Dejla 22
22
1“Phrajlalen hem dadalen, šunen akana so isi man te phenav tumenge ki mi odbrana.”
2Koga šunge sar kerela lafi Evrejski, uli bari tišina.
I o Pavle phengja lenge: 3“Me sijum Evrejco bijamo ko Tars tari Kilikija, ama barilum akate ko Erusalim. Sijum sine e Gamalileskoro učeniko hem ov šukar sikavgja man taro Zakoni amare parapapongoro. Silno služingjum e Devleske isto sar sarinen tumen avdive. 4Progoninava sine e sledbenikon taro akava Drumo dži ko meriba. Muršen džuvlen astarava sine hem čhivava len sine ko zatvor. 5Adava šaj te potvrdinen o baro svešteniko hem celo Evrejsko Sovet. Dži lendar dobingjum lila so denge man vlast te džav ko Damask palo vernikija, i gelum te astarav okolen so sine adathe hem phandle te anav len ko Erusalim te oven kaznime.”
O Pavle vakerela sar obratingja pe
6“Ama paše dešuduj o sati paloručko sar džava sine e drumoja hem avava sine paše uza ko Damask, taro jekh puti silno svetlina taro nebo svetingja uza mande.
7Pelum ki phuv hem šungjum glaso so vakerela mange: ‘Savle, Savle! Soske progonineja man?’
8Me pučljum: ‘Koj sijan tu, Gospode?’ A ov odgovoringja mange: ‘Me sijum o Isus taro Nazaret so tu progonineja.’
9O manuša so sine mancar dikhle i svetlina, ama na svatinge o glaso okoleskoro so kerela sine mancar lafi.
10Togaš pučljum: ‘So te kerav Gospode?’ A o Gospodari odgovoringja mange: ‘Ušti hem dža ko Damask. Adathe ka vakerel pe tuke sa soj tuke odredimo te kere.’
11I okola so sine mancar legarge man taro vas, adaleske so i silno svetlina kojlargja man, i agjar alum ko Damask.
12Jekh manuš so vikinela pe sine Ananija alo ki mande. Ov sine pobožno manuš palo Zakoni hem but poštojmo taro sa o Evreja so živinena sine adathe. 13Ov terdilo uza mande hem vakergja mange: ‘Phrala Savle, dikh akana!’ I taro jekh puti irangja pe mo dikhibe hem dikhlum le.
14Palo adava phengja mange: ‘O Devel amare parapapongoro biringja tut te pendžare leskiri vojla hem te dikhe e Pravedniko hem te šune o glaso taro leskoro muj. 15Adaleske so tu ka ove leskoro svedoko anglo sa o manuša bašo adava so dikhlan hem so šungjan. 16A akana so adžikereja? Ušti, ov krstimo hem thov tut taro te grevija, vikindor e Gospodareskoro anav.’
17Koga irangjum man ko Erusalim hem molingjum man ko Hrami, sine man vizija 18hem dikhlum e Gospodare sar vakerela mange: ‘Sigjar hem odma iklov taro Erusalim, soske o manuša akate nane te prifatinen to svedoštvo baši mange.’
19A me phengjum leske: ‘Gospode, ola džanena deka džava sine tari sinagoga ki sinagoga te phandav len ko zatvor hem te marav okolen so verujnena ki tute. 20Hem koga čhordilo o rat te svedokoskoro e Stefaneskoro, me da sijum sine adathe, odobringjum hem pazingjum o šeja okolengere so mudarena le sine.’
21Togaš o Gospodari phengja mange: ‘Dža! Ka bičhavav tut dur – ko javera nacije.’ ”
O Pavle vakerela deka tano Rimsko gragjani
22O manuša šunge e Pavle sa dži ko akava lafi, a palo adava vikinge: “Mudar le! Asavko manuš na zaslužinela te živinel!”
23Dži kote vikinena sine, frdinge pumare šeja hem vazdinge prašina ko vozduh, 24o naredniko naredingja te legaren e Pavle ki kasarna, te kamšikujnen le hem te ispitinen le, te šaj te doznajnel soske agjar vikinena sine upro leste.
25Ama koga phandle le kaišencar te kamšikujnen le, o Pavle pučlja e kapetane so tergjola sine adathe: “Dozvolimo li te kamšikujnen Rimsko manuše so leske panda nane sudimo?”
26Koga o kapetani šungja adava, gelo ko naredniko hem phengja leske: “So mangeja te kere? Akava manuš tano Rimsko gragjani.”
27Togaš o naredniko gelo uza ko Pavle hem pučlja le: “Vaker mange, čače li sijan Rimsko gragjani?”
A o Pavle odgovoringja: “Oja.”
28O naredniko vakergja leske: “Me but pare dengjum te šaj te ovav Rimsko gragjani.”
A o Pavle odgovoringja leske: “Me bijandilum sar Rimsko gragjani.”
29Hem odma cidinge pe lestar okola so trebela sine te kamšikujnen le. A o naredniko darandilo koga doznangja deka o Pavle tano Rimsko gragjani, so ov phandla le.
O Pavle anglo Evrejsko Sovet
30O tajsutno dive o naredniko oslobodingja e Pavle, a adaleske so mangla šukar te doznajnel soske o Evreja tužinena sine e Pavle, naredingja e prvosveštenikonge hem bašo celo Sovet te kheden pe, i angja e Pavle hem čhigja le anglo lende.
Currently Selected:
Dejla 22: MAR
Highlight
Copy
Compare
Share
Want to have your highlights saved across all your devices? Sign up or sign in