LUKE 3

Johan Duipum Keteibe Keledeu

(Mat. 3:1-12; Mrk. 1:1-8; Jhn. 1:19-28)

1Tiberius Caesar kedi tei kelu mmi kereimengei bekum, nah cidau Pontius Pilate Judah deu reu kedi tei nah Herod Galilee deu reu kedi tei nah pe caireibe Philip Iturea penai Trachonitis deu reu kedi tei nah Lysanias Abilene deu reu kedi tei 2nah Annas penai Caiaphas cingku ketei tingdau Zechariah napei Johan renaam ga kelabe da Tinggwang sam gwang. 3Nah pa Jordan reu kuung lule ailam renam teikela leune ga gwang eh mide kemau gi lu kera ziemne helungkenreu duipum de ledeu gwang.

4 # Isa. 40:3-5. Isaiah caihakecibe laisiukwak gage rauteu kela nzwa eh,

“Mige renaam ga makoa sabaq kela de aide da:

Rampaube lampui telei lulo,

pe lampui tei mzui lu.

5Kideu kehenah leune dung tei puih dizie,

nah kideutuh kehu leune dung teu henah dizie,

nah kenkoibe tei mzui dizie.

nah lampui mdui kemak dung tei mdui dizie.

6Nah mina pelane Tinggwang kelikelu ciem de ngau

kap zie.”

7 # Mat. 12:34; 23:33. Cine pa mina ma peda de duipum tei zie lie kegwangme dade rang eh “Nnui neiduipui leuh medung! Cau ne nnui de cu cai lungkabe gwang kerabe de mbai lulo beu no? 8#Jhn. 8:33.Helung nreu dai lu kerabe tsi buih lulo, nah nnui lung gade, ‘Anui anui pei Abraham,’ de eh rang dai so; kedanemene I nnui dage ranglia zie, Tinggwang au aipau tsu dung dele pwa Abraham name tei lu builu. 9#Mat. 7:19.Cude mrewbe tsingbang dung mah dung gage kaizeu; cine tsingbang petsi keyi buih lula kemak keheibe dede bi lü mi gage kelien gai dizie,” debeu.

10Ciciu ge mina maabe peda de, “Ciciu cai anui daipai tei zie ah?” dedi.

11Nah pa penui sam keli eh, “Mcua kena kebambe de kegabe de ket peu lu; nah ketyeipuk kebambe dede peu cinzwa lulo,” debeu.

12 # Luk. 7:29. Heraha kehame dung de duipum tei zie lie peda gwang eh cu, “Keledeubo, anui depai teilai?” dedi.

13Nah pa penui dade, “Nnui de ha lulo de kebeu de swa ha si so,” debeu.

14Roigwame de pecu keteu eh, “Nah anui depai teilai?” dedi. Nah pa penui dage rang eh, “Mide keheu eh mede kenret rang mmau eh mi gu süt so, nah nnui kangzi de yi delie mning lu,” debeu.

15Mige lungh gwang zie lie regui eh kwa kebam nzwa mina pelane de penui lung gade Johan aipau de Khristabe demi mebi de keteu bamkap di; 16ge Johan penui dade cu, “I au duile nnui de duipum tei kebeu lie; dede mige a swa kedi ge gwang zeu, I pe picum ria de hiak lu kebuime ma; pa Kemci Rabe nah mi teu nnui de duipum tei zie. 17Pa pe reizam pe ba ga la, pe tsiu gui nci kerane, delü tsiu pe bauh gage hekwa luzie; dede perieh de tei mmüt kai kelak mi gage ru dizie,” debeu.

18Ciciu eh pa keledeu kekiee de rang Samlia keyi pwa mide ledeu. 19#Mat. 14:3,4; Mrk. 6:17,18.Dede pa Herod hegwangpei de pe caireibe nau Herodias ziemne nah Herod makesia ketei leune dung ziemne pecu kengam gai; 20ge pa makesia cidung de ketei rünne mene Johan de hebaangki gage tui gai si di.

Jisu Duipum tei kelu

(Mat. 3:13-17; Mrk. 1:9-11)

21Ciciu eh mina pelane duipum tei lu, nah Jisu de duipum tei lü kie kebam dau tinggim nkei gai, 22#Ken. 22:2; Lei. 2:7; Isa. 42:1; Mat. 3:17; Mrk. 1:11; Luk. 9:35.nah Kemci Rabe tamhau nzwa pe reu ga hungh, nah tinggim gade makoa ge, “Nang a Na a kube: I ncu a sui yitube,” de eh gwang.

Jisu Paome

(Mat. 1:1-17)

23Jisu pa pe bata pe bangdua kelu dau mmi camrei kenzwa gedi, pa (mina lungcet gade cai) Joseph na, Heli na, 24Matthat na, Levi na, Melchi na, Jannai na, Joseph na, 25Mattathia na, Amos na, Nahum na, Esli na, Nagai na, 26Maath na, Mattathia na, Semein na, Josech na, Joda na, 27Joanan ha, Rhesa na, Zerubbabel na, Shealtiel na, Neri na, 28Melchi na, Addi na, Cosam na, Elmadam na, Er na, 29Joshua na, Eliezer na, Jorim na, Matthat na, Levi na, 30Simeon na, Judah na, Joseph na, Jonam na, Eliakim na, 31Melea na, Menna na, Mattatha na, Nathan na, David na, 32Jesse na Obed na, Boaz na, Salmon na, Nahshon na. 33Amminadab na Admin na, Arni na, Hezron na, Perez na, Judah na. 34Jakob na, Isaac na, Abraham na, Terah na, Nahor na, 35Serug na, Reu na, Peleg na, Eber na, Shelah na. 36Cainan na, Arphaxad na, Shem na, Noah na, Lamech na, 37Methuselah na, Enoch na, Jared na, Mahalaleel na, Kenan na, 38Enosh na, Seth na, Adam na, Tinggwang na.

Currently Selected:

LUKE 3: ZemeNB

Highlight

Copy