LUKE 2

Jisu ze Kenna

(Mat. 1:18-25)

1Ciciu eh cidau Augustus kideu ga kelungh mina pelane de penui zi rau lulo aja kai di. 2Aide Quirinius Syria deu ga kedih tei kebam hezi rau raitube pia. 3Nah mina pelane de pezi rau zie lie pe nam rip ga gwang di. 4Nah Joseph de Galileeme deu Nazareth nam gade tetpwa David nam Bethlehem Judeame deu ga gwang di, kedanemene pa de David kilungme nah pe leuhme kecune, 5pa hezi rau lu zie lie eh pe nau rangpwa kebambe pui Mary de ngngwa hangh, nah pa tetlak ladi. 6Nah penai cika kebam dau pe nna tingbe cang ladi. 7Nah pa pe neraibe de nna lu delü kehezuipaile hezuilü pecu ketum kwak gage kaizeu, kedanemene hebeuhki ga penui ziemne heni ga kedine.

Meurün kekwame nah Tinggimgwame

8Nah renam cika meurün kekwame tingmui renam ga penui meurün dung kwa la. 9Ge tinggimgwame ge penui da gwang, nah Rampaube kebaale penui ze gum lu, nah penui ngngi süt ti, 10tinggimgwabe penui dage rang eh, “Ngngi so, kedanemene ainie, I Samlia keyi misui süt kecu ge, cide pekiene da gwang kera nnui da teugwang lalu; 11kedanemene henai David nam gage Kelikelube Rampaube Khrista ze nna lu delie. 12Nah aide nnui dage marehi tei keliah ge zie: nnui ngena de kehezuipaile hezuilü ketum kwak ga bam eh ngau lu zie lie,” debeu.

13Ciciu ge zette tinggimgwame maadi ge tinggimgwame de ngngwa eh Tinggwang de twa eh cu:

14“Hutu ga kebam Tinggwang ze peu hetwa pung kelube tei lulo,

nah kideu game pa pesui kedime kak ga kezuyi kelube tei lulo,” dedi.

15Tinggimgwame penui dade nreu tinggim gwang dige meurün kekwame ketket dage rang eh, “Anui Bethlehem ga gwang delü Rampaube anui dage rang kegai tei kedi dung de pie go,” dedi.

16Ciciu eh penui tet mzet süt gwang ge Mary, Joseph na ngena ketum kwak ga zeu eh ngau lu. 17Nah penui cidung de ngau luge hena nabe ha penui dage rang kebeu nzwa mi dage ranglia, 18ge meurün kekwame sam kesiu leune penui sui gah di. 19Dede Mary au sam aidung de pelung gage kaiteu eh mning ladi. 20Ciciu eh meurün kekwame penui de rang kebeu nzwa eh ngau nah siu kelu ziemne Tinggwang ze rüt nah twa eh tet dai di.

Jisu Zi Msiak kelu

21 # Lev. 12:3. Luk. 1:31. Lang hesetne cang kedi cai pe geu rum luge, pezi Jisu ntak lu, pecu tetlak kemakne de tinggimgwabe ne pezi ntak kebeu de.

Jisu ze Kerecaki ga Ngngwa Kegwang

22Pecai Mosa zai ga nzwa penui de tei kemci ting gwang cang luge penai Rampaube de peu zie lie pecu ngngwa Jerusalem ga hangh; 23#Tet. 13:2,12.Rampaube zai gage rauteu kela nzwa eh, “Neraibe pei Rampaube dwa de kemcibe tei zie.” 24#Lev. 12:6-8.Nah Rampaube zai gage raupwa kela nzwa eh pe ratak tei kera ziemne tamhauna kena mede ruipuine kena teu si eh hangh.

25Cidau mige pezi Simeon ge pa Jerusalem ga bam la, pa masang nah Tinggwang miehing eh Israelme lung kerelui ge ngau dai lu kera pie kela kauge, nah Kemci Rabe peda la. 26Kemci Rabe ne peu pecu petsit dwa Rampaube gu Messiah de ngau zie lie ci gaidi. 27Nah Kemci Rabe ne pelung tei beu eh pa Kerecaki gwang lu; nah hezaibe ga raupwa kela nzwa eh tei kera pe pui penai pe pei Jisu ze ngngwa lüt luge, 28pa pecu keupwa lü Tinggwang ze twa eh cu,

29“Rampaubo nang rang kebeu nzwa peu

n kilabe de pelung nciep eh tet lu culo.

