t a’ the chief priests an’ scribes o’ the people thegither, he spier’t at them whare Christ sud be born.
5An’ they said until him, In Bethlehem o’ Judea; for sae it is written by the prophet,
6An’ thou, Bethlehem, in the lan’ o’ Juda, artna the laist amang the princes o’ Juda: for out o’ thee sall come a governor, that sall rule my people Israel.
7Syne Herod, whan he had hiddlinsly ca’d the wise men, spier’t at them eydently what time the star kythet.
8An’ he sendet them til Bethlehem; an’ said, Gang an’ seek eydently for the young bairn; an’ whan ye hae fund him, bring me back word, that I may come an’ worship him alsua.
9Whan they had hear’t the king, they set out; an’, lo, the star, whilk they saw in the east, gaed afore them till it cam’ an’ stood owre whare the young bairn was.
10Whan they saw the star, they rejoicet wi’ unco meikle joy.
11An’ whan they had come intil the house, they saw the young bairn wi’ Mary his mither, an’ fa’d doun, an’ worshippet him; an’ whan they had openet their treasures, they offer’t until him gifts, gowd, frankincense, an’ myrrh.
12An’ bein’ warnet o’ God in a dream that they sudna gang back til Herod, they gaed awa intil their ain kintra by anither road.
13An’ whan they were gane awa, behald, the angel o’ the Lord kytheth til Joseph in a dream, sayin’, Rise up, an’ tak’ the young bairn an’ his mither, an’ flee intil Egypt, an’ be thou there till I bring thee word; for Herod will seek the young bairn to tak’ his life.
14Syne he rase up, an’ teuk the young bairn an’ his mither by nicht, an’ gaed awa intil Egypt.
15An’ was there till the death o’ Herod, that it micht be fulfillet whilk was spoken o’ the Lord by the prophet, sayin’, Out o’ Egypt hae I ca’d my son.
16Syne Herod, whan he saw that he was mocket by the wise men, was sair anger’t, an’ sendet furth, an’ killet a’ the bairns wha were in Bethlehem, an’ in a’ the marches thereabout, frae twa years auld an’ under, accordin’ til the time whilk he had eydently spier’t o’ the wise men.
17Syne was fulfillet that whilk was spoken by Jeremy the prophet, sayin’,
18In Rama was there a voice hear’t o’ waefu’ dool, an’ greetin’, an’ meikle murnin’, Rachel greetin’ for her bairns, an’ wadna be comfortet, because they arena.
19But whan Herod was dead, behald, an angel o’ the Lord kytheth in a dream til Joseph in Egypt,
20Sayin’, Rise up, an’ tak’ the young bairn an’ his mither, an’ gang intil the lan’ o’ Israel: for they are dead wha soucht the young bairn’s life.
21An’ he rase up, an’ teuk the young bairn an’ his mither, an’ cam’ intil the lan’ o’ Israel.
22But whan he hear’t that Archelaus rang in Judea in the room o’ his father Herod, he was afear’t to gang thither, but, bein’ warnet o’ God in a dream, he turnet aside intil the parts o’ Galilee.
23An’ he cam’ an’ dwalt in a city ca’d Nazareth; that it micht be fulfillet whilk was spoken by the prophets, He sall be ca’d a Nazarene.
Currently Selected:
Saunt Matthew 2: SCOMAT
Highlight
Share
Copy
Want to have your highlights saved across all your devices? Sign up or sign in
Translated by George Henderson. Published in Londin in 1862.
