Dejla 7
7
E Stefaneskiri propoved anglo Evrejsko Sovet
1Togaš o baro svešteniko pučlja e Stefane: “Čače li adava so vakerena protiv tute?”
2A ov odgovoringja lenge: “Dadalen hem phrajlalen, šunen man! O Devel e slavakoro sikavgja pe amare parapaposke e Avraameske dži kote panda sine ki Mesopotamija, angleder te džal te živinel ko Haran. 3O Devel phengja leske: ‘Mukh ti phuv hem te familija hem dža ki phuv koja me ka sikavav la tuke.’#Soz 12:1.
4Agjar o Avraam mukhla i phuv e Haldejconengiri hem gelo te živinel ko Haran. Koga mulo o dad leskoro, o Devel bičhalgja le ki akaja phuv kote so akana tumen živinena. 5I na dengja le nijekh najtikno kotor tari phuv ko nasledstvo, ama vetingja leske deka ov hem leskoro seme pala leste ka nasledinen adaja phuv, iako e Avraame panda na sine le čhave. 6O Devel phengja leske agjar: ‘Te čhave ka oven jabandžije javerenge ki phuv. Adathe ka oven robija hem ka oven mučime štaršel berš. 7Ama me ka sudinav adale narodoske kaskere robija ka oven. A palo adava ka ikloven tari adaja phuv hem ka služinen mange ko akava than.’#Soz 15:13-14. 8Togaš o Devel dengja e Avraameske o zavet bašo obrezanje. I e Avraameske bijandilo o Isak hem ko oftoto dive obrezinge le. E Isakoske bijandilo o Jakov, a e Jakoveske bijandile o dešuduj dada e narodoskere.
9E Jakoveskere čhave, o dada e narodoskere, sine ljubomorna pe phraleske e Josifeske, i bikinge le sar robo ko Egipet. Ama o Devel sine leja 10hem ikalgja le taro leskere muke. Dengja le mudrost hem kergja šukar te mislinel lestar o faraoni, o caro taro Egipet. Adaleske o faraoni čhigja le upravniko upro Egipet hem upro celo leskiri palata.
11Togaš ko celo Egipet hem ko Hanan ulo bokhalipe hem bare muke, i amare parapapija našti sine te arakhen hajbe. 12Koga o Jakov šungja deka ko Egipet isi giv, bičhalgja amare parapapon adathe prvo puti. 13A koga gele o dujto puti adathe, o Josif phengja pe phralenge koj tano ov, a o faraoni doznangja baši e Josifeskiri familija. 14Palo adava o Josif bičhalgja te vikinen leskere dade e Jakove hem celo leskiri familija te aven ko Egipet – sarine sine eftavardešu pandž džene. 15Agjar o Jakov gelo ko Egipet kote so mulo ov hem amare parapapija. 16Lengere tejla sine legarde ko Sihem hem čhivde ko grobo so o Avraam ko Sihem kingja le taro čhave e Emoreskere baši nesavi cena.
17Sar so avela sine o vreme paše o Devel te pherel o vetuvanje so dengja e Avraame, amaro narodo ko Egipet sa poviše bajrola sine, 18sa dži kote ko Egipet na alo javer caro so na pendžarela sine e Josife.#Iz 1:8. 19Ov but lošno kergja amare narodoja, mučingja amare parapapon hem silaja čhigja len te mukhen pumare neve bijame čhaven avrik te meren.
20Ko adava vreme bijandilo o Mojsej. Ov sine posebno čhavo anglo o Devel. Trin masek sine arakhlo taro pi familija. 21A koga mukhle le avrik, e faraoneskiri čhaj lela le hem bajlargja le sar po čhavo. 22O Mojsej sine sikavdo ki celo Egipetsko mudrost hem sine silno ko lafija hem dejla.
23Koga e Mojsej sine le saranda berš, odlučingja te džal te dikhel pe phralen e Izraelcon. 24I dikhla sar jekh Egipčani mučinela jekhe Izraelco, ov počmingja te braninel le, hem odmazdindor mudargja e Egipčane. 25O Mojsej mislinela sine deka leskoro narodo ka svatinel deka o Devel preku leste ka spasinel len, ama ola na svatinge le.
26O tajsutno dive dikhla dujen Izraelcon sar marena pe. Ov dikhla te smirinel len vakerindor: ‘Manušalen, tumen sijen phrajla! Soske maškar tumende akošena tumen?’
27Ama okova so počmingja te marel pe pašutne, guringja e Mojsej hem phengja leske: ‘Koj tut čhigja tut te vodine hem te ove sudija upro amende? 28Te na mangeja man da te mudare sar so mudargjan erati e Egipčane?’#Iz 2:14. 29Koga o Mojsej šungja akava, našla taro Egipet hem gelo te živinel sar jabandžija ki Midijansko phuv, kote so bijandile leske duj čhave.
30Saranda berš palo adava, pojavingja pe leske angeli ki pustina paše ki gora Sinaj, ki jag upri ki grmuška so thablola sine. 31Koga dikhla adava, o Mojsej sine čudimo adalestar. Dži kote avela sine po paše dži ki grmuška te dikhel po šukar, šungja o glaso e Gospodareskoro: 32‘Me sijum o Devel te parapapongoro, Devel e Avraameskoro, e Isakoskoro hem e Jakoveskoro.’#Iz 3:6. O Mojsej tresingja tari dar hem nasminela sine te vazdel po šero te dikhel.
