KENDEU 2

1Ciciu eh tingkideu pelane teicang lu. 2#Ibr. 4:4,10; Tet. 20:11. Lang senane benai Tinggwang pa tei kebam de teicang lu delü mtak lu. 3Pa lang senane benai de samlam beu delü cide kengkei tingba ge tei eh keutsam lu, kedanemene cipau nai gade pa pe bata#2:3. cipau nai gage pa dam cang lu; mede cipau nai pa damkegai ta teicang lu. teicang lu nah mtak kelu ne. 4Nah ciciu delü tingkideu bede dam lu.

Eden Gurie

Rampaube #2:4. Rampaube:kecu de saulia samtie ga pielu Tinggwang tingkideu de dam luge, 5kideu reu ga rebang gah nah maleuh dung de pwakcuh ma, kedanemene pa tingrui gede lang gai mereu, nah migede kideube de taatyei kera gah lu; 6dede dui be kideu kang gade hangh eh hangdeu de dui peu la.

7 # 1 Ko. 15:45. Pecai Rampaube Tinggwang hangdeu gade ndei keu lu,#2:7. hangdeu... mina: Ibri koa gade “mina” nah “hangdeu” de pekoa kenzwa ge. delü cide teu mina ge tei lu; pa pe nkieki kena gage kering cui ngngih gaibeu ge minabe ringcuh di.

8Cipau cai Rampaube Tinggwang Tingbangle bie Eden gage hegurie ge ling lu, delü pa minabe de cika ge kai lu. 9Pa cika peu tsingbang hezukeyi leune lungh lu delü petsi keyi buih lu, hegurie suhm ga tsailihei bang nah keyi kesia maci peu kela bang sap.#2:9,17 Dai yi nah dai siabi kecu ci kentsam;mede maleune maci.#Keu. 2:7; 22:2,14.

10Kereuki ge Eden ga lwa lüt eh hegurie de dui ketau beula; Eden gole bie kereuki cide mzi pwa mdai tei bam. 11Kereuki keraibe Pishon; cide Havilah deudi lwa togwa bam. (12Kechak kenci cika de ngau lula nah bam hamla kemak perim kehengui nah ntsu pemi kewhung dung de ngau lula.) 13Kereuki kenabe cai Gihon; cide Cush deudi lwa togwa bam.#2:13. Cush (Mesopotamia ga); mede Ethiopia. 14Kereuki kecumbe cai Tigris, cide Assyria tingbangle lwabam, nah kereuki mdaibe cai Euphrate.

15Ciciu eh Rampaube Tinggwang minabe de cide taatyei nah kwa kera Eden Gurie gage kai lu. 16Pa peda ge rang eh, “Nang hegurie be gade tsingbang keheibe tsi de tyei lubui 17keyi nah kesia maci peu kela bang tsi de gwale. Nang cipau bang tsi de tyei helo; nang ciciu cai, nang cipau nai tsai zie” debeu.

18Pecai Rampaube Tinggwang cu, “Minabe pekatei lungh kebam yi ma. I pecu ngha kera pe kangngwa petau ge tei beuzie.” 19Cine pa hangdeu gade ndei keu lü makaune pelane nah nruine pelane tei gai. Delü pa cidung de minabe da penui zi dai msiak beuzie bi ngngwa gwang beu; cinzwa eh penui pelane penui zi ngau kap lu. 20Cine minabe nruine pelane nah makaune pelane zi msiak lu; dede cidung de ket de pecu ngha kera kangngwa petau luma.

21Pecai Rampaube Tinggwang minabe de tei nzipzing di, nah pa zip kebam dau, pa minabe hetura ket keu mpet lu delü pezam qao di. 22Pa hetura cide pwa mipui gede tei lu nah pecu ngngwa peda gwang beu. 23Ge minabe rang eh,

“Kamtube, aika I kenzwabe ge bam da

Pe ra a ra gade keu lu, nah peci a ci gade.

“Pezi ‘Mipui’ kedanemene pecu au minabe dade tei mpet kelu ne.”#2:23. Mipui... mipei: Ibri gade “mipui” nah “mipei” kecu de pekoa nzwa.

24 # Mat. 19:5; Mrk. 10:7-8; 1 Ko. 6:16; Eph. 5:31. Cine mipei ge pe pui pe pei ze gidi eh pe nau ze ngngwa ket tei dila, ciciu eh penai ngngwa ket dila.

25Minabe penai mipuibe hang nana paaula, dede ngngam dima.

Currently Selected:

KENDEU 2: ZemeNB

Highlight

Copy