KENDEU 19

Sodom Mau Kedi

1Cipau nai tinghegi tinggimgwame kena Sodom ga kegwang dau, Lot namdibe rieki ga ntum bam. Pa penai ze ngau kerikezi, pa cuh lü penai ze redau kera miedi. Pa penai dwa ga keumie 2lu eh rang, “Kedibe kena, I nnai ze hegia kera aika bam. Keherei de a ki ga gwang lu. Nnai pi hui lü teziu bam lubui. Tingcang nnai cuh zi lubui nah nnai lampui le mie lu.”

Dede penai keli eh, “Lak, anai teziu namdi nkwani ga zeu zie” dedi.

3Pa penai ze kecung bihdi, ge kekamle penai ze pecu ngngwa pe ki ga gwang di. Lot pe kilame ze nku ru lulo beu delü sangme ziemne taktyei keyi ntei lu. Cide ntei luge penai cide tyeilu.

4Hegiame kena jeu ga gwang kedi dwa, Sodomme ki cide togwalu. Namdi ga mina pelane, kecing hena, cika bam. 5#Tut. 19:22-24.Penui Lot ze qu lü keteu eh, “Heziu nda gwang kebam kena de daiga bam no? Penai ze anui da teumpet beu lo!” dedi. Sodomme penai ze ngngwa kemmha ta tei neu di.

6Lot hegole pet lü pecai ga kikam nkui di. 7Pa penui dade “A zangme dung, I a nggia kiela, kenlien ai kenzwa ta tei so! 8Ainie, I a napui hang na cude nci eh bamreu. Acu peu penai ze nnui da teumpet beu lo, nah nnui tei keneube penai ze teu tei lubui. Dede magede aipau pei kena dage tei gaiso; penai a ki ga a giabe kena, nah I penai ze gum maisia bam,” dedi.

9Dede penui cu, “Anui lampui ga nzia lu, nang sangme! Anui ze tei kerabe rang kebeu nang cau no? Anui lampui ga nzia lu, maige anui penai ze swade nda ge siaki kecu tei gaizie” dedi. Penui Lot ze niah ketang lüt eh kikam de tei pang di kera teicu di. 10Dede kilung ga kebam kena de pet lu, delü Lot ze kilung ga ngngwa nlüt lu delü kikambe nkui di. 11#2 Hg. 6:18.Delü penai hegole kebam mina pelane mik teiciet di, ciciu eh penui kikambe ngau tadi.

Lot Sodom Püt kedi

12Mina kena de Lot dade, “Nang aika mi keda dung bam cai n napei, n napui, n napui naapeime, mede namdi ga n kibaume keda dung de bam cai — penui ze aika de peu mpet dilu, 13kedanemene anui heni aide nkap di lai eh zeu delu. Rampaube mina aidung dede kemmau sam kesia kekiee siu luda nah anui ze Sodom nkap di lo eh lang gailie” debeu.

14Ciciu ge Lot pe napui kena ze luu lai eh kebam kena da gwang eh cu, “Kelwa lu delü aika de mzet tet dilu; Rampaube heni aide nkap di lai bam dida,” dedi. Dede penai pa henui tei zeu lie mning di.

15Tingcang nuge tinggimgwabe kena Lot ze kecung eh, “Kelwa lu!” dedi. “N nau nah n napui kena ze ngngwa lü mpet lu, ciciu eh namdi bede nkap kecu dau nnui teilung de nkap di melu kerane,” debeu. 16#2 Pe. 2:7.Lot lunghau di. Dede Rampaube pecu ngau nggia di; cine minabe kena de pecu, pe nau, nah pe napui kena ba teu lu delü namdi gole ge nzang mpet beu. 17Ge tinggimgwame hang ge cu, “Ring lu kerane pak lu! Nreu cainok gwang pie so nah kideu langkam be ga mtak so. Kideutuh dung gage pak gailu, nnui ze teitset ti melu kerane,” debeu.

