Mat 18
18
Wäa es de Jratsta
Mrk 9:33-37; Luk 9:46-48
1En deeselwje Stund kjeemen de Jinja no Jesus un säden: Wäa es de Jratsta em Himmelrikj? 2Un Jesus roopt een kjlienet Kjint un stald daut en äare Medd 3un säd: Ekj saj junt woarhauftich: Wan jie nich omkjieren un soo woaren aus de kjliene Kjinja, woa jie nich en daut Himmelrikj nenkomen. Mat 19:14 4Wäa sikj nu selfst soo deemooticht aus dit Kjint, disa es de Jratsta em Himmelrikj. 5Wäa een soon Kjint oppnemt en mienem Nomen, dee nemt Mie opp. Mat 10:40 6Wäa oba to eent von dise Kjliene, dee aun Mie jleewen, een Aunstoos woat, fa dän wia daut bäta, wan een Molsteen aun sienen Hauls jehongen wort un hee em deepsten vom Mäa vesunken wort.
Vesieekjungen toom sindjen
Mrk 9:42-50; Luk 17:1-4
7Wee de Welt wäajen Oajanissen! Daut es je needich, daut Oajanissen komen; oba wee däm Mensch, derch wäm daut Oajanis kjemt. 8Wan oba diene Haunt ooda dien Foot die een Aunstoos woat, dan hak dee auf un schmiet dee von die. Daut es bäta fa die, lom ooda aus een Kjräpel en daut Läwen nenn to gonen, aus daut du twee Henj ooda twee Feet hast un en daut eewje Fia jeschmäten woascht. Mat 5:29-30 9Un wan dien Uag die een Aunstoos woat, riet daut ut un schmiet daut von die. Daut es bäta fa die, een-uagich en daut Läwen nenn to gonen, aus daut du twee Uagen hast un en daut Halenfia jeschmäten woascht.
Daut Jlikjnis von daut veloarne Schop
Luk 15:3-7
10Seet doano, daut jie nich eent von dise Kjliene ve-achten. Wiels Ekj saj junt: Äare Enjel em Himmel seenen aule Tiet daut Aunjesecht von mien Voda, dee em Himmel es. Heb 1:14 11Wiels de Menschensän es jekomen, daut Veloarne to raden. 12Waut denkj jie? Wan een Mensch hundat Schop haud, un eent von dee sikj veert: Lat hee nich de näajen-un-näajentich opp de Boaj un jeit han un sieekjt daut Ve-erde? 13Un wan daut soo romkjemt, daut hee daut finjt, Ekj saj junt woarhauftich: Hee freit sikj äwa daut mea, aus äwa de näajen-un-näajentich, dee nich ve-ert sent. 14Aulsoo es daut uk nich de Wellen von jun Voda em Himmel, daut eent von dise Kjliene veloaren jeit.
Wan een Brooda sindicht
15Wan oba dien Brooda sikj jäajen die vesindicht, dan go han un strof am tweschen die un am auleen. Horcht hee no die, dan hast du dienen Brooda jewonnen. 3Mo 19:17; Luk 17:3; Gal 6:1 16Horcht hee oba nich, dan nemm noch eenen ooda twee met die, soo daut jieda Sach opp daut Mul von twee ooda dree Zeijen bestonen kaun. 5Mo 19:15 17Horcht hee oba dise nich, dan saj de Jemeent daut. Horcht hee de Jemeent oba uk nich, dan saul hee fa die sennen soo aus een Heid un een Taks-Kollakjta. 1Kor 5:13; 2Tess 3:6; Tit 3:10 18Ekj saj junt woarhauftich: Wautemma jie oppe Ieed binjen woaren, saul em Himmel jebungen sennen, un wautemma jie oppe Ieed leesen, saul em Himmel jeleest sennen. Mat 16:19; Joh 20:23 19Un wada saj Ekj junt: Wan twee von junt äwareen-komen oppe Ieed, äwa irjent eene Sach, om dee see bedden wellen, dan saul äant daut woaren von mienem Voda em Himmel. Mrk 11:24 20Wiels wua twee ooda dree vesaumelt sent en mienem Nomen, doa sie Ekj en äare Medd. Mat 28:20
Vejäwen ooda nich vejäwen
21Dan kjeem Petrus no Am un säd: Har, woo foaken saul ekj mienen Brooda vejäwen, dee jäajen mie sindicht? bat säwenmol? 22Jesus säd to am: Ekj saj die, nich bat säwenmol, oba zäwentich mol säwen. 1Mo 4:24; Luk 17:4; Efs 4:32 23Doawäajen es daut Himmelrikj met eenem Maun, eenem Kjennich, vejlikjt worden, dee met siene Kjnajchts veräakjnen wull. 24Un aus hee aunfunk to veräakjnen, wort eena ver am jebrocht, dee wia am tieen-dusent Talenten#18:24 Een Talent wia bie 75 Punt (34.3 kg) Selwa, ooda bie twintich Joa Oabeits-Loon jiedat. schuldich. 25Aus hee oba nich haud, toom betolen, befool sien Har, am un siene Fru un siene Kjinja un aules, waut hee haud, to vekjeepen un to betolen. Neh 5:5 26Dan foll de Kjnajcht ver am dol, prachad am un säd: Har, hab Jedult met mie; un ekj well die aules betolen. 27Un de Har äwa disen Kjnajcht, metliedent, leet am frie un vejeef am de Schult. 28Oba aus dis Kjnajcht rutjegonen wia, funk hee eenen von siene Metkjnajchts, dee am hundat Denarius#18:28 Denarius: Een reemischet Jeltstekj, 3.9 Graum Selwa; soo bie een Dach Oabeits-Loon. schuldich wia. Däm pakt hee en, warjd am un säd: Betol mie, waut du schuldich best. 29Dan foll sien Metkjnajcht ver am dol, prachad am un säd: Hab Jedult met mie, un ekj woa die aules betolen. 30Oba hee wull nich, oba jinkj han un schmeet am en daut Jefenkjnis, bat hee betold, waut hee schuldich wia. 31Oba aus siene Metkjnajchts sagen, waut passieet wia, worden see sea truarich un jinjen un berechten äarem Harn aules, waut passieet wia. 32Dan foddad sien Har am no sikj un säd to am: Du beesa Kjnajcht! Aul dise Schult vejeef ekj die, wiels du mie doarom prachadsd. Luk 6:36 33Sust du die dan nich uk äwa dienen Metkjnajcht erboarmen, soo aus ekj mie äwa die erboarmt hab? 1Joh 4:11 34Un sien Har wia doll un äwajeef am aun de Kjwäla, bat hee aules betold, waut hee am schuldich wia. Mat 5:26 35Soo woat mien himlischa Voda daut met junt uk doonen, wan jie nich von june Hoaten vejäwen een jiedra sien Brooda äare Fäla. Mat 6:14-15; Jak 2:13
Matäus
Currently Selected:
Mat 18: DKB
Highlight
Copy
Compare
Share
Want to have your highlights saved across all your devices? Sign up or sign in
Copyright © 2023 von de Kjennichs-Bibel Jesalschoft