Mat 14
14
Johanes de Deepa, woat dootjemoakt
Mrk 6:14-29; Luk 9:7-9
1En dee Tiet hieed Herodes, de Tetrarch#14:1 Tetrarch: eena von vea Rejiera., de Norecht von Jesus. 2Un hee säd to siene Deena: Daut es Johanes de Deepa; Hee es vom Doot oppjestonen, un doawäajen wirkjen de Wundawoakjen en Am. 3Wiels Herodes haud Johanes loten faustnämen, binjen un en daut Jefenkjnis stoppen, wäajen Herodias, sien Brooda Filippus siene Fru. Mat 11:2 4Wiels Johanes haud to am jesajcht: Daut es die nich rajcht, ar to haben. 2Mo 20:14 5Un hee wull am dootmoaken, oba hee fercht de Volkjshäad, wiels dee hilden am fa eenen Profeet. Mat 21:26
6Oba aus Herodes sien Jeburts-Dach kjeem#14:6 Ooda: jefieet wort., daunzt Herodias äare Dochta mank äant, un daut jefoll Herodes. 7Doawäajen vespruak hee ar met eenem Eit, ar to jäwen, wautemma see fodren wudd. 8Oba see, von äare Mutta doatoo aunjeleit, säd: Jeff mie hia opp eene Schiew dän Kopp von Johanes däm Deepa. 9Un de Kjennich wort truarich. Oba wäajens dän Eit haulwen, un dee, waut met am toop aum Desch sauten, befool hee ar dän to jäwen. 10Un hee schekjt han un leet Johanes em Jefenkjnis aufkoppen. 11Un sien Kopp wort opp eene Schiew jebrocht un de Mejal jejäft, un see brocht äare Mutta dän. 12Un siene Jinja kjeemen, neemen dän Kjarpa un begrowden am, un see jinjen un vetalden Jesus daut.
Jesus feet 5,000 Menschen
Mrk 6:30-44; Luk 9:10-17; Joh 6:1-14
13Un aus Jesus daut hieed, veleet Hee von doa em Schepp no eene eensome Städ auleen. Un aus de Volkjshäaden daut hieeden, foljden see Am tofoot ut de Städa. 14Aus Jesus rutkjeem, sach Hee eene groote Volkjshäad, un Am jaumad daut äwa äant, un Hee heeld äare Kranke.
15Un aus daut Owent jeworden wia, kjeemen siene Jinja no Am un säden: Dise Städ hia es onbewont, un de Tiet es aul vegonen; entlot de Volkjshäad, daut see en de Darpa gonen un sikj Äten kjeepen. 16Oba Jesus säd to äant: See haben daut nich needich, wajch to gonen; jäft jie äant to äten. 17See säden to Am: Wie haben hia sest nuscht aus mau fief Brood un twee Fesch. 18Un Hee säd: Brinjt Mie dee häa! 19Un Hee befool de Volkjshäaden sikj opp daut Graus dol to saten un neem de fief Brood un de twee Fesch, kjikjt nopp no däm Himmel un dankt, bruak de Brood un jeef de Jinja dee, un de Jinja jeewen dee de Volkjshäaden. 20Un see eeten aula un worden saut; un see lausen toop, waut doa von Brocken äwableef, twalw Kjarw voll. 2Kje 4:44 21Un dee doa jejäten hauden, wieren bie fief-dusent Mana, onen Frues un Kjinja.
Jesus jeit oppem Wota
Mrk 6:45-52; Joh 6:16-21
22Dan fuaz bedwunk Jesus siene Jinja, en daut Schepp to stieen un ver Am no de aundre Sied to foaren, bat Hee de Volkjshäaden entloten haud. 23Un aus Hee de Volkjshäaden entloten haud, jinkj Hee opp dän Boajch, om auleen to bäden; un aus daut Owent wort, wia Hee doa auleen. Luk 6:12; 9:18 24Oba daut Schepp wia aul medden oppem Mäa, un must Noot lieden von de Walen, wiels de Wint wia äant jäajenaun. 25Oba en de vieede Nachtwoak#14:25 von Klock 3 bat 6 zemorjes. kjeem Jesus no äant un jinkj oppem Mäa. 26Oba aus de Jinja Am sagen oppem Mäa gonen, veschrocken see un säden: Daut es een Jespanst! un schrieejen ut Angst. Luk 24:37 27Oba dan räd Jesus fuaz met äant un säd: Siet jetroost, dit sie Ekj; enjst junt nich! 28Petrus auntwuad un säd: Har, wan Du daut best, dan befäl mie no Die to komen opp daut Wota. 29Un Hee säd: Komm! Un Petrus stieech ut daut Boot rut un jinkj opp daut Wota no Jesus opptoo. 30Oba aus hee dän stoakjen Wint sach, enjst hee sikj; un aus hee aunfunk to sinkjen, schrieech hee un säd: Har, rad mie! 31Jesus strakjt fuaz de Haunt ut, pakt am aun un säd to am: Oo du Kjliengloowscha, wuarom twiewelsd du? 32Un aus see en daut Schepp nenstieejen, läd sikj de Wint. 33Un dee, waut em Schepp wieren, kjeemen un follen ver Am dol un säden: Du best woarhauftich Gott sien Sän! Mat 16:16; Joh 1:49
Jesus heelt de Kranke en Genezaret
Mrk 6:53-56
34Un see fuaren äwa un kjeemen en daut Launt Genezaret. 35Un aus de Mana Am opp de Städ erkjanden, schekjten see en dee gaunze Jäajent rom un brochten aul de Kranke no Am 36un prachaden Am, daut see uk bloos dän Soom von sien Kjleet wudden aunschieren kjennen; un soo väl aus dän aunschieeden, worden gaunz jesunt. Mat 9:21; Luk 6:19
Matäus
Currently Selected:
Mat 14: DKB
Highlight
Copy
Compare
Share
Want to have your highlights saved across all your devices? Sign up or sign in
Copyright © 2023 von de Kjennichs-Bibel Jesalschoft