Ree 9
9
Gott un sien Volkj
1Ekj saj de Woarheit en Christus un lieej nich; mien Jewessen jeft mie Zeichnis en däm Heiljen Jeist, 2daut ekj groote Truarichkjeit un Weedoag onen opphieren en mien Hoat hab. 3Wiels ekj selfst hab mie jewenscht, vebaunt to sennen von Christus fa miene Breeda, miene Vewaunte nom Fleesch, 2Mo 32:32 4woone Israeliten sent, wäms de Kjintschoft es un de Harlichkjeit un de Bintnissen un de Jesazjäwunk un de Gottesdeenst un de Vespräakjungen; 1Mo 17:7; 2Mo 4:22; 20:1-17; 40:34; 5Mo 7:6 5wäms de Vodasch sent, von woone uk Christus nom Fleesch jekomen es, dee äwa aules es, Gott, jeloft en Eewichkjeit. Amen. Mat 1:1-16; Luk 3:23-34; Ree 1:3
6Oba nich, daut Gott sien Wuat jefält haud; wiels nich aula, dee ut Israel sent, sent Israeliten; Ree 2:28; 4:16,17 7uk nich, wiels see Abraham sien Nokomen sent, sent see aula Kjinja, oba: “En Isaak saul die de Nokomen jenant woaren”. 1Mo 21:12 8Daut es: Nich de Kjinja vom Fleesch sent Gott siene Kjinja, oba de Kjinja von de Vespräakjunk woaren aus Nokomen jeräakjent. Gal 4:23 9Wiels daut Wuat von de Vespräakjunk es dit: “Om dise Tiet woa Ekj komen, un Sara woat eenen Sän haben.” 1Mo 18:10 10Un nich bloos daut, oba uk, aus Rebekka von eenem schwanga wort, von onsem Voda Isaak; 11wiels soogoa ea de Kjinja jebuaren worden un noch nich Goodet ooda Beeset jedonen hauden (soo daut de Aufsecht von Gott no de Uterwälunk no bestonen kunn, nich derch Woakjen, oba wäajens dän, dee doa roopt), 12wort to ar jesajcht: “De Elra woat däm Jinjren deenen”; 1Mo 25:23 13soo aus jeschräwen steit: “Jakob hab Ekj jeleeft, oba Esau hab Ekj jehaust.” Mal 1:2-3
14Waut sell wie dan nu sajen? Es doa Ojjerajchtichkjeit en Gott? Sea lang nich! 15Wiels Hee sajcht to Moses: “Ekj woa Mie erboarmen, äwa wäm Ekj Mie erboarmen woa; un Ekj woa metlieden, met wäm Ekj metlieden woa.” 2Mo 33:19 16Soo licht daut nich aum Wellen ooda Ranen von irjentwäm, oba aun Gott sien Erboarmen. Efs 2:8 17Wiels de Schreft sajcht to Farao: “Jrod hiatoo hab Ekj die oppjerecht, daut Ekj miene Macht aun die bewies un daut mien Nomen opp de gaunze Ieed vekjindicht woat”. 2Mo 9:16 18Aulsoo, äwa wäm Hee well, erboarmt Hee sikj, un wäm Hee well, dän moakt Hee hoat. 2Mo 4:21; 1Pe 2:8
Gott sien Oaja un Jnod
19Dan sajchst du to mie: Wuarom beschuldicht Hee dan? Wiels wäa haft sienem Wellen wadastonen? 20Em Jäajendeel, Oo Mensch, wäa best du, daut du jäajen Gott rätst? Sajcht uk daut Jemoakte to däm Moaka: Wuarom hast Du mie soo jemoakt? 21Ooda haft de Toppstrikja nich daut Rajcht äwa daut Blott von deeselwje Mischunk, een Jefäss to Ieren to moaken un daut aundre to Onieren? Jer 18:1-12 22Wan oba Gott, wellens, sienen Oaja to bewiesen un siene Macht bekaunt to moaken, met väl Jedult de Jefässa von Oaja druach, dee toom Vedoawen reedjemoakt sent; Spr 16:4; Ree 2:4 23un daut Hee mucht dän Rikjtum von siene Harlichkjeit aun de Jefässa von Boarmherzichkjeit bekaunt-moaken, dee Hee verhäa reedjemoakt haft to de Harlichkjeit, Ree 8:29; Efs 1:3-12 24jo ons, woone Hee beroopen haft, un nich bloos ons von de Juden, oba uk von de Heiden? 25Soo aus Hee uk derch Hosea sajcht: “Ekj well dee, dee nich mien Volkj sent, mien Volkj nanen, un miene Jeleewde, dee nich eene Jeleewde wia.” Hos 2:23 26“Un daut woat passieren, opp de Städ, wua to äant jesajcht wort: ‘Jie sent nich mien Volkj’, doa sellen see Kjinja von däm läwendjen Gott jenant woaren.” Hos 1:10 27Jesaja oba roopt äwa Israel: “Wan de Kjinja Israel äare Zol soo es aus de Saunt vom Mäa, woat mau de Äwa-Rest jerat woaren. Jes 10:22-23; Ree 11:5 28Wiels Hee woat de Sach verechten un woat dee en Jerajchtichkjeit vekjartren, wiels de Har woat eene vekjartade Sach doonen opp de Ieed!” 29Un soo aus Jesaja verhäa jesajcht haft: “Wan de Har Zebaot ons nich haud Nokomen hinjaloten, dan wia wie soo jeworden aus Sodom un wieren Gomorra jlikj-jeworden.” Jes 1:9
Israel sien Ongloowen
30Waut well wie dan nu sajen? De Heiden, dee nich no de Jerajchtichkjeit sträwden, haben de Jerajchtichkjeit erlangt; daut es de Jerajchtichkjeit, dee ut däm Gloowen kjemt; Ree 10:20 31oba Israel, dee daut Jesaz von de Jerajchtichkjeit nosträwd, haft daut Jesaz von de Jerajchtichkjeit nich errieekjt. Ree 10:2-3 32Wuarom? Wiels see dee nich ut Gloowen, oba aus von ut Jesaz-Woakjen sochten. See haben sikj jestat aun däm Aunstoos-Steen, Mat 21:42,44; 1Pe 2:8 33soo aus jeschräwen steit: “Kjikj, Ekj laj en Zion eenen Aunstoos-Steen un eenen Steen von Oajanis; wäaemma aun Am jleeft, woat nich toschaund woaren”. Jes 8:14; 28:16
Reema
Currently Selected:
Ree 9: DKB
Highlight
Copy
Compare
Share
Want to have your highlights saved across all your devices? Sign up or sign in
Copyright © 2023 von de Kjennichs-Bibel Jesalschoft