Matej 20
20
I parabola bašo rabotnikija ko drakha
1“Soske o carstvo nebesno tano sar domakini so rano sabajleja iklilo te rodel rabotnikija baši pi niva e drakhencar. 2Ov dogovoringja pe te platinel lenge po jekh dinari ko dive so sine dnevnica bašo jekh dive i bičhalgja len ki pi niva.
3Koga sine enja o sati sabajleja ov iklilo hem dikhla javeren sar tergjona ko pazari hem na kerena ništo. 4I phengja lenge: ‘Džan tumen da hem keren buti ki mi niva e drakhencar, a me ka platinav tumenge pošteno.’ 5Hem ola gele.
A ov palem iklilo ko dešuduj o sati hem ko trin o sati paloručko, hem agjar kergja isto. 6Ko pandž o sati paloručko palem iklilo hem arakhla javeren sar tergjona hem pučlja len: ‘Soske tergjovena akate celo dive hem na kerena ništo?’
7Ola odgovoringe leske: ‘Soske nikoj na dengja amen buti.’
A ov phengja lenge: ‘Džan hem tumen da ki mi niva.’
8Ko krajo e diveskoro, o gazda e drakhengoro phengja pe manušeske so sine upreder o rabotnikija: ‘Vikin e rabotnikon hem de len lengiri plata, počmindor taro okola so ale posledna, dži ko okola so ale prva.’
9Agjar ale o rabotnikija so kerge buti taro pandž o sati paloručko hem sekoj dobingja po jekh dinari. 10Koga ale okola so počminge prvo te keren buti, adžikerena sine te len poviše. Ama sekoj lendar dobingja po jekh dinari. 11Koga lele o pare, počminge te buninen pe protiv o gazda 12vakerindor: ‘Akala so vikingjan len posledna kerge buti samo jekh sati, a tu platingjan len isto sar amen so platingjan. A amen celo dive kergjem phari buti hem thabilem ko kham.’
13Ama o gazda odgovoringja jekheske lendar: ‘Amala, na sijum nepošteno prema tute. Na dogovoringjem amen li te kere buti jekhe dinareske? 14Le ti plata hem dža, a me akaleske soj posledno mangava te dav doborom kozom so tuke dengjum. 15Nane man li pravo me parencar te kerav so mangava? Ili tu sijan ljubomorno so sijum šukar prema lende?’
16Agjar okola soj posledna ka oven prva, a okola soj prva ka oven posledna.”
O Isus trito puti vakerela bašo po meribe
17Dži kote džana sine ko Erusalim, drumaldan o Isus cidingja ki strana e dešudujen hem phengja lenge: 18“Akje džaja upre ko Erusalim hem adathe o Čhavo Manušeskoro ka ovel predajmo ko prvosveštenikija hem ko učitejla e Zakoneskere, hem ola ka osudinen le ko meribe 19hem ka predajnen le e manušenge so nane Evreja te šaj te asan leske, te kamšikujnen le hem te čhiven le ko krsto. Ama ko trito dive ka uštel taro mule.”
O pučibe e Jakoveskere hem e Jovaneskere dajakoro
20Togaš i daj e Zavedejeskere čhavengiri, ali ko Isus pe čhavencar hem peli ko kočaka angli leste te rodel lestar nešto.
21I o Isus pučlja la: “So mangeja?” Oj vakergja: “De man lafi deka ko to carstvo, me duj čhave ka bešen jekh tari ti desno strana, a jekh tari ti levo strana.”
22A o Isus phengja lenge: “Na džanena so rodena. Šaj li te pijen tari čaša kolatar me ka pijav?”
Ola odgovoringe: “Šaj.”
23I ov phengja lenge: “Čače ka pijen tari mi čaša, ama nane mlo te vakerav koj ka bešel tari mi desno hem tari mi levo strana. Adala thana ka del pe okolenge kaske mo Dad spremingja len.”
24Koga šunge adava o javera deš učenikija, holange e duje phralenge.
25Togaš o Isus vikingja len ki peste hem phengja: “Džanena deka o vladitejla okolengere so na pendžarena e Devle vladinena upro lende hem lengere da bare manuša mangena te keren adava silaja. 26Ama akava ma te ovel maškar tumende, a koj mangela te ovel baro maškar tumende, neka ovel tumenge sluga, 27hem koj mangela te ovel prvo maškar tumende, neka ovel tumenge robo, 28sar so o Čhavo Manušeskoro na alo te služinen leske, nego ov te služinel hem te del po životo sar otkup butenge.”
O Isus sasljarela duje korole manušen
29Dži kote o Isus hem o učenikija leskere iklona sine taro Erihon, pala leste džana sine bari gužva.
30I akje, duj korole manuša bešena sine uza ko drumo, i koga šunge deka nakhela o Isus vikinge: “Gospode, Čhavo e Davideskoro, ov milostlivo prema amende!”
31But džene zaptinge len hem phenge lenge te na vikinen, ama ola poviše vikinge: “Gospode, Čhavo e Davideskoro, ov milostlivo prema amende!”
32O Isus ačhilo, vikingja len hem pučlja: “So mangena te kerav tumenge?”
33Ola odgovoringe: “Gospode, mangaja te dikha.”
34E Isuseske pelo žal baši lenge hem čhigja pe vasta upro lengere jakha, i ola odma dikhle hem gele pala leste.
Currently Selected:
Matej 20: MAR
Highlight
Copy
Compare
Share
Want to have your highlights saved across all your devices? Sign up or sign in
