Dejla 19
19
O Pavle propovedinela ko Efes
1Dži kote o Apolos sine ko Korint, o Pavle nakhla maškar i uprini phuv hem resla ko Efes. Adathe arakhla nesave učenikon, 2i pučlja len: “Primingjen li o Sveti Duh koga verujngjen?”
A ola vakerge leske: “Na, ni na šungjem deka postojnela o Sveti Duh.”
3A o Pavle pučlja len: “Savo krstiba sine tumen?”
Ola odgovoringe: “E Jovaneskoro krstiba.”
4O Pavle phengja lenge: “E Jovaneskoro krstiba sine bašo pokajanie. Ov vakerela sine e Izraelsko manušenge te verujnen ko okova so avela pala leste – ko Isus.”
5Koga šunge adava, krstinge pe ko anav e Gospodareskoro e Isuseskoro, 6a koga o Pavle čhigja pe vasta upro lende, o Sveti Duh hulingja upro lende hem počminge te keren lafi ko javera čhibja hem te prorokujnen. 7Ola zaedno sine paše dešuduj murša.
8Palo adava o Pavle gelo ki sinagoga hem adathe trin masek bizo dar propovedinela sine. Debatirinela sine lencar hem ubedinela len sine bašo carstvo e Devleskoro. 9Ama nesave lendar sine inačije hem na mangena sine te verujnen hem anglo manuša vakerena sine lošno bašo drumo e Gospodareskoro. Adaleske o Pavle mukhla len hem lela e učenikon peja, i sekova dive debatirinena sine ki učilnica e Tiraneskiri. 10Ov kergja adava duj berš agjar so sa o manuša so živinena sine ki Tikni Azija, hem o Evreja hem okola so nane Evreja šunge bašo lafi e Gospodareskoro.
O čhave e Skevereskere probinena te ikalen e demonen
11O Devel kerela sine bare čudija preku o Pavle, 12agjar so dži o mendijla hem o pojasija so ov pipingja len legarena sine e nasvalenge hem ola sasljona sine taro pumaro nasvalipe hem o lošna duhija iklona sine lendar.
13A nesave taro Evreja so džana sine taro than ko than hem ikalena sine e lošno duhon, probinena sine upro opsednime manuša te vikinen o anav e Gospodareskoro e Isuseskoro, vakerindor: “Ko anav e Isuseskoro so o Pavle propovedinela le, naredinaja tumenge te ikloven!”
14Adava kerena sine o efta čhave e Skevereskere, so sine prvosvešteniko e Evrejengoro.
15Ama o lošno duho phengja lenge: “Pendžarava e Isuse hem e Pavle, ama koj sijen tumen?”
16Togaš o manuš so sine ki leste o lošno duho, rupingja upro lende i sarinen margja hem doborom khugja len so taro adava kher našle nange hem but khuvde.
17Koga šunge adava o Evreja hem okola so nane Evreja so živinena sine ko Efes, uklingja len dar, a o anav e Gospodareskoro e Isuseskoro sine but poštojmo.
18But taro adala so ule vernikija avena sine hem anglo sarinen priznajnena sine pumare lošna dejla. 19But džene so kerena sine magije khedinge pumare lila hem anglo sarinende tharge len. Koga računinge kozom vredinena o lila, iklilo deka vredinena pinda ilade srebrena pare. 20Agjar e Gospodareskoro lafi silno širinela pe sine hem ovela sine zoralo.
O bunt ko Efes
21Palo sa adava so ulo, o Pavle ko Duho odlučingja te nakhel maškar i Makedonija hem i Ahaja hem te džal ko Erusalim, i phengja: “Koga ka džav ko Erusalim, mora te džav ko Rim da.” 22Ov bičhalgja dujen taro pe pomošnikija ki Makedonija, e Timoteje hem Eraste, a ov ačhilo panda hari ki Tikni Azija.
23Ko adava vreme uli bari buna protiv o drumo e Gospodareskoro. 24Adaleske so jekh kovači so vikinela pe sine Dimitrija, so kerela sine taro srebro tikne hramija e Artemidake, i adaleja anela sine bari zarabotka sa e zanaetčijenge.
25Ov khedingja e zanaetčijen zaedno okolencar so kerena sine isto buti, hem vakergja lenge: “Amalalen, tumen džanena deka šukar zarabotinaja akale bukjaja. 26Ama, dikhena hem šunena sar akava manuš o Pavle ubedingja hem lela bute manušen te verujnen, na samo ko Efes nego dži ki celo Tikni Azija, vakerindor deka nane devejla adala soj kerde taro manušikane vasta. 27Isi opasnost na samo so amaro zanati ka šungjol lošno, nego o hrami da e bare božicakoro e Artemidakoro ka našavel po ugled hem ka našavel po baripe so slavinena la sarine ki Tikni Azija hem ko celo sveto.”
28Koga ola šunge adava, but holange hem počminge te vikinen: “Bari tani i Artemida taro Efes.” 29Togaš ko celo gradi uli bari buna, hem sarinen zaedno prastandile andre ko teatar hem silaja vlečinge e Makedoncon e Gaja hem e Aristarhe, so patujnena sine zaedno e Pavleja. 30O Pavle mangela sine te iklol anglo narodo, ama o učenikija na mukhle le. 31Dži nesave vodačija tari Tikni Azija so sine amala e Pavleske, bičhalge leske manuše te vakerel leske te na džal ko teatar.
32A ko teatar nesave vikinena sine jekh, a javera javer, adaleske so sarinen sine bunime – but lendar na džanena sine soske khedinge pe adathe. 33O Evreja guringe e Aleksandare te iklol anglal hem počminge te sikaven le so te vakerel. Ov dengja znako vasteja te kjutinen te šaj te braninel pe anglo narodo. 34Ama koga svatinge deka tano Evrejco, zaedno sarinen paše duj satija vikinge: “Bari tani e Artemida taro Efes!”
35Togaš e gradeskoro pisari smiringja e narodo hem phengja lenge: “Efeska manušalen! Na džanena li sarinen deka o gradi Efes tano čuvari e bare Artemidakere hrameskoro hem lakere statuakoro so peli taro nebo? 36Adaleske so sarine džanena adava, trebela te smirinen tumen hem te na keren ništo sigate. 37Tumen angjen akale manušen akate, iako ola na čorge ništo taro hrami, ni na uvredžinge amare božica. 38A te mangla o Dimitrija hem o zanaetčije soj tane leja, te tužinen nekas, o sudo tano phravdo hem adathe isi upravnikija. Adathe neka tužinen pe. 39A te mangle nešto poviše, mora te rešinel pe adava anglo zakonsko sobranie. 40Soske isi opasnost te ova tužime bašo adava avdive so ulo, a nane amen nisavi pričina te šaj te opravdina akaja buna.”
41Hem, koga phengja adava, mukhla e manušen te džan peske.
Currently Selected:
Dejla 19: MAR
Highlight
Copy
Compare
Share
Want to have your highlights saved across all your devices? Sign up or sign in