Dejla 16
16
O Timotej džala e Pavleja hem e Silaja
1O Pavle alo ki Derva a poslem ki Listra, kote so živingja o učeniko so vikinela pe sine Timotej. Ov sine čhavo Evrejkakoro so sine vernička, a o dad leskoro na sine Evrejco. 2O vernikija ki Listra hem Ikonija šukar vakerena sine lestar. 3O Pavle mangla te lel le peja ko drumo, i obrezingja le sebepi o Evreja so živinena ko adala thana, soske sarine džanena sine deka leskoro dad na sine Evrejco. 4I dži kote nakhela sine taro gradija, vakerela sine e manušenge bašo odluke so ange len o apostojla hem o starešine ko Erusalim ko save mora te ikeren pe. 5I agjar o crkve ovena sine silna ki vera hem bajrola sine lengoro broj sekova dive.
O Pavle vikimo te džal ki Makedonija
6A ola nakhle maškar o thana tari Frigija hem Galatija, adaleske so o Sveti Duh zabraningja lenge te propovedinen o lafi e Devleskoro ki Tikni Azija. 7Koga resle dži ki granica e Mizijakiri, mangle te khuven ki Vitanija, ama o Duho e Isuseskoro na mukhla len. 8Agjar nakhle uza i Mizija hem ale ko gradi Troada.
9I adaja rat e Pavle sine le vizija: sar jekh Makedonco terdilo hem molingja le: “Ava ki Makedonija hem pomožin amen!”
10Pali adaja vizija, amen posigate dikhlem te dža ki Makedonija, adaleske so sijem sine sigurna deka o Devel vikinela amen te propovedina o evangelije.
E Lidijakoro obratiba
11Tari Troada plovingjem pravo ki Samotraka, a tajsutno dive ko Neapol, 12a adathar ko Filipi, so sine Rimsko kolonija hem glavno gradi taro adava than e Makedonijakoro. Adathe ačhilem nekozom dive.
13Ki sabota iklillem avrijal tari e gradeskiri porta ki reka, kote so mislingjem deka isi than molitvake. Adathe bešlem hem počmingjem te kera lafi nesave romnencar so sine khedime adathe. 14A jekh taro adala romnja so šungja le sine taro gradi Tiatir so lakoro anava sine Lidija, so bikinela sine skupa lole šeja. O Gospodari phravgja lakoro srce te šunel šukar adava so o Pavle vakergja.
15Koga oj hem lakere kherutne krstinge pe, oj vikingja amen vakerindor: “Te mislinena deka verujnava ko Gospodari, aven hem ačhoven mande ko kher.”
I agjar ubedingja amen te ačhova ki late.
O Pavle hem o Sila ko zatvor
16Jekh puti, dži kote džaja sine ko than te molina amen, arakhla amen jekh robinka. Oj sine opsednimi taro lošno duho so vakerela lake so ka ovel. Agjar oj zarabotinela sine but pare pe gospodarenge.
17Oj džala sine palo Pavle hem pala amende, vikindor: “Akala manuša tane sluge e Najbare Devleskere! Ola vakergja tumenge o drumo taro spasenije!”
18Hem agjar kerela sine but dive, i koga angja e Pavleske dži ko nak, irangja pe hem vakergja e duhoske: “Zapovedinava tuke ko anav e Isuse Hristoskoro te iklove latar.”
I odma o duho iklilo latar.
19A koga lakere gospodajra dikhle deka našavge i nada baši pumari zarabotka, astarge e Pavle hem e Sila hem vlečinge len dži ko ploštad e gradeskoro anglo vlastija. 20I koga ange len anglo sudije, vakerge: “Akala manuša tane Evreja hem anena nemir ko amaro gradi, 21hem propovedinena o adetija so amen, o Rimjajna, na trebela te prifatina ili te ikera len.”
22Togaš sa o manuša uštile protiv o Pavle hem o Sila, a o sudije pharavge o šeja upra lende hem naredinge te kamšikujnen len. 23Koga silno kamšikujnge len, čhige len ko zatvor hem naredinge e čuvareske šukar te arakhel len. 24A koga o čuvari dobingja asavki naredba, ov čhigja len ki kelije, a lengere pre phandla agjar so čhigja len ko phajla.
25Ki ekvaš i rat, o Pavle hem o Sila molinge pe hem gilage e Devleske, a o javera zatvorenikija šunena len sine. 26I taro jekh puti ulo doborom silno zemjotres so o temejla e zatvoreskere tresinge. Hem odma phravdile sa o udara hem sarinendar phravdile o lancija. 27Koga o čuvari uštilo hem alo upra peste, dikhla deka sa o udara e zatvoreskere phravdile, lela pi čhurik hem mangla te mudarel pe, adaleske so mislingja deka o zatvorenikija našle.
28Ama o Pavle sa pe glasoja vikingja: “Ma ker korkori tuke lošnipe! Sarine sijem akate!”
29Togaš o čuvari rodingja i lampa, i prastandor hem tresindor tari dar pelo ko kočaka anglo o Pavle hem anglo Sila.
30I ikalgja len avrijal hem pučlja len: “Cenime manušalen, so te kerav te šaj te ovav spasimo?”
31Ola odgovoringe leske: “Verujn ko Gospodari o Isus, i ka ove spasimo hem tu hem te kherutne.”
32Togaš propovedingja o lafi e Gospodareskoro leske hem leskere kherutnenge. 33Ko adava sati tari rat o čuvari lela e Pavle hem e Sila hem thogja lengere rane, i odma palo adava krstingja pe hem ov hem leskere kherutne. 34Togaš o čuvari legargja len ko po kher hem čhigja lenge te han, hem radujngja pes pe kherutnencar so verujnge ko Devel.
35Koga phravdilo o sabaj, o sudije bičhalge pumare službenikon te phenen e čuvareske te mukhel e Pavle hem e Sila.
36A o čuvari vakergja e Pavleske: “O sudije phenge mange te mukhav tumen. Akana šaj džana tumenge. Džan mireja!”
37Ama o Pavle vakergja leske: “Marge amen anglo sa o manuša, bizo te sudinen, iako sijem e Rimeskere manuša hem čhige amen ko zatvor, a akana mangena tajno te oslobodinen amen? Našti agjar! Neka aven ola korkori neka ikalen amen.”
38O službenikija vakerge adava e sudijenge, i koga šunge deka o Pavle hem o Sila tane Rimjajna, darandile. 39I ale, izvininge pe hem ikalge len molindor te džan peske taro lengoro gradi. 40Koga iklile taro zatvor o Pavle hem o Sila gele ko kher e Lidijakoro, dikhle pe e vernikoncar hem ohrabringe len, i palo adava gele peske adathar.
Currently Selected:
Dejla 16: MAR
Highlight
Copy
Compare
Share
Want to have your highlights saved across all your devices? Sign up or sign in