Dejla 3
3
O Petar sasljarela e manuše so našti te phirel
1Jekh dive o Petar hem o Jovan džana sine ko Hrami ko vreme e molitvakoro, ko trin o sati paloručko. 2I nesave manuša legarena sine jekhe manuše so panda taro bijanibe sine sakati hem našti sine te phirel. Sekova dive čhivena le sine uza ki porta e Hrameskiri so vikinela pe sine “Šuži” i mangela peske sine taro adala so khuvena ko Hrami. 3Koga dikhla e Petare hem e Jovane sar mangena te khuven ko Hrami, rodingja lendar pare. 4A o Petar zaedno e Jovaneja, dikhle ki leste hem o Petar phengja leske: “Dikh amen!”
5Hem o manuš dikhla len šukar, adžikerindor te den le nešto.
6A o Petar vakergja leske: “Nane amen ni srebro ni zlato, ama dava tut adava so isi man: ko anav e Isuse Hristoske taro Nazaret, ušti hem phir!” 7I astargja le taro desno vas hem vazdingja le. Hem odma leskere pre hem o zglobija stegisalile. 8Ov rupingja ko pre hem počmingja te phirel. Togaš khugja lencar ko Hrami, phirindor hem rupindor, hem slavindor e Devle. 9Koga sa o manuša dikhle le sar phirela hem slavinela e Devle, 10pendžarge le deka ov tano o isto manuš so bešela sine hem so mangela peske sine angli porta e Hrameskiri soj vikimi “Šuži”, i ola sine but čudime hem sine iznenadime bašo adava so ulo leja.
O Petar propovedinela ko Hrami
11Dži kote o sasljardo manuš na cidela pe sine e Petarestar hem e Jovanestar, sa o manuša sine čudime hem prastandile ki lende ko than so vikinela pe e Solomoneskoro trem.
12Koga o Petar dikhla adava, phengja e lenge: “Izraelska manušalen, soske akava čudinela tumen? Soske agjar dikhena ki amende sar amare silaja ili baši amari pobožnost kergjem akava manuše te phirel? 13O Devel e Avraameskoro, e Isakoskoro hem e Jakoveskoro, o Devel amare parapapongoro, proslavingja pe sluga e Isuse, so tumen predajngjen le te ovel mudardo hem otkažingjen tumen lestar anglo Pilat, iako ov mangla te mukhel le. 14Otkažingjen tumen taro Svetco hem taro Pravedniko, a rodingjen te oslobodinel pe tumenge ubijco. 15Mudargjen okole kastar avela o životo, ama o Devel vazdingja le taro mule, so amen sijem svedokija bašo adava. 16Veraja ko anav e Isuseskoro, akava manuš so dikhena le hem pendžarena le, ulo sasto. I vera ko anav e Isuseskoro angja le celosno te ovel sasto akava manuš anglo sarinen.
17A akana phrajlalen, džanava deka tumen hem tumare vodačija kergjen agjar adaleske so na džangjen. 18Ama o Devel agjar phergja adava so angleder vakergja preku o prorokija, vakerindor deka o Hristos ka cidel but. 19Adaleske pokajnen tumen hem iranen tumen ko Devel, te šaj tumare grevija te čistinen pe tumendar, 20te šaj e Gospodarestar avela i nevi sila hem te bičhavel tumenge e Isuse, so više biringja le te ovel o Hristos. 21Ov mora te ačhol ko nebo sa dži kote na avela o vreme o Devel te obnovinel sa, sar so angleder vetingja preku pe sveta prorokija. 22Soske o Mojsej phengja: ‘O Gospodari, tumaro Devel, ka vazdel tumenge taro tumaro narodo proroko sar mande. Šunen le šukar ko sa so ka vakerel tumenge! 23A sekoj so na šunela adale proroko, ka ovel cidimo taro e Devleskoro narodo hem ka ovel uništimo.’#PZ 18:15.
24Hem sa o prorokija so vakerge, počmindor taro Samuel, vakerge bašo akala dive. 25Tumen sijen naslednikija taro vetuvanje so o Devel dengja le preku o prorokija hem so phandla le tumare parapaponcar. Ov phengja e Avraameske: ‘Preku to seme ka oven blagoslovime sa o narodija ki phuv.’#Soz 22:18; 26:4. 26Koga o Devel vazdingja pe sluga, najanglal bičhalgja le ki tumende te blagoslovinel tumen te šaj sekova jekh tumendar te iranel pe taro lošna drumija.”
Currently Selected:
Dejla 3: MAR
Highlight
Copy
Compare
Share
Want to have your highlights saved across all your devices? Sign up or sign in