Ree 10
10
1Breeda, mien Hoatens-Wunsch un mien Jebäd to Gott fa Israel es, daut see jerat woaren. 2Wiels ekj jäw äant daut Zeichnis, daut see eenen Iewa fa Gott haben, oba nich no Erkjantnis no. 3Wiels see Gott siene Jerajchtichkjeit nich erkjanen un äare ieejne Jerajchtichkjeit sieekjen opp to rechten, haben see sikj nich Gott siene Jerajchtichkjeit unja-jestalt. Ree 1:17 4Wiels Christus es daut Enj von daut Jesaz fa jiedren, dee doa jleeft, fa de Jerajchtichkjeit. Mat 5:17; Joh 3:18; Gal 3:24-25; Heb 8:13
De Radungs-Bootschoft fa aule
5Wiels Moses beschrift de Jerajchtichkjeit, dee derch daut Jesaz kjemt: “De Mensch, woona dise deit, woat derch dee läwen.” 3Mo 18:5 6Oba de Jerajchtichkjeit ut däm Gloowen sajcht soo: “Saj nich en dien Hoat: Wäa well en dän Himmel noppfoaren?” (Daut es, om Christus rauf to holen.) 5Mo 30:11-14 7Ooda: “Wäa well en dän Aufgrunt raufstieen?” (Daut es, om Christus von de Doodje nopp to brinjen.) 8Oba waut sajcht dee? “Daut Wuat es dichtbie die, en dien Mul un en dien Hoat.” Daut es daut Wuat vom Gloowen, daut wie prädjen, 9daut, wan du met dien Mul dän Harn Jesus bekjanst un jleefst en dien Hoat, daut Gott Am von de Doodje opperwakjt haft, dan woascht du jerat woaren. Mat 10:32; 2Kor 4:5 10Wiels met daut Hoat woat jejleeft fa de Jerajchtichkjeit, un met daut Mul woat bekjant fa de Radunk. 11Wiels de Schreft sajcht: “Wäaemma aun Am jleeft, woat nich toschaund woaren.” Jes 28:16 12Wiels doa es kjeen Unjascheet mank Juden un Griechen: Wiels deeselwja Har äwa aule, es rikj fa aule, dee Am aunroopen. Apj 10:34-35; 15:9 13Wiels “wäaemma dän Nomen vom Harn aunroopen woat, saul jerat woaren.” Joel 2:32
14Oba woo sellen see dän aunroopen, aun dän see nich jejleeft haben? Un woo sellen see aun dän jleewen, von wäm see nich jehieet haben? Un woo sellen see hieren onen eenen Prädja? 15Un woo sellen see prädjen, wan see nich jeschekjt woaren? Soo aus jeschräwen steit: “Woo scheen sent de Feet von dee, dee daut Evangelium von däm Fräd vekjindjen, dee daut Evangelium von daut Goode vekjindjen!” Jes 52:7 16Oba see wieren nich aula daut Evangelium jehuarsom. Wiels Jesaja sajcht: “Har, wäa haft onse Prädicht jejleeft?” Jes 53:1; Joh 12:38 17Aulsoo kjemt de Gloowen ut de Prädicht#10:17 Ooda: daut Hieren., oba de Prädicht#10:17 Ooda: daut Hieren. ut Gott sien Wuat. Joh 17:20 18Oba ekj saj: Haben see nich jehieet? Secha: “Äa Schaul es rutjegonen äwa de gaunze Ieed un äare Wieed bat aun de Enja von de Welt.” Ps 19:5; Ree 15:19 19Oba ekj saj: Haft Israel daut nich jewist? Moses sajcht ieeschtens: “Ekj well junt toom Aufgonst reizen derch dee, waut nich eene Nazion sent, derch eene onvestendje Nazion well Ekj junt oajren.” 5Mo 32:21 20Jesaja oba es driest un sajcht: “Ekj sie jefungen worden von dee, dee Mie nich sochten un sie openboa jeworden to dee, dee nich no Mie fruagen”. Jes 65:1; Ree 9:30 21Oba to Israel sajcht Hee: “Dän gaunzen Dach hab Ekj miene Henj utjestrakjt no een onjehuarsomet un wadaspräakjendet Volkj”. Jes 65:2
Reema
Currently Selected:
Ree 10: DKB
Highlight
Copy
Compare
Share
Want to have your highlights saved across all your devices? Sign up or sign in
Copyright © 2023 von de Kjennichs-Bibel Jesalschoft