30Kedanemene a mik le n kelikelu ciem de ngau lu delu,

31cide nang mteina mikngau gage tei lia dida,

32 # Isa. 42:6; 49:6; 52:10. cide Gentileme ziemne peu ci kegai kebaa ge nah n mina

Israelme dung ziemne hetwa ge lie” dedi.

33Ciciu ge pe ha sam cidung de kerang ziemne pe pei penai pe pui penai sui gah di; 34nah Simeon penai de samlam beu delü pe pui Mary dage rang eh, “Ainie, hena aina de ziemne Israelme kekiee de kau di kera nah mina kekiee de cu dai lu kera tei pwabam delie; nah pa mide peu pecu ngaurau kera kauge da; 35(nah n mlung de qiengtie le kereuh nzwa zie) ciciu eh mina kekiee lungcet dung keu mpet lia kerane.”

36-37Nah cika Asher leuhme Phanuel napui Anna caihakeci puige bam la; pa cing süt di, pa pe relei gade mmi sena pe naa de ngngwa lungh, nah pecai hemipui tei lungh lamuih eh cidau mmi riakheset eh mdai di.#2:36-37. cu mmi 84 di; mede mmi 84 hemipui tei di. Pa tingmui de nah tingna de reca eh mmwang nah kie eh Kerecaki tet kah di lama. 38Nah pa peting siak dau gwanglü Tinggwang de twa eh Jerusalem de ri lu kera kwa kebam pelane dage pe ha rang bam di.

Nazareth ga Nli Kegwang

39 # Mat. 2:23. Penui ma pelane Rampaube zai ga raupwa kela nzwa teicang luge tet daipwa Galilee deu ga penui nam Nazareth ga gwang di. 40Nah hena nabe nkieng lu nah ntip lu maci le pecu puihpung eh; nah Tinggwang ngaugia bede peda la.

Jisu Kerecaki ga kebam

41 # Tet. 12:1-27; Hez. 16:1-8. Ciciu eh pe pui pe pei mmi ramsang kum Jerusalem ga Kahkegwang ngyi ga hangh muih la. 42Nah pa mmi kereikena dau hezaibe nzwa eh penui Jerusalem ga hangh; 43nah hengyi be cang dige penui caili gwang zeuge hena nabe Jisu be penai caide Jerusalem ga bam di; nah pe pui pe pei cide ci lama. 44Dede pa de mina maabe ga la de ha cet eh tingnai ge tettei tie gega gwang di; nah penai penai kibaume nah penai kecime kak ga pecu pei, 45nah penai pecu pei nggah dige penai pecu pei eh Jerusalem ga nli gwang di. 46Lang cumne caine penai pecu Kerecaki ga keledeume kak ga bam eh penui sam kingnei nah ma keteu bam eh ngau lu; 47nah mi pe sam kesiu leune pe maci nah pa sam keli kegai dung ziemne penui sui gah di. 48Ciciu eh penai de pecu ngau luge penai sui gah di; nah pe pui peda de rang eh, “A na, daitei eh anai dage aiciu no? Ainie, n pei anai anai lung keherei eh ncu peei la,” dedi. 49Nah pa penai dage rang eh “Nnai daitei acu peei lano? I a Pei ki ga bam maikesia nnai ci meni” dedi. 50Ciciu de pa penai dage kerang sam de ci lu tadi.

51Nah pa penai de ngngwa Nazareth ga gwang lu, ciciu eh penai sam mzai lu; nah pe pui sam aidung pelane pe mlung gage kaiteu ladi. 52#1 Sa. 2:26; Mac. 3:4.Nah Jisu maci si reureu lu nah lungh nkieng de cu lu ciciu eh Tinggwang nah mina ku de punglu.

Currently Selected:

LUKE 2: ZemeNB

Highlight

Copy