Dejla 27
27
O Pavle plovinela ko Rim
1Koga sine odlučimo te plovinel pe ki Italija, o Pavle hem nesave javera zatvorenikija sine predajme jekhe kapetaneske so vikinela pe sine Julij, tari četa e Rimsko caroskiri. 2Khugjem ko brodi so alo taro Adramit, so džala sine ki Tikni Azija hem plovinge. A amencar sine o Aristarh, o Makedonco taro Solun. 3Tajsutno dive hulilem ko Sidon. A o Julij, so ponašinela pe sine e Pavleja sar amal, mukhla e Pavle te dža ko pe amala, te šaj te den le sa so trebela leske.
4Koga gelem adathar, plovingjem severno taro Kipar, adaleske so i bavlal phudela sine ki amende. 5Koga plovingjem preku o more uza ki Kilikija hem Pamfilija, reslem ko gradi Mira ki Likija. 6Adathe o kapetani arakhla jekh brodi tari Aleksandrija so plovinela sine ki Italija, i uklargja amen ki leste.
7But dive plovingjem pohari hem edvaj reslem paše dži ko Knid. Adaleske so i bavlal na mukhela sine te ikera amaro pravco, plovingjem uza ko Salmona, tari južno strana taro Krit. 8Pharipaja plovingjem uza ko kopno hem edvaj reslem dži ko than so vikinela pe “Šukar Pristaništa”, paše uza ko gradi Laseja.
9But vreme našagjem hem o ploviba više sine opasno, i adaleske so više nakhla o posti e Evrejengoro, o Pavle opomeningja len:
10“Manušalen, dikhava deka amaro patujbe ka ovel opasno hem ka ovel bari šteta, na samo bašo pharipe hem bašo brodi, nego hem bašo amaro životo da.”
11Ama o kapetani poviše verujngja e manuše so upravinela sine e brodeja hem e manuše kaskoro so sine o brodi, nego e Pavleskere lafende. 12Adaleske so o pristanište kote so tergjola sine o brodi na sine šukar bašo nakhajbe o jeven, poviše džene odlučinge te prodolžinen te plovinen, nadindor deka ka resen dži ko Feniks hem adathe ka nakhen o jeven. O Feniks sine le pristanište ko Krit so sine iramo ko jugozapadno hem severzapadno.
I bura ko more
13Koga počmingja i tikni bavlal taro jug, ola mislinge deka ka ovel agjar sar so planiringe, vazdinge o sidro hem plovinge uza ko kopno e Kriteskoro. 14Ama odma palo adava, taro Krit počmingja te phudel jekh silno bavlal, vikimi “Severoistočno bavlal.” 15Koga i bavlal astargja o brodi našti sine te dža protiv late, i mukhlem lake te legarel amen. 16Koga plovinaja sine tari južno strana taro tikno ostrov so vikinela pe sine Kavda, edvaj nesar vazdingjem o čamco bašo spasiba. 17Koga vazdingjem le e šelencar, phandle o brodi i stegingjem le te na phagjol. Adaleske so darandile te na zaglavinel ko pošikalo than telo pani uza ko Sirt, mukhle o sidro, hem agjar i bavlal legargja len.
18I silno bavlal doborom astargja amen so o tajsutno dive počminge te frden o pharipe taro brodi, 19a ko trito dive frdinge dži e brodeskiri oprema. 20Koga divencar na pojavingja pe ni o kham ni o čerenja, a i silno bavlal ovela sine sa pološno hem pološno, našagjem sekoja nada deka ka spasina amen. 21Nakhla but vreme sar na hale maro.
Togaš o Pavle ačhilo angli lende hem vakergja lenge: “Manušalen, trebingjen te šunen man hem te na dža sine taro Krit. Agjar nane sine te astarel amen akala muke hem akaja šteta. 22Ama akana vakerava tumenge ma daran, soske nijekh amendar nane te našavel po životo, samo o brodi ka ovel uništimo. 23Soske erati angli mande terdilo o angeli e Devleskoro kaskoro so sijum hem kaske so služinava 24hem vakergja mange: ‘Ma dara, Pavle! Tu mora te iklove anglo e Cezareskoro sudo ko Rim. A o Devel ka arakhel sarinen so plovinena tuja.’ 25Adaleske manušalen, ma daran! Soske verujnava ko Devel deka ka ovel agjar sar so phengja mange. 26Ama mora o brodi te phagjol paše uza ko nesavo ostrov.”
O brodi phagjola
27Ki dešuštar rat sar i bavlal legarela amen sine ko Srednozemno more, ki ekvaš i rat o mornajra mislinge deka sijem paše uza ko kopno, 28i meringe kozom i hor o pani hem dikhle deka tano paše saranda metre. Na nakhla but palo adava, palem meringe o pani hem dikhle deka tano paše trijanda metre. 29Adaleske so darandilem deka ka khuva ki nesavi karpa, mukhle o štar sidrija taro paluno delo e brodeskoro hem molinge pe te phravgjol o sabaj.
30A o mornajra mangle te našen taro brodi i počminge te mukhen o čamco ko pani te spasinen pe vakerindor demek mangena o sidrija te mukhen tari angluni strana e brodeskiri. 31A o Pavle phengja e kapetaneske hem e vojnikonge: “Ako na ačhile akala manuša ko brodi, tumen nane te spasinen tumen.”
32Togaš o vojnikija čhinge o šele so ikerena sine o čamco hem mukhle le te perel.
33Angleder te phravgjol o sabaj, o Pavle počmingja sarinen te molinel te han maro vakerindor: “Avdive tano dešuštar dive sar nakhavena adžikerindor hem bizo hajbe. 34Akana molinava tumen te len te han, te mangena te živinen. A nijekheske tumendar nane te perel nijekh bal taro tumaro šero.”
35Koga vakergja akava, lela o maro hem anglo sarine blagodaringja e Devleske, i phagla le hem počminge te han. 36Sarinen ohrabrisalile hem hale. 37A ko brodi sijem sine dujšelu eftavardešu šov džene. 38Koga čalile, počminge te lokharen o brodi frdindor o giv ko more.
39Koga phravdilo o sabaj, na pendžarge o kopno, ama dikhle nesavo pošikalo zaliv e plažakoro, te šaj adathe te legaren o brodi. 40Phravge o sidrija hem mukhle len ko more, a ko adava momenti isto phravge o šele so ikerena sine o volani, vazdinge o angluno edro prema i bavlal hem plovinge dži ki plaža. 41Ama o brodi khugja ko pošikalo than hem ačhilo adathe. A o angluno delo zaglavingja pe hem našti sine te mrdinel pe, a o paluno delo počmingja te phagjol taro silna talasija.
42Togaš o vojnikija mangle te mudaren e zatvorenikon, te šaj te na našen lendar plivindor. 43Ama o kapetani mangla te spasinel e Pavle hem čhinagja len te keren adava. Ov naredingja okolenge so džanena te plivinen prvo te frden pe taro brodi hem te ikloven ko kopno, 44a javera te ikeren pe upro phajla ili upro javera kotora taro brodi. Agjar sarinen dživde iklile ko kopno.
