Dejla 11
11
O Petar objasninela e crkvake ko Erusalim
1O apostojla hem o vernikija ki celo Judeja šunge deka dži o manuša taro javera nacije priminge e Devleskoro lafi. 2Koga o Petar gelo ko Erusalim, nesave taro obrezime vernikija kerena sine lafi protiv leste, 3vakerindor: “Khugja ko kher e manušengoro so nane obrezime hem hala lencar.”
4Togaš o Petar počmingja te vakerel lenge redoja sa so ulo: 5“Sijum sine ko gradi Jopa hem molingjum man. I sar molinava man sine dikhlum vizija. Dikhlum nešto sar baro čaršafi sar hulela taro nebo štare krajoncar hem mukhla pe tele uza mande. 6Koga dikhlum ki leste, dikhlum životnen so isi len štar pre, diva zvejra, okola so lazinena ki phuv hem čirikla. 7Togaš šungjum glaso so vakerela mange: ‘Ušti, Petar, čhin hem ha!’
8A me odgovoringjum: ‘Našti, Gospode! Adaleske so nikat na čhigjum ko mo muj nešto soj tano spored amaro zakoni nečisto ili melalo.’
9A o glaso taro nebo palem phengja mange: ‘Ma vaker adava tano nečisto te hal pe koga o Devel kergja le čisto!’
10I agjar ulo trin puti, i togaš o čaršafi irasalilo ko nebo.
11I ko adava momenti trin manuša, so sine bičhavde ki mande tari Cezarija, terdile anglo kher kote so sijum sine. 12A o Sveti Duh phengja mange te džav lencar bizo te razmislinav. Mancar gele akala šov phrajla hem khugjem ko kher adale manušeske. 13Ov vakergja amenge sar pojavingja pe leske angeli ko leskoro kher hem vakergja leske: ‘Bičhal ki Jopa te anen e Simone so vikinela pe Petar. 14Ov ka vakerel tuke lafija preku so ka ove spasimo tu hem sa te kherutne.’
15I koga počmingjum te vakerav, o Sveti Duh hulilo upra lende isto agjar sar so hulilo upro amende ko početok. 16Togaš setingjum man so o Gospodari vakergja: ‘O Jovan krstingja pajneja a tumen ka oven krstime e Sveti Duhoja.’ 17I ako o Devel dengja len isto daro sar so dengja amen, so verujnaja ko Gospodari o Isus Hristos, koj sijum me te čhinavav e Devle ko adava?”
18Koga šunge adava, smiringe pe hem počminge te slavinen e Devle, vakerindor: “Znači o Devel hem e manušenge taro javera nacije dengja te pokajnen pe hem te ovel len večno životo!”
I crkva ki Antiohija
19A bašo adava vreme o vernikija so sine rasturime bašo o progonstvo koga sine o Stefan mudardo, gele dži ki Fenikija, Kipar hem Antiohija. Ola propovedinge o lafi e Devleskoro samo e Evrejenge. 20A nesave lendar sine manuša taro Kipar hem Kirina. I koga ola resle ki Antiohija, počminge te keren lafi e Grkoncar, propovedindor bašo evangelije e Gospodareskoro e Isuseskoro. 21E Gospodareskoro vas sine lencar, i baro broj manuša verujnge hem obratinge pe ko Gospodari.
22Bašo adava šundilo dži ki crkva ko Erusalim, i bičhalge e Varnava ki Antiohija. 23Koga resla adathe o Varnava dikhla so kergja e Devleskiri blagodat, radujngja pe hem ohrabringja sarinen te ačhon verna ko Gospodari sa pe srceja. 24O Varnava sine šukar manuš, pherdo e Sveti Duhoja hem veraja. I but manuša verujnge ko Gospodari.
25Palo adava o Varnava gelo ko Tars te rodel e Savle. 26Koga arakhla le angja le ki Antiohija. Agjar celo berš dive o Varnava hem o Savle khedena pe sine e crkvaja hem sikavena sine bute manušen. Ki Antiohija prvo puti sine vikime o učenikija “Hristijajna”.
27Ko adava vreme ki Antiohija ale nesave prorokija taro Erusalim. 28Jekh lendar so vikinela pe sine Agav, uštilo hem preku o Duho prorokujngja deka ko celo Rimsko carstvo ka ovel baro bokhalipe. (Akava ulo ko vreme koga vladingja o Klavdija.) 29O učenikija odlučinge te pomožine e phralen so živinena sine ki Judeja, agjar so bičhavena sine lenge kas kozom isi. 30Hem agjar kerge, i bičhalge o pare e starešinenge palo Varnava hem o Savle.
