Matej 4
4
E Isuseskoro iskušenie
1Togaš o Duho e Devleskoro legargja e Isuse ki pustina te ovel iskušimo taro Beng. 2Palo saranda dive hem saranda rakja posti, o Isus bokhalilo.
3I alo ki leste o Beng so iskušinela hem phengja leske: “Te sijan o Čhavo e Devleskoro, vaker akale barenge te oven mare.”
4A o Isus odgovoringja: “Pišimo i:
‘O manuš nane te živinel samo taro maro,
nego taro sekova jekh lafi so iklola taro muj e Devleskoro.’ #PZ 8:3.”
5Palo adava o Beng legargja le ko Sveto gradi Erusalim hem čhigja le ko najučo than e Hrameskoro 6hem phengja leske: “Te sijan o Čhavo e Devleskoro, frde tut akatar tele. Soske pišimo i:
‘Ka zapovedinel pe angelenge te arakhen tut
te ikeren tut ko vasta
te na khuve to pro ko bar.’ #Ps 91:11,12.”
7A o Isus odgovoringja leske: “Pišimo i hem akava: ‘Ma iskušin e Gospodare, te Devle.’#PZ 6:16. ”
8Togaš o Beng legargja le ki but uči planina hem sikavgja leske sa o carstvija e svetoskere hem lengiri slava 9hem phengja leske: “Sa akava ka dav tut, ako pelan ko kočaka hem pokloningjan tut mange.”
10O Isus phengja leske: “Cide tut mandar, Benga! Soske pišimo i:
‘Poklonin tut e Gospodareske, te Devleske, hem samo leske služin.’ #PZ 6:13.”
11Togaš o Beng cidingja pe lestar, a o angejla ale hem služinge leske.
O Isus počmingja te propovedinel
12Koga o Isus šungja deka o Jovan Kristitel tano ko zatvor, gelo ki Galileja. 13Mukhla o Nazaret hem gelo te živinel ko Kapernaum, uza ko Galilejsko ezero, ko thana taro pleme e Zavuloneskoro hem e Neftalimeskoro, 14te šaj te phergjol adava so phengja o prorok Isaija:
15“Ki phuv e Zavuloneskiri hem e Neftalimeskiri,
uza ko ezero Galilejsko, tari javer strana tari reka Jordan,
ki Galileja ki phuv e javere nacije,
16o manuša so živinena ki temnina
dikhle i bari svetlina;
ali i svetlina
okolenge da so živinena ki senka e meribaskiri.”#Isa 9:1-2.
17Taro adava vreme o Isus počmingja te propovedinel: “Pokajnen tumen! Adaleske so paše tano o nebesno carstvo.”
O Isus vikinela e prvo učenikon
18Dži kote nakhela sine o Isus uza ko ezero Galilejsko, dikhla e duje phralen, e Simone vikimo Petar hem e Andreja, sar frdena o mreže ko pani, adaleske so ola sine ribajra.
19Hem phengja lenge: “Aven pala mande hem me ka kerav tumen te astare manušen mesto mačhen.”
20Ola odma mukhle pumare mreže hem gele pala leste.
21Koga gele adathar hari podur, o Isus dikhla panda duje phralen, e Jakove hem e Jovane, sar pumare dadeja e Zavedeje bešena ko čamco hem namestinena sine pumare mreže. O Isus len da vikingja. 22Hem ola odma mukhle o čamco hem pumare dade hem gele pala leste.
O Isus sasljarela e nasvalen
23O Isus džala sine ki celo Galileja hem sikavela sine e manušen ko lengere sinagoge, propovedindor o evangelije taro nebesno carstvo hem sasljarela sine sekova nasvalipe hem slabost maškar o manuša.
24A baši leske šundilo ki celo Sirija, hem o manuša ange ki leste sa e nasvalen taro različno nasvalipe, adala so mučinena pe sine jako dukhencar, opsednime taro demojna, okola so sine len epilepsija hem so sine sakatija. A o Isus sasljarela len sine. 25Hem pala leste džana sine but manuša tari Galileja, taro Dekapolis, taro Erusalim, tari Judeja, hem tari javer strana tari reka Jordan.
Currently Selected:
Matej 4: MAR
Highlight
Copy
Compare
Share
Want to have your highlights saved across all your devices? Sign up or sign in
