KENDEU 1

Tingkideu Kedam Ha

1Kendeu dau Tinggwang tingkideu dam gai,#1:1. Kendeu dau... tingkideu; mede Kendeu dau Tinggwang tingkideu be dam gai; mede Tinggwang tingkideu be dam kecu dau. 2kideu pe rehi gah nah mta mrwa. Ma pelane gumpwa kebam duidi mbuitung kebam de au muiting, nah Tinggwang Rabe#1:2. Tinggwang Rabe; mede Tinggwang kenkieng; mede Heratingkai ge; mede miswa kega tingkai ge. dui reu ga nlai bam. 3Ciciu eh Tinggwang sam kai eh cu, “Peu baa lu” degai ge baa pet lu.#2 Ko. 4:6. 4Tinggwang cide ngau pesui lu. Ciciu eh pa kemui gade keba de keutsam di. 5Nah pa kebaa zi msiakpwa “Tingba” qulu nah kemui dede “Tingmui” qulu. Tinghegi cang gwang di nah tingcang gwang lu cide raitu benai.

6-7Pecai Tinggwang sam kai eh cu, “Dui de mzi nah cide de heni ketsam kena gage kai di kera ziemne peu tingkahm ge pet lulo” degai ge cide ciciu lu. Cine Tinggwang tingkahm ge tei lu, nah cide dui pereule kebam de gade pekangle kebam de keutsam di.#2 Pe. 3:5. 8Pa tingkahm dede “Ting” lie qulu. Tinghegi cang gwang di nah tingcang gwang lu cide lang nane benai.

9Pecai Tinggwang sam kai eh cu, “Ting kang ga dui kebam dede peu heni gega gwang nkwa dilu, delü peu kideu de pet lu kerane” degai ge cide tei lu. 10Pa kecahng deu dede “Kideu” lie qulu, nah pa dui gwang nkwa kelu dede “Jaaidi” lie qulu. Nah Tinggwang cide ngau pesui lu. 11Pecai pa sam kai eh cu, “Peu kideu de mabang ketsamtsam leune lungh pet lulo, mei nah matsi buih lu kela dung” — degai ge cide tei lu. 12Cine kideube mabang ketsamtsam lungh lu, nah Tinggwang cide ngau pesui lu. 13Tinghegi cang gwang di nah tingcang gwang lu cide lang cum benai.

14Pecai Tinggwang sam kai eh cu, “Peu ting gade kebaa dung pet eh tingmui gade tingba keutsam dilu nah daidau tingba dung, tingkum dung, nah renet ngyi dung#1:14. renet ngyi dung; mede ting dung. bangdua bi kecu keulia lu; 15penui kideube de kebaa peu kera ting gade taubaa zie” dege cide ciciu lu. 16Cine Tinggwang kebaa dihki kecu kena tei lu tingba dau baa kera tingnaimik nah tingmui dau baa kera hekei; pa heghi dung de tei lu. 17Pa kebaa dung pwa ting gage kai eh peu kideu reu baa kera kai lu, 18nah peu tingba nah tingmui reu dih kera, nah kemui gade peu kebaabe de keutsam di kera. Nah Tinggwang cide ngau pesui lu. 19Tinghegi cang di nah tingcang gwang lu cide lang pemdai benai.

20Pecai Tinggwang sam kai eh cu, “Peu makaune ketsamtsam kekiee le dui de puih lu, nah peu ting de nruine dung le puih lu” degai. 21Cine Tinggwang jaaidi ga ngau kehing kaune dung, dui ga kelungh makaune ketsamtsam pelane, nah nruine ketsamtsam dam gai. Nah Tinggwang cide ngau pesui lu. 22Nah Tinggwang penui ze samlam beu delü rang eh, “Hingh nah kiee pet lu ciciu eh jaaidi de puih lu nah kideu ga nruine kiee pet lu” degai. 23Tinghegi cang gwang di nah tingcang gwang lu — cide lang pemengei benai.

24Pecai Tinggwang sam kai eh cu, “Peu kideube de makaune ketsamtsam leune hingh pet lu: kauruine nah renaam kaune keceu kedi” degai ge cide tei lu. 25Nah Tinggwang cidung pelane tei lu, nah Tinggwang cide ngau pesui lu.

26 # 1 Ko. 11:7. Pecai Tinggwang cu, “Cu anui mina tei zieda; penui anui nzwa nah anui rehi zie. Penui heka, nruine dung, nah makaune pelane, kauruine nah renaam kaune#1:26. Paopai rangswa kegai ket Hekaune, kauruine nah renaam kaune; Ibr. Kauruine nah kideu pelane. keceu kedi reu kenkieng teu zie” debeu. 27#Mat. 19:4; Mrk. 10:6; Ken. 5:1-2.Ciciu eh Tinggwang mina ze dam lu, penai ze pa nzwa tei lu. Pa penai ze mipei nah mipui dam lu, 28nah penai ze samlam beu, delü cu, “Hena kekiee lungh lu, ciciu eh nnai leuhme kideu pelane reu lungh lu nah cide penui kang ga kejeu lu kerane. I nnai ze heka, nruine dung, nah renaam kaune pelane reu gage kai beula. 29I nnai ze peu tyei kera mei ketsamtsam leune nah matsi leune tyei kera peu dida; 30dede renaam kaune pelane nah nruine dung pelane ziemne taktyei tei kera I tsehei nah tsingnei bang dung peu dida” degai ge cide tei lu. 31Tinggwang pa tei kelu leune de pie gai, ge pa pesui yi süt ti. Tinghegi cang gwang di nah tingcang gwang lu, cide lang herok benai.

Currently Selected:

KENDEU 1: ZemeNB

Highlight

Copy