33Togaš o Gospodari phengja leske: ‘Ikav te sandale, adaleske so tergjoveja ki sveto phuv. 34Me čače dikhlum o muke me narodoskere ko Egipet hem šungjum sar ofkinena, i adaleske hulilum te oslobodinav len. Akana tut ka bičhavav tut ko Egipet!’#Iz 3:5,7,8,10.
35Adava Mojsej so cidingjen le vakerindor: ‘Koj tut čhigja te vodine hem te ove sudija?’, o Devel preku o angeli so pojavingja pe leske ki grmuška bičhalgja te ovel lengoro vodači hem okova so ka spasinel len. 36I ov ikalgja len adathar, kerindor čudija hem znakija ko Egipet, ko Lolo More hem saranda berš ki pustina.
37Ov tano adava so vakergja e Izraelconge: ‘O Devel ka vazdel proroko sar mande taro tumaro narodo.’#PZ 18:15. 38O Mojsej tano adava so sine khedimo e narodoja ki pustina, e angeleja so vakergja leske ki gora Sinaj hem amare parapaponcar. Ov primingja dživde lafija te predajnel len amenge. 39Ama amare parapapija na mangle te šunen le, nego frdinge len hem ko pumare srcija irange pe ko Egipet, 40vakerindor e Aroneske: ‘Ker amenge devejla so ka džan angli amende, soske na džanaja so ulo okole manušeja e Mojsijaja so ov ikalgja amen taro Egipet.’#Iz 32:1. 41Togaš ola kerge idoli ko izgled e telcoskoro, i denge žrtve hem slavinge bašo adava so kerge le pumare vastencar. 42Ama o Devel cidingja pe lendar hem mukhla len te slavine o kham, i mesečina hem o čerenja, sar soj pišimo ko lil e Prorokongoro:
‘Mange li dengjen žrtve hem poklojna
saranda berš ki pustina,
o Izraelska manušalen?
43Na, nego phiragjen e Molohoreskoro šatori
hem i čereni tumare devleskiri e Refaneskiri,
e idolen so kergjen le te slavinen len.
Adaleske ka bičhavav tumen ko ropstvo’#Amos 5:25-27.,
po dur taro Vavilon.
44Amare parapapon sine len o Šatori taro zavet ki pustina, so sine kerdo sar so o Devel zapovedingja e Mojsijaske te kerel le prema o izgled so dikhla. 45Amare parapapija priminge o Šatori hem e Isuse Navineja ange le ki phuv, koja so lele la taro manuša so na džanena e Devle, a so o Devel brkingja len adathar angleder lende. O Šatori ačhilo adathe sa dži ko vreme e caroskoro e Davideskoro. 46O David arakhla milost anglo Devel, hem mangla lestar te kerel kher e Jakoveskere Devleske. 47Ama o Solomon sine adava so kergja leskoro kher.
48Ama o Najbaro Devel na bešela ko kher soj kerdo manušikane vastencar, sar so vakergja o proroko:
49‘O Gospodari phengja: O nebo tano mo troni,
a i phuv tani than kote so čhivava me pre.
Savo kher tumen šaj te keren mange?
Ili savo tano o than me odmoreskoro?
50Na kergja li mo vas sa akava?’#Isa 66:1-2.
51Tumen sijen inačije manuša! Tumare srcija hem o kana panda nane obrezime. Tumen sijen sar tumare parapapija! Sekat protivinena tumen e Sveti Duhoske! 52Isi li proroko so tumare parapapija na progoninge le? Ola mudarge dži okolen so vakerge taro ajbe e Pravednikoskoro, so tumen akana predajngjen hem mudargjen le. 53Tumen so primingjen o Zakoni preku o angejla, ama na ikergjen le.”
E Stefaneskoro mudariba e barencar
54Koga šunge adava o člejna taro Evrejsko Sovet, but holange upra leste hem počminge pe dandencar te krckjinen.
55Ama o Stefan, pherdo e Sveti Duhoja, dikhla ko nebo hem dikhla e Devleskiri slava hem e Isuse sar tergjola tari desno strana e Devleskiri. 56Togaš phengja: “Akje, dikhava o nebo phravdo hem o Čhavo Manušeskoro sar tergjola tari desno strana e Devleskiri.”
57A ko adava ola sarine počminge te phanden pumare kana hem te vikinen sa pe glasoja hem sarine uštile upra leste. 58Ikalge le avrik taro gradi hem počminge te frden bara upro leste. A o svedokija čhige pumare šeja anglo pre jekhe terne manušeskere so vikinela pe sine Savle.
59Dži kote frdena sine bara upro Stefan, ov vikingja: “Gospode Isuse, primin mo duho!” 60Togaš pelo ko kočaka hem vikingja sa pe glasoja: “Gospode, ma računin lenge akava bašo grevo!”
I koga vakergja adava, mulo.
Currently Selected:
Dejla 7: MAR
Highlight
Copy
Compare
Share
Want to have your highlights saved across all your devices? Sign up or sign in