Matej 18
18
Koj tano najbaro
1Ko adava vreme ale o učenikija ko Isus hem pučle le: “Togaš koj tano najbaro ko carstvo nebesno?”
2O Isus vikingja ki peste jekhe tikne čhave hem čhigja le maškar lende 3hem phengja: “Čače vakerava tumenge, ako na promeningjen tumen hem na ulen sar tikne čhave, nikat nane te khuven ko carstvo nebesno. 4Adaleske, koj ponizinela pe hem ovela sar akava tikno čhavo, ov tano najbaro ko carstvo nebesno. 5Hem koj ka priminel jekhe asavke tikne čhave ko mo anav, man priminela.”
O Isus sikavela sar te na pera ko grevo
6“Ako nekoj čhivela jekhe taro akala tikne čhave so verujnena ki mande te perel ko grevo, pošukar leske te phandel pe baro bar ki men hem te ovel tasavdo ko hor pani e moreskoro.
7Pharo e manušenge taro sveto, adaleske so čhivena javere te perel ko grevo. Asavke bukja mora te aven, ama but i pharo adale manušeske kastar so avela adava! 8Ako to vas ili to pro čhivela tut ko grevo, čhin le hem frde le tutar. Pošukar i te khuve ko večno životo sakati ili bango nego te oven tut o solduj vasta ili o solduj pre, a te ove frdimo ki večno jag. 9Ako ti jakh čhivela tut ko grevo, ikav la hem frde la tutar. Pošukar i te khuve ko večno životo jekhe jakhaja, nego te oven tut o solduj jakha, a te ove frdimo ko jagalo pekol.”
I parabola bašo našavdo bakhro
10“Pazinen te na dikhen po tele jekhe taro akala tikne. Soske vakerava tumenge deka lengere angejla ko nebo sekat tergjona anglo mo Dad soj ko nebo. 11[Soske o Čhavo Manušeskoro alo te rodel hem te spasinel e našavden.]
12So mislinena? Ako jekh manuš isi le šel bakhre, i jekh lendar našavdilo, nane li te mukhel e enjavardešu enjen ki planina hem te džal te rodel adale bakhre so našavdilo? 13Hem te arakhla le, čače vakerava tumenge, poviše ka radujnel pe leske, nego okole enjavardešu enjenge so na našavdile. 14Agjar ni tumaro Dad soj ko nebo, na mangela nijekh taro akala tikne te našavgjoven.”
Sar te rešinel pe o grevo e vernikoncar
15“Ako to phral grešingja tuke, dža korkori hem vaker leske so grešingja tuke. Te šungja tut, dobingjan te phrale. 16Ama ako na šungja tut, le tuja panda jekhe ili dujen, te šaj ‘duje ili trine svedokoncar te dokažinel pe sekoja buti.’ 17I ako na šungja len da, vaker e crkvake. I te na mangla te šunel e crkva da, dikh le sar okole so na džanela e Devle ili sar danočniko.
18Čače vakerava tumenge, sa so ka phanden ki phuv, ka ovel phandlo ko nebo, hem sa so ka phraven ki phuv, ka ovel phravdo ko nebo.
19Palem čače vakerava tumenge, ako duj džene tumendar soglasinge pe ki phuv, soj te roden, ka del len adava mo Dad soj ko nebo. 20Soske, kote soj duj ili trin džene khedime ko mo anav, me da sijum adathe lencar.”
I parabola bašo nemilostlivo sluga
21Togaš o Petar alo ko Isus hem pučlja le: “Gospode, kozom puti te oprostinav me phraleske so grešinela mange? Efta puti?”
22A o Isus odgovoringja leske: “Vakerava tuke, na efta puti, nego eftavardeš puti po efta.
23Adaleske vakerava akava: o carstvo nebesno tano sar caro so mangela sine pe slugencar te račistinel pe, adaleske so dužinena sine leske. 24Koga počmingja te gejnel, ange angli leste jekhe so dužinela leske sine deš ilade kese zlato. 25Adaleske so na sine le te iranel leske, o caro naredingja adale sluga, leskere romna, e čhaven hem sa so isi le te bikinen te šaj agjar te iranel leske o dugo.
26Togaš o sluga pelo ko kočaka anglo leste hem molingja le vakerindor: ‘Adžiker man hem me ka iranav tuke sa.’ 27E caroske pelo žal, oprostingja leske o dugo hem mukhla le te džal peske.
28Ama ov koga iklilo, arakhla jekhe amale, javere sluga, so dužinela leske sine šel srebrenikija. Astargja le hem počmingja te tasavel le, rodindor: ‘Iran mange mo dugo!’
29Togaš leskoro amal pelo ko kočaka anglo leste hem molingja le vakerindor: ‘Adžiker man hem me ka iranav tuke sa.’
30Ama ov na mangla te adžikerel, nego gelo hem frdingja pe amale ko zatvor dži kote na iranela leske o dugo.
31Koga leskere amala, o javera sluge, dikhle so ulo, sine lenge but pharo i gele hem vakerge sa e caroske so ulo.
32Togaš o caro vikingja e sluga kaske so oprostingja o dugo hem phengja leske: ‘Lošno slugo! Oprostingjum tuke sa o dugo, soske molingjan man. 33Na trebingja li te žaline tu da te amale, sar me so žalingjum tut?’ 34I o caro holangja hem dengja le ko čuvajra e zatvoreskere te mučinen le sa dži kote na iranela leske sa o dugo.
35Agjar mo Dad soj ko nebo ka kerel tumenge, ako na oprostingjen tumare phraleske taro celo srce.”
Currently Selected:
Matej 18: MAR
Highlight
Copy
Compare
Share
Want to have your highlights saved across all your devices? Sign up or sign in
