Dejla 12
12
O Irod progoninela e vernikon
1Ko adava vreme o car Irod počmingja te progoninel nesave manušen tari Crkva. 2Agjar mudargja čhurikaja e Jovaneskere phrale, e Jakove. 3Koga o caro dikhla deka adava tano šukar e Evrejsko vodačenge, naredingja te astaren e Petare da. A adava ulo ko Prazniko e Beskvasno Mareskoro. 4A koga astargja le, čhigja le ko zatvor. I naredingja te arakhen le štar grupe po štar vojnikija. A o Irod mangla pali Pasha te ikalel le anglo narodo hem te sudinel pe leske.
5Dži kote e Petare arakhena sine ko zatvor, i crkva silno molinela pe sine e Devleske baši leske.
E Petareskoro čudno iklojbe taro zatvor
6Angleder jekh rat pred o Irod te ikalel e Petare anglo narodo, o Petar sovela sine maškar o duj vojnikija phandlo duje lanconcar, a o čuvajra pazinena sine anglo udar. 7I taro jekh puti o angeli e Gospodareskoro pojavingja pe hem bari svetlina svetingja ki adaja kelija kote so sine o Petar.
O angeli pipingja e Petare ko rebrija hem uštargja le vakerindor: “Ajde ušti sigate!”
I o lancija e Petareskere vastendar pele. 8Palo adava o angeli vakergja leske: “Phan tut o pojas hem urav te sandale!”
I o Petar kergja agjar.
Palem o angeli vakergja leske: “Urav to mantili hem phir pala mande!”
9I o Petar iklilo hem gelo pala leste, ama na džangja deka čače tano adava so kerela o angeli, nego mislingja deka dikhela vizija. 10Ola nakhle tari prvo hem i dujto čuvarnica, i ola resle ki sastrnali porta so legarela ko gradi. I porta korkori phravdili anglo lende hem ola iklile. Koga nakhle jekh ulica, o angeli taro jekh puti gelo lestar.
11Togaš o Petar alo upra peste hem vakergja: “Akana čače džanava deka o Gospodari bičhalgja pe angele hem spasingja man e Irodeskere vastendar hem taro sa so e Evrejsko narodo adžikergja te ovel mancar.”
12Koga svatingja adava, gelo ko kher e Marijakoro, i daj e Jovaneskiri soj vikimo Marko, kote so khedinge pe but džene hem molinena pe sine. 13Koga o Petar khugja ki porta, i slugjinka so vikinela pe sine Roda geli te dikhel koj adava. 14Koga pendžargja o glaso e Petareskoro, sine doborom radosno so na phravgja e Petareske, nego prastandili andre hem vakergja: “O Petar tergjola angli porta!”
15Ola vakerge lake: “Tu na sijan sasti!” Koga oj ačhili čička vakerindor deka adava tano čače, ola phenge: “Adava tano sigurno leskoro angeli!”
16A o Petar na čhinagja te khuvel. I koga phravge leske i porta, dikhle le hem sine but iznenadime. 17I o Petar vasteja vakergja lenge te kjutinen hem phengja lenge sar o Gospodari ikalgja le taro zatvor, i phengja: “Vakeren e Jakoveske hem javere phralenge bašo akava.”
Palo adava iklilo hem gelo ko javer than.
18A sabajleja maškar o vojnikija sine bari buna bašo adava so ulo e Petareja. 19O Irod naredingja te roden le, ama našti sine te arakhen le. Koga ispitingja e čuvaren, naredingja te mudaren len. Palo adava o Irod gelo tari Judeja ki Cezareja, i adathe ačhilo nesavo vreme.
E Irodeskoro meriba
20O car Irod sine but holamo upro manuša taro Tir hem Sidon. I ola khedinge pe zaedno hem ale ki leste te dikhen le. Adaleske so dobinge e caroskere pomošniko e Vlasta, zamolinge e Irode bašo mir, soske lengiri phuv anela sine hajbaske tari phuv e caroskiri.
21Ko dogovorimo dive o Irod uravdo ko pe carska šeja, bešla peske ko po troni hem kergja lafi anglo narodo.
22A o narodo vikingja: “Akava tano glaso e devleskoro, a na e manušeskoro!”
23I taro jekh puti o angeli e Gospodareskoro khugja e Irode, adaleske so na dengja slava e Devleske. Hale le o kirme hem mulo.
24A o lafi e Devleskoro prodolžingja te širinela pe hem o broj e vernikongoro bajrola sine. 25Koga o Varnava hem o Savle završinge pi misija, irange pe taro Erusalim ki Antiohija, a pumencar lele e Jovane soj vikimo Marko.
Currently Selected:
Dejla 12: MAR
Highlight
Copy
Compare
Share
Want to have your highlights saved across all your devices? Sign up or sign in