Dejla 4
4
O Petar hem o Jovan anglo baro sudo
1Dži kote o Petar hem o Jovan vakerena sine e narodoske, ale uza lende o sveštenikija, o naredniko e Hrameskere čuvarengoro hem o sadukeja. 2Ola sine but holame soske o Petar hem o Jovan sikavena sine e manušen, propovedindor deka isi uštibe taro mule preku o Isus, 3i astarge len hem čhige len ko zatvor dži ko tajsutno dive, soske više sine rat. 4Ama but okolendar so šunge o evangelije verujnge, i o broj e muršengoro barilo paše dži ko pandž ilade.
5O tajsutno dive ko Erusalim khedinge pe o Evrejska vodačija, o starešine hem o učitejla e Zakoneskere, 6o baro svešteniko o Ana, o Kajafa, nesavo Jovan, o Aleksandar hem javera tari familija e bare sveštenikoskiri. 7Ola ange e Petare hem e Jovane anglo lende, i počminge te pučen len: “Kaskere silaja ili kaskere anaveja kergjen akava?”
8Togaš o Petar, pherdo e Sveti Duhoja, vakergja lenge: “O starešinalen hem vodačalen e narodoskere! 9Ako amenge avdive sudinela pe adaleske so kergjem šukaripe e nasvale manušeske, soj ov tano sasljardo, 10togaš džanen akava sarinen tumen hem celo Izraelsko narodo: akava manuš tergjola angla tumende sasto, soske tano sasljardo ko anav e Isuse Hristoskoro taro Nazaret, so tumen čhigjen le ko krsto, a so o Devel vazdingja taro mule. 11O Isus tano
‘o bar so tumen o zidajra frdingjen le,
so ulo najvažno bar e khereskoro.’#Ps 118:22.
12Hem nane spasenije ko nijekh javer anav, soske nijekh javer anav nane dendo telo nebo e manušenge soleja šaj te ova spasime.”
13Koga dikhle deka o Petar hem o Jovan na darana hem koga svatinge deka ola tane obična manuša so nane len škola, iznenadinge pe. Džange deka ola da sine e Isuseja, 14ama adaleske so dikhle adale sasljarde manuš sar tergjola lencar, našti sine ništo te phenen lenge. 15Togaš naredinge e Petareske hem e Jovaneske te iklon taro Evrejsko Sovet, a ola počminge te dogovorinen pe maškar peste, 16vakerindor: “So ka kera akale manušencar? Sarinen so živinena ko Erusalim džanena deka preku lende sine kerdo baro čudo, a amen našti te vakera deka na sine agjar. 17Ama te čhinava adava te na širingjovel maškar o narodo, mora te opomenina len te na keren više lafi nikasaja ko adava anav.”
18Togaš palem vikinge len hem naredinge lenge te na keren lafi hem te na sikaven više ko anav e Isuseskoro.
19Ama o Petar hem o Jovan odgovoringe lenge: “Tumen vakeren soj tano ispravno anglo e Devleskere jakha, te šuna tumen ili e Devle? 20A soj dži amende našti te na vakera adalestar so dikhlem hem so šungjem.”
21I ola panda jekh puti opomeninge len hem mukhle len. Našti sine te arakhen sar te kazninen len adaleske so sa o narodo slavinela sine e Devle bašo adava so ulo. 22Soske o manuš so sine čudesno sasljardo sine le poviše taro saranda berš.
I molitva e vernikongiri
23Koga e Petare hem e Jovane mukhle len, ola gele pumarende hem vakerge lenge sa so o prvosveštenikija hem o starešine phenge lenge. 24Koga ola šunge adava, počminge zaedno te molinen pe e Devleske vakerindor: “Gospode, tu so kergjan o nebo hem i phuv, o more hem sa soj ki lende, 25tu preku o Sveti Duho hem taro muj te slugaskoro e Davideskoro, amare parapaposkoro vakergjan:
‘Soske o javera narodija buninena pe,
hem soske o narodija džabe planirinena zamke?
26O cajra e phuvijakere uštena te džan ko maribe,
hem o vladitejla khedena pe zaedno hem džana protiv o Gospodari
hem protiv leskoro Pomazaniko.#4:26 Akava tano Mesija ili Hristos’#Ps 2:1-2.
27Čače o car Irod hem o upraviteli o Pontij Pilat ko akava gradi khedinge pe zaedno e javere narodoncar hem e Izraeleskere narodoja protiv to sveto sluga o Isus, so tu pomazingja le. 28Ola kerge adava so ti sila hem ti vojla angleder odlučingjan te ovel adava. 29A akana Gospode, dikh lengere zakane hem de amenge, te slugenge, te propovedina to evangelije bizi dar. 30Pružin to vas te sasljare hem te kere znakija hem čudija ko anav te sveto slugaskoro e Isuseskoro.”
31Koga završinge e molitvaja, o than kote so sine tresingja hem sarinen pherdile e Sveti Duhoja, i počminge bizo dar te propovedinen e Devleskoro lafi.
O vernikija živinena složno maškar peste
32Sa o vernikija sine jekhe srceja hem jekhe dušaja. I nikoj na vakerela sine deka nešto taro leskoro barvalipe tano samo leskoro, nego sa adava sine lengoro zaedničko. 33O apostojla bare silaja svedočinena sine bašo uštibe taro mule e Gospodareskoro e Isuseskoro, a e Devleskiri blagodat sine silno upro sarinende. 34Nikaske lendar ništo na falingja, soske okolen so sine len nive ili khera, bikinena len sine 35hem anena sine o pare ko apostojla. Hem adalestar delinena sine pare sekaske doborom kozom so trebela sine leske.
36Agjar nesavo Leviti da taro Kipar, so sine leskoro anav Josif, so o apostojla vikinge le Varnava (so značinela manuš so ohrabrinela), 37ov bikingja pi niva, a o pare angja len ko apostojla.
Currently Selected:
Dejla 4: MAR
Highlight
Copy
Compare
Share
Want to have your highlights saved across all your devices? Sign up or sign in