18Dede Lot keli eh, “Ciciu so, keherei de anui ze peu ciciu helo, kedihbo. 19Nang a suiyi kedi tei beu da nah a teilung keli beu da. Dede kideutuh dung mdei ham di; kenkap de a swa rai gwang dizie, nah I cika gwang cang lu kemakne tsai dizie. 20Nang renam keceu lu na de ngau mi? Cide au mna bam. Acu peu cika gwang di lulo nang cide heni keceuna ge kecu ngau bam nah I cika kuak lubui,” dedi. 21Pa keli eh, “Ei, I de a sui da. I renam cide nkap dilak. 22Kelwa lu! Pak lu! Nang cika gwang cang lu kemaktane I magede tei gailak,” debeu.

Lot cide ceu lie kecune, renam cide Zoar#19:22. Zoar: Aipau zi de Ibri gade “Keceu” de kecu koa ge nzwa. lie msiak lu.

Sodom penai Gomorrah Kenkap

23Lot Zoar cang kelu tingdau tingnaimik cuh di. 24#Mat. 10:15; 11:23-24; Luk. 10:12; 17:29; 2 Pe. 2:6; Jud. 7. Rampaube heukebam sulphur ruipwa Sodom penai Gomorrah namdi kena reuge kai zette gai, 25nah cii kena de nah kideu langkam pelane de nkap di, cika mina pelane nah, hangdeu cipau reu ga malungh kebam leune de. 26#Luk. 17:32.Dede Lot nau nreu gwang pie gaige mcai tsia mmi di.

27Tingcang nuge Abraham pedwa Rampaube ze ngngwa kesap ni ga kelwa miedi. 28Pa Sodom penai Gomorrah ga nah hangdeu langkam pelane ga pie nkei gai, ge kideu cika de mika ka cuh kecu ngau miheu süt kecu mika ge nzwa eh. 29Dede Tinggwang Lot lungh kebam langkam ga namdi kena de nkap dige, pa Abraham ze nsung lü Lot ze peu mbai lü kuak lu.

Moabme penai Ammonme Bangdua

30Lot Zoar ga bam ngngi kedine pa nah pe napui kena de hangh kideutuh ga tsupop ga lungh bam di. 31Kecingbe pui, pe sinabe pui dade, “Anai pei cing di zeuda, nah anai ze luu lü anai na lungh lu kera kideu pelane#19:31. kideu pelane gade; mede aipau deu. gade gah da. 32Gwang lu, anai pei ze peu sak miee lü pecu ngngwa zeu eh peda ze hena lungh lu kera” dedi. 33Cipau ziu penai pecu zau sak kera kai beu, delü kecingbe pui pecu ngngwa mmha di. Dede pa sak miee ham kedine magede ci ma.

34Pecai benai kecingbe pui pe sinabe be pui dade, “I nzieziu pecu ngngwa zeuda; anai teziu pecu peu sak miee dai lu rego, delü nang pecu ngngwa zeu lu. Delü anai hang nana anai pei dade hena lungh lu kerane” dedi. 35Cine cipau ziu penai pecu peu sak mieelu, delü henabe pui pecu ngngwa mmha di. Pa sak miee ham kedine cupia de cide ci ma. 36Ainzwa eh Lot napui kena hang nana penai pei na tetlak ladi. 37Kecingbe pui mipeina ge nna lu eh pa pezi msiakpwa Moab#19:37. Moab: Aipau zi de Ibri gade “A pei dade” de kecu koa ge nzwa. qulu. Pa cu Moabme pao be da. 38Henabe pui de mipeina ge nna lu, pa pezi Benammi#19:38. Benammi: Aipau zi de Ibri gade pekieh “A kibaume napei” nah Ibri gade “Ammonme” de kecu koa ge nzwa. msiak lu. Pa cu Ammonme pao be da.

Currently Selected:

KENDEU 19: ZemeNB

Highlight

